A. Zoobe 21 - WẼNNAAM SEBRE 2014

A Zoob leokre

¹ A Zoob leokame n yeele:

² «Kelg-y-yã, kelg-y mam goamã neere. Yãmb sẽn na n bels maam la woto?

³ Bas-y tɩ mam gom n sɛ, mam sã n wa gom n sɛ, bɩ y yaool n yaal-ma.

⁴ Ne maam, mam yẽgemda ne ninsaal la? Na n yɩɩ a wãn tɩ m ka na n yãge?

⁵ Wẽnemd-y n ges-y maam tɩ y pɛleng yɩke. La y rɩk y nug n pĩ y noore.

⁶ Mam sã n tagsd m yellã yelle, yaa rabeem n kẽed maam, tɩ m yĩngã rigda.

⁷ Bõe yĩng tɩ nin-wẽns paamd vɩɩm? Bõe yĩng tɩ b kʋʋndẽ? Bõe tɩ b paamd pãng n paasdẽ menga?

⁸ Bãmb yagens naagda bãmb n paamd pãng bãmb nifẽ.

⁹ Bãmb zagsẽ wã yaa vɩ-bãan n be beenẽ. La Wẽnnaam ka sɩbgd bãmb ye.

¹⁰ Bãmb lolsã tara rogem pãnga, la b nag-yãansã rogdame n ka fabd ye.

¹¹ Bãmb basda b kambã tɩ b yit n deemd wa pe-bi, b kambã saad n saoodame.

¹² Bãmb wẽeda sɩlsãgs ne kʋla, la b peebd wɩɩs n kɩdemdẽ.

¹³ Bãmb vɩɩmã baasda neere. Bãmb ka namsd la b yaool n ki ye.»

¹⁴ Bãmb yaool n dag n yeta Wẽnnaam yaa: «Zãag-y y meng ne tõndo. Tõnd ka rat n bãng yãmb soayã ye.

¹⁵ Pãng-Soabã yaa ãnda tɩ d na n waoogd-ba? Tõnd sã n pʋʋsd-ba, bõe nafr n be beenẽ?»

¹⁶ Sɩda, bãmb ka yit bãmb mens nengẽ ye. La nin-wẽns saagr zãra ne maam.

¹⁷ Yãmb nan yãnda b sẽn kiis nin-wẽns fɩtla? Yãmb nan yãndame tɩ nin-wẽns paam toogo? Yãmb nan yãnda Wẽnnaam sũur sẽn puug ne-ba?

¹⁸ B yaool n yeelame: «Bɩ b yɩ wa mood sobg sẽn dɩkda, la b yɩ wa fɩɩb sob-kãseng sẽn dɩkde.

¹⁹ Dẽ yĩnga Wẽnnaam bĩnga nin-wẽng sɩbgr a biig yĩng la? Bɩ nin-wẽng sɩbgr lʋɩ a meng zug t'a bãnge.

²⁰ Yaa yẽnda mengã n tog n yãnd a mengã sãoongo, la a yũ Pãng-Soabã sũ-puugr dãam.

²¹ Sɩda, yẽnda kitã sõor sã n wa n ta a tɛka, a yirã sẽn na n yõd n yɩ bũmb ningã ka pak-a ye.

²² Ned tõe n zãmsa Wẽnnaam bãngr la? Ka bãmb n kaood saasẽ dãmbã bʋʋd la?

²³ Nina kiida a burkĩnd pʋga, t'a sũur noomẽ tɩ rabeem ka tar-a,

²⁴ t'a lʋgã pid ne kaam, t'a kõab me pid ne sɩɩlem.

²⁵ La nina me kiida ne sũ-toogo, n ka tol n paam naar ye.

²⁶ Bãmb b yiibã naagda taab n gãand tẽng tomẽ tɩ zũnzũy rɩ-ba.

²⁷ Ade, mam mii yãmb sẽn tagsd to-to wã, la m mi yãmb sẽn dat n maan maam bũmb ningã.»

²⁸ Bala, yãmb sokdame: «Nin-toosã yir bee yɛɛnẽ?» Nin-wẽnsã sẽn dag n be fu-roog ningã bee yɛɛnẽ?

²⁹ Yãmb ka sok so-loaadbã n ges la? Yãmb ka mi bãmb sẽn yet bũmb ninsã la?

³⁰ B fãagda nin-wẽng sãoong wakate. La Wẽnnaam sũ-puugrã wakate, yẽnda paamda zĩ-soalgdga.

³¹ Ãnda soab n na n yals yẽnda taoor n yeel-a t'a manesmã ka sõama? La ãndã n na n dol yẽnda a tʋʋm-wẽnsã?

³² B rɩka yẽnda n ta a yaoogẽ wã. La b gũuda a yaoogã.

³³ Longã pʋgẽ tãndã yaa bʋgsg ne yẽnda. Nebã fãa tongda taab n yãagd yẽnda. Neb b sẽn ka tõe n sõd n sɛ n deng yẽnda taoore.

³⁴ Yãmb na n maana a wãn n bels maam ne bels-vɩɩdo? Bũmb nins sẽn be yãmb leokrã pʋgã yaa zĩrẽ-beedo.