A. Zoobe 18 - WẼNNAAM SEBRE 2014

Suhit tẽng rao a Bildaad leokr a yiibẽ soaba

¹ Suhit tẽng rao a Bildaad yeelame:

² «Yãmb na n basa y goamã dabʋre? Tags bilf tɩ tõnd me na n gomame.

³ Bõe yĩng tɩ f tagsdẽ tɩ tõnd yaa wa rũms bala? Bõe yĩng tɩ f tagsdẽ tɩ tõnd yaa neb sẽn ka tar yam?

⁴ Fo sũurã sẽn yik tɩ zabd foomã, fo yĩng ka tõe tɩ dũniyã lebg vɩʋʋg ye. La pĩisã kug ka na n sers n bas-b zĩisã fo yĩng me ye.

⁵ N-yẽe! Nin-wẽng vẽenem na n kiime, la a bugmã sẽn witã ka na n leb n wid ye.

⁶ Yẽnda fu-roogã pʋg vẽenem na n lebga lika, la a fɩtlã sẽn wit yẽnda zugẽ wã bugum na n kiime.

⁷ A naoã sẽn kegma na n kẽnd n lamsdame. Yẽnda mengã saagr n na n lubd-a.

⁸ Bala, yẽnda naoã lʋɩɩ bẽdg pʋg tao-tao. A naoã taba bẽodgã gaamdsã pʋga.

⁹ Bẽdgã gãda a nao-kãsenkãare. Bẽdgã wĩy sẽbgd-a lame.

¹⁰ B busa bẽodgã tomẽ n na n yõk-a. B bẽda kuusr a sorã zugu.

¹¹ Pelen-yɩk gũbg-a-la zĩig fãa tɩ yaa rabeem. Pelen-yɩkã pʋgda yẽnda a sẽn dabd zĩig ning fãa.

¹² Kom booga yẽnda pãnga. La toog lebga yẽnda pak-n-taaga.

¹³ Bãag rɩ a yĩn-gãongã zãnga. Kũum bi-rẽengã rɩɩ yẽnda yĩngã wilã fãa.

¹⁴ B võoga yẽnda n yiis a fu-roog ning a sẽn dag n be wã pʋga. A talla a meng n tɩ kɩs a yɛɛsg naaba.

¹⁵ Fo tõe n kell n paa yẽnda fu-roogẽ wã, bala, a ka leb n yaa yẽnda n so ye. B na n yugla a yirã kidbri.

¹⁶ A yẽgã sẽn be tẽngrã kʋɩɩme, a kʋɩɩme hal tɩ tãag a wil-gelengeesã.

¹⁷ B ka leb n tẽegd a yell tẽng zug ye. A yʋʋr menema tẽngã pʋgẽ.

¹⁸ B yiis-a-la vẽenem pʋgẽ n kẽes likẽ, n dig-a n yiis tẽng zugu.

¹⁹ Yẽnda ka tar doog bɩ yagens a nebã sʋk ye. Nin-vɩɩg ka kell zĩig ning yẽnda sẽn dag n yaa sãan a pʋgẽ wã ye.

²⁰ Yẽnda raboogã na n kɩtame tɩ neb nins sẽn be nin-taoorã pɛleng yɩke. La rabeem na n yõka neb nins sẽn be yaangã.

²¹ Nin-wẽng yir yaa woto. Ned ning sẽn ka mi Wẽnnaam, a zĩig yaa woto!»