A. Zoobe 13 - WẼNNAAM SEBRE 2014

A Zoob wiligda Wẽnnaam t'a tara bʋʋm

¹ Ade, mam nif yãnda bõn-kãng fãa. Mam tʋbr wʋm-a lame, la m wʋma a võore.

² Yãmb sẽn mi bũmb ningã, mam me mii bõn-kãnga, yãmb ka yɩɩd maam ye.

³ Bũmb sẽn be bala, yaa tɩ mam dat n goma ne Pãng-Soabã, mam dat n goma Wẽnnaam taoor n yiis m meng yellẽ wã.

⁴ Bala, yãmba, yãmb dɩka zĩrẽ n lut sɩda, yãmb fãa yaa zaalem tɩpdba.

⁵ Hey! Yãmb sã n dag n sĩndẽ y noor n são! B rag n na n gesẽ-la yãmb wa yam dãmba.

⁶ Kelg-y mam goamã. Yok-y y tʋb n kelg mam sẽn wilgd m yellã.

⁷ Yãmb na n gomda sẽn ka sɩd Wẽnnaam yʋʋr yĩnga? La yãmb na n togsa zĩrẽ bãmb yĩnga?

⁸ Yãmb dat n naaga y meng ne Wẽnnaam la? Yãmb dat n yõka sɛɛg n kõ Wẽnnaam la?

⁹ Wẽnnaam sã n fees yãmba, na n yɩɩ sõama ne yãmb sɩda? Bɩ yãmb tẽedame tɩ y tõe n belga Wẽnnaam wa b sẽn belgd ninsaalbã?

¹⁰ Yãmb sã n dat soos n sõng Wẽnnaam, yaa vẽeneg tɩ b na n zaba ne yãmba.

¹¹ Bãmb naamã ka na n yɛɛs yãmba? B rabeem ka na n kẽ yãmba?

¹² Yãmb yel-bũnã yaa wa tompeglem. Yãmb sẽn tik bʋʋm ningã n gomdã yaa wa yagdo.

¹³ Baa sẽn yaa yell ning n na n paam maam, sĩnd-y y noor la y bas-m tɩ m gome.

¹⁴ Bõe yĩng tɩ mam na n gãd m yĩn-nemdã ne m yẽna? Bõe yĩng tɩ m na n gẽneg m yõore?

¹⁵ B rat bɩ b kʋ maam! Mam ka leb n tar tẽeb ye. Mam na n goma m yell bãmb taoore.

¹⁶ Bõn-kãng tõe n yɩɩ fãagr mam yĩnga. Bala, wẽn-kɩɩs ka na n saag n kẽng Wẽnnaam taoor ye.

¹⁷ Kelg-y-yã, kelg-y m goamã neere. Bɩ mam sẽn na n bilg bũmb ningã kẽ y tʋbẽ.

¹⁸ Ade, bɩ b bas tɩ m gom n bao bʋʋm. Mam miime tɩ m tara bʋʋm.

¹⁹ Ãnda soab n na n bʋ ne maam? Sẽn sɩng ne moasã, mam na n sĩndame n ki.

²⁰ Mam Wẽnnaam, bũmb a yiib la m dat tɩ y kõ-ma, la m ka na n solg m meng ne yãmb ye.

²¹ Zãag-y y nugã ne maam, tɩ y rabeemã ra wa ne yɛɛsg m yĩng ye.

²² La y bool-m tɩ m na n sakame. Wall bɩ m gom tɩ y na n leok-m lame?

²³ Mam yel-wẽnã ne m kongrã sõor taa wãna? Bɩ y kɩt tɩ m bãng m yel-wẽnã ne m kongrã.

²⁴ Bõe yĩng tɩ y solg y neng ne maam, n get maam wa y bɛyã?

²⁵ Yãmb dat n namsa vãoog sobg sẽn dɩkd la? Yãmb dat n diga mo-koeems la?

²⁶ Bala, yãmb gʋlsa m yellã tɩ yaa toogo, yãmb sɩbgda maam m yãadmẽ kongrã yĩnga.

²⁷ Yãmb balga mam naoã, n gũusd mam sẽn maand bũmb nins fãa wã. Yãmb gũusda maam m naoã sẽn tabgẽ.

²⁸ Mam yĩngã põogame n besd n lʋɩtẽ, wa mogd sẽn mok fuugu.