A Zonaase 2 - WẼNNAAM SEBRE 2014

A Zonaas pʋʋsa Wẽnnaam

¹ Sẽn-Ka-Saab kɩtame tɩ zĩn-bedr wa vel a Zonaase. La yẽnda paa zĩnfã pʋgẽ dasem a tãabo.

² Dẽ, a Zonaas zĩnda zĩnfã pʋgẽ n pʋʋs Sẽn-Ka-Saab sẽn yaa yẽnda Wẽnnaamã n yeel yaa:

³ «Mam yel-pakrã pʋgẽ, mam kelem n boola Sẽn-Ka-Saabo, la bãmb leoka maam. Mam zĩnda kɩɩm-kulgu, n bool yãmb n kos tɩ y sõng-ma, la yãmb wʋma mam kosgã.

⁴ Yãmb loba maam zĩ-zulungẽ, ko-kãsengã sʋka, la ko-wĩis gũbga maam, tɩ ko-pɛmã ne ko-wĩisã wẽed maam.»

⁵ Mam da yeta m meng yaa: «Yãmb diga maam tɩ m zãag ne yãmba, la mam yaool n nongẽ lame n leb n yãnd y ro-sõngã.

⁶ Koomã lima maam zãnga, la ko-zulungã gũbga maam, la kʋɩl-moodã ra vila m zugã.

⁷ La mam sig n taa hal tãmsã yẽgẽ, la kɩɩm-kulg kʋɩlemsã ra paga maam wakat fãa yĩnga. Sẽn-Ka-Saab sẽn yaa mam Wẽnnaam, yãmb yiisa maam bog-zulungã pʋg vɩɩga.

⁸ La mam vɩɩmã sẽn wa n dat n sɛ wã wakate, mam pʋʋsa yãmb a Sẽn-Ka-Saabo, la mam pʋʋsgã zẽk n taa yãmb nengẽ, A ta y ro-sõngã pʋga.

⁹ Neb nins sẽn waoogd wẽn-naandsã sẽn ka tar yõodã, zãagda b mens ne yãmb zoodã.

¹⁰ La sã n yaa ne maam, mam na n maana maoong n kõ yãmba, la m pʋd bark pʋʋsg yɩɩl n waoog-yã. La m pids m pʋlengã m sẽn maanã. Bala, yaa yãmb a Sẽn-Ka-Saab n fãagde!»

¹¹ Dẽ, Sẽn-Ka-Saab goma ne zĩnfã t'a kẽng n tɩ wʋk a Zonaas kʋɩl-koakẽ wã.