A. Zoobe 1 - WẼNNAAM SEBRE 2014

A Zoob makre

¹ Rao a yembr n dag n be Uts tẽngã pʋga, t'a yʋʋr boondẽ t'a Zoobe. Rao-kãng yaa burkĩna, n yaa nin-tɩrga. Yẽnda rag n zoeta Wẽnnaam, la a zãagd a meng ne wẽng maanego.

² Yẽnda rag n tara kom-dibli a yopoe, la kom-pugli a tãabo.

³ A rag n tara piis tus a yopoe, ne yʋgma tus a tãabo, la niig tusri, ne bõn-yãans kobs-nu, la a tar tʋmtʋmdb hal wʋsgo. Yaang sẽnẽ nebã fãa sʋka, rao-kãng n dag n yaa nin-kãseng n yɩɩd a taabã.

⁴ A Zoob kom-dibli wã rag n kẽnda ned kam fãa yir n maand tigr n deesd taaba, la b sã n mi n na n maan tigrã, b boonda b tãop a tãabã tɩ b wat n naagd bãmb n dɩtẽ la b yũuda.

⁵ La tigrã rasem sã n wa n looge, a Zoob boonda a kambã tɩ b wa t'a yɩlg-ba. Yẽnda rag n yikda yibeoog pĩnd n maan maoong sẽn yõogd bugum biig fãa yĩnga. Bala, a Zoob rag n tagsda a woto: «Tõeeme tɩ mam kambã maana yel-wẽnde, n tʋʋs Wẽnnaam b sũyã tagsd pʋgẽ.» A Zoob rag n maanda a woto wakat fãa.

A Zoob pipi makre

⁶ Daar a yembre, Wẽnnaam kom-dibli wã waa Sẽn-Ka-Saab taoore, la sʋtãana me tũu bãmb n wa.

⁷ Sẽn-Ka-Saab soka sʋtãana yaa: «Fo yii yɛɛnẽ?» La sʋtãana leokame: «Mam dag n saad n gilgda dũniyã zugu.»

⁸ Sẽn-Ka-Saab soka yẽnda yaa: «Fo yãndã mam tʋmtʋmd a Zoob bɩ? Ned ka be dũniyã zug n yaa wa yẽndã ye. A yaa burkĩna, n yaa nin-tɩrga, la a zoet Wẽnnaam n zãagd a meng ne wẽnga.»

⁹ Sʋtãana yeela Sẽn-Ka-Saab yaa: «A Zoob zoeta yãmb a Wẽnnaam zaalem yĩng la?

¹⁰ Yãmb wẽe yãgr n gũbg-a, yẽnda ne a zakã, la ne a sẽn so wã fãa. Yãmb ninga a nus tʋʋmã barka, la a rũmsã fɩɩgdame n pit tẽngã.

¹¹ Mam kotame bala, tɩ y tẽeg y nug n sɩɩs a sẽn so wã fãa. La mam mii hakɩɩka, t'a na n tʋʋsa yãmba.»

¹² Sẽn-Ka-Saab yeela sʋtãana yaa: «Beneere, bũmb ning fãa yẽnda sẽn so wã bee fo nugẽ. Bũmb sẽn be bala, ra saag n sɩɩs a mengã ye!» La sʋtãana yii Sẽn-Ka-Saab nengẽ n looge.

¹³ Daar a yembre, a Zoob kom-dibli wã ne a kom-pugli wã fãa rag n bee b kẽem soabã zakẽ n dɩtẽ la b yũud reezẽ rãam.

¹⁴ La ned n kẽng a Zoob nengẽ n tɩ yeel-a yaa: «Niigã rag n koodame tɩ bõn-yãansã yegd beenẽ n wãbdẽ.

¹⁵ La Sabe-rãmbã wa n kãaga bãmba, la b kʋ tʋmtʋmdbã ne zabr sʋʋga. Yaa maam m yembr n põs n wa n na n togs-yã.»

¹⁶ Nin-kãng sẽn nan ket n gomda, ned a to n wa n yeel-a yaa: «Wẽnnaam bugum n yi yĩngr n sig n dɩ piisã ne tʋmtʋmdbã n sãam-ba. Yaa maam m yembr bal n põs n wa n na n togs-yã.»

¹⁷ Yẽnda soabã sẽn nan ket n gomda, a to n wa n yeel-a yaa: «Kalde rãmbã maana sul a tãab n wa ne tʋʋlem n wa yõg yʋgma wã, la b kʋ tʋmtʋmdbã ne zabr sʋʋga. Yaa maam m yembre bal n põs n wa n na n togs-yã.»

¹⁸ Yẽnda me sẽn ket n gomd yee, la ned a to sẽn wa n ta n yeel-a yaa: «Yãmb kom-dibli wã ne y kom-pugli wã fãa rag n bee b kẽem soabã zakẽ n dɩtẽ la b yũud reezẽ rãam,

¹⁹ la sob-kãseng n yi we-raoogã sẽnẽ n wa wẽ roogã kɩrems a naasã, tɩ roogã lʋɩ n bʋʋg kom-bɩɩsã, la b kiime. Yaa maam m yembr bal n põs n wa n na n togs-yã.»

²⁰ Dẽ, a Zoob yikame n pãrs a fuugu, la a põng a zugu, n lʋɩ tẽng n yĩgimdi,

²¹ n yeele: «Mam yi m ma pʋgẽ beelle, la mam na n leb n leba beelle. Sẽn-Ka-Saab n kõ, Sẽn-Ka-Saab n deege. Bɩ Sẽn-Ka-Saab yʋʋr paam pẽgre!»

²² Bõn-kãens fãa pʋga, a Zoob ka tol n maan yel-wẽnde, la a ka yeel tɩ Wẽnnaam maana bũmb sẽn ka zems ye.