A. Zoobe 10 - WẼNNAAM SEBRE 2014

A Zoob yẽgma a toogã yĩnga

¹ Mam yam yii ne m vɩɩmã! Mam na n basa m yam n gom m toogã yelle. Mam sũ-toogã pʋga m na n gomame.

² Mam yeta Wẽnnaam yaa: «Da mong-y maam bʋʋm ye! Wilg-y maam yell ning y sẽn tar ne maam!

³ Rẽ yĩnga, a zemsa ne yãmb tɩ y nams yãmb meng sẽn naan a soabã n paooga, n yaool n kɩt tɩ y vẽenem puk nin-wẽnsã saagr zugu?

⁴ Yãmb ninã yaa wa ninsaal dẽndã la? Yãmb sẽn ne wã yaa wa ninsaal sẽn ne wã la?

⁵ Yãmb dasmã yaa wa ninsaal rasmã la? La yãmb yʋʋmã yaa wa ninsaal yʋʋmã la?

⁶ La bõe yĩng tɩ y baood n bãng m kongre, la y gẽesd mam yel-wẽnde,

⁷ n yaool n mi sõama tɩ mam ka nin-wẽnga, la ned ka tõe n fãag maam yãmb nugẽ?

⁸ Yaa yãmb meng nus n naan maam, bãmb n naan maam zãnga, tɩ yãmb wẽnemd n dat n menes maam!

⁹ M kotame tɩ y tẽeg tɩ yãmb yãka tẽng tãnd n yag maam. Yãmb dat n kɩtame tɩ m leb n leb tẽng tomẽ la?

¹⁰ Ka yãmb n kɩt tɩ m kẽ m ma pʋgẽ wa bĩis-naar la? Leb n ka yãmb n kɩt tɩ m gĩs wa bĩisim la?

¹¹ Yãmb maana maam ne kõab la gĩina, n lud-b ne yĩn-nemdo, n yaool n dɩk yĩn-gãong n yeelg-ma.

¹² Yãmb kõo maam vɩɩm la pãnga, la y gesa m yell n gũ mam vɩɩmã.

¹³ La ad bũmb nins yãmb sẽn dag n bĩng y sũurẽ, mam mii bũmb ning sẽn dag n be yãmb tagsgẽ wã.

¹⁴ Mam sã n maan yel-wẽnde, yãmb nee maam, la yãmb ka basd maam taal m kongrã yĩng ye.

¹⁵ Mam sã n yaa nin-wẽnga, ad yaa toog ne maam bala! Baa mam sã n yaa tɩrga, mam ka saagd n na n doog m zug ye. Paoogrã sek-m lame, mam toogã rɩ-m la zãnga.

¹⁶ La m sã n saag n zẽk m zugu, yãmb digda maam wa gɩgemde. Yãmb leb n maanda tʋʋm sẽn yɛɛsd maam.

¹⁷ Yãmb paasda maam to-paala, yãmb sũ-puugrã ne maam lebgda wʋsgo, tãb-biis reesda taab n zabd ne maam.

¹⁸ Bõe yĩng tɩ y bas tɩ m yi m ma pʋgẽ? Mam sã n dag n kiẽ, ned nif kõn yãndẽ maam ye.

¹⁹ Rag n na n yɩɩ wa m zɩ n zĩnd ye, mam dag n na n yi m ma pʋgẽ n kẽ yaoogẽ bala.

²⁰ Mam dasmã sõor ka bilf bal la? Bɩ b bas-m bala! Bɩ b loog la b bas-ma, tɩ mam leb n paam pemes bilfu,

²¹ sẽn deng mam sẽn na n loog n kẽng lik bida tẽngẽ, la sẽn deng m sẽn na n kẽng kũum maasmẽ, n ka leb n wa wã.

²² Beenẽ yaa tẽng sẽn yaa lik-kãsenga, la lik bida zĩiga, zĩig kũum maasem sẽn be, beenẽ yaa zũnglg tɩ vẽenem yaa wa lika.»