A. Zoobe 19 - WẼNNAAM SEBRE 2014

A Zoob leokre

¹ A Zoob leokame n yeel yaa:

² «Yãmb na n sãama mam sũur hal tɩ ta dabʋre? La yãmb na n namsa maam ne y goamã hal tɩ ta dabʋre?

³ Yaa naoor piig soab la woto yãmb sẽn tʋʋd maam. Yãmb sẽn tar maam n yaandẽ wã yãnd ka tar-yã?

⁴ Baa sã n yaa sɩd tɩ mam tudgame, mam tudgrã yell paka maam bala.

⁵ La yãmb sã n wukd y mens ne maam, la y ningd maam taal m paoogrã yĩnga,

⁶ bãng-y tɩ yaa Wẽnnaam n namsd maam, bãmb n yõkd maam ne b gãmbre.

⁷ Ade, mam sã n wẽ nobɩng n yeel tɩ b maand-m-la pãnga, ned ka leokd maam ye. Mam sã n bool tɩ b wa sõng-ma, ned ba a yembr toog ka ye.

⁸ Wẽnnaam yẽda mam sorã tɩ m ka tõe n loog ye. La bãmb kɩtame tɩ mam sorã lebg lika.

⁹ Bãmb yeega m ziirã zanga, la b fõk m maanfã n bas-ma.

¹⁰ Bãmb sãamda mam yell zĩigã fãa, tɩ m lebg kũum bala. Bãmb võoga mam tẽeb gũudmã wa tɩɩg sẽn viki.

¹¹ Bãmb sũur yika ne maam. Bãmb geta maam wa bɛyã.

¹² Bãmb tãb-biisã naaga taab n wa. Bãmb pãrga sor n tãag mam yirã. Bãmb tilga b tãb-sikã n gilg mam fu-roogã.

¹³ Wẽnnaam kɩtame tɩ m saam-biisã zãag ne maam, neb nins sẽn mi maamã me basa maam.

¹⁴ Mam doagdbã basa maam. Mam zo-rãmbã yĩma mam yelle.

¹⁵ Mam sẽn dag n deeg neb nins mam yirã, ne mam yem-pogsã geta maam wa sãana. Mam lebga nin-sãang bãmb nifẽ.

¹⁶ Baa mam sã n yaag m noor n bool m tʋmtʋmd n bõos-a a ka sakd ye.

¹⁷ Mam noorã waolg lebga bõn-beed ne mam pagã. Mam lebga bõn-põosg mam meng kambã yĩnga.

¹⁸ Baa kom-bãoonegã paoogda maam. Mam sã n yiki, b wɩta maam.

¹⁹ Mam sẽn dag n pelgd m pʋg ne neb ninsã fãa geta maam wa bõn-dẽgdo. Neb nins mam sẽn dag n nongã wẽnemdame n zabd ne maam.

²⁰ Yaa m gãongã ne m kõaba bal n keta. Mam no-gãonga vɛɛgame n bas m yẽna yɩnga.

²¹ M zo-rãmba, zoe-y m nimbãanega. Bala, Wẽnnaam nug wẽe maam!

²² Bõe yĩng tɩ y pʋgd n digd maam wa Wẽnnaam sẽn dig maamã? Yãmb sẽn namsd mam yĩngã ket n ka sek yãmba?

²³ Mam nongẽ lame tɩ b sã n dag n tõe n gʋlsẽ-la mam goamã, b sã n dag n tõe n gʋlsẽ-b-la sebr pʋgẽ.

²⁴ Bɩ b gʋls bãmb pĩig zug ne kut kɩtga, n bolg-a ne namd tɩ b pa be wakat fãa!

²⁵ Mam miime tɩ mam fãagdã vɩɩme, la b na n yika tẽng zug yaoolem daarã.

²⁶ La baa mam gãongã sã n sãame, mam na n yãnda Wẽnnaam m yĩngã pʋgẽ.

²⁷ Mam na n yãnda bãmb tɩ b be ne maam. Mam meng nin na n yãnda bãmba, la ka na n yɩ ned a to la m na n yãnd ye. Mam gũume n yɛ tɩ m pãng sɛ.»

²⁸ Yãmb sã n wa n yeele: «D na n maana a wãn n kell n nams-a n paam bũmb n dõd-a? Yaa wakat-kãng la b na n bãng mam yellã võore.

²⁹ Bɩ y zoe zabr sʋʋg rabeem y mensã yĩnga. Yãmb sẽn namsd maam ne goam ninsã zema ne zabr sʋʋga, la yãmb na n bãngame tɩ bʋ-kaoor n be.»