A Zonaase 1 - WẼNNAAM SEBRE 2014

Wẽnnaam tʋma a Zonaas Niniiv tẽngã

¹ Daar a yembre, Sẽn-Ka-Saab yeela a Amitayi biig a Zonaas yaa:

² «Yik n kẽng Niniiv sẽn yaa tẽn-kãsengã pʋgẽ, n tɩ moon n yeel tẽngã nebã, tɩ b wẽnemã zẽk n taa maam.»

³ La a Zonaas yikame n na n zoe n kẽng Tarsɩɩse, sẽn na n yɩlẽ n zãag ne Sẽn-Ka-Saabo. La a sẽn ta Zafa tẽnga, a yãnda koom kogl-bedr sẽn dabd Tarsɩɩse, la yẽnda yaoome n kẽ n naag koom koglgã rãmba, n na n kẽng Tarsɩɩs n zãag ne Sẽn-Ka-Saabo.

⁴ La b sẽn wa n be ko-kãsengã zugu, Sẽn-Ka-Saab kɩtame tɩ sob-kãseng yik koomã zug n fugda, tɩ ko-pɛmã yikdẽ, hal tɩ koom koglgã rat n wã.

⁵ Dẽ, rabeem yõka kogl-rugsdbã, tɩ ned kam fãa kelemd n boond a wẽnde. La bãmb wʋka koglgã pʋgẽ teedã n lobd koomẽ wã, sẽn na n yɩlẽ tɩ koglgã lebg faasga. La rẽ t'a Zonaas ra yikame n sig koglgã tẽngr doogã n gãe n gõe n wẽed gũsum.

⁶ Dẽ, koom koglgã taoor soab kolga a Zonaas n sok-a yaa: «Yaa bõe tɩ f gãe n gõe? Fo me yik n bool f Wẽnnaamã, tɩ tõe tɩ b zoe d nimbãanega, tɩ d da ki ye.»

⁷ La koglgã pʋg nebã goma ne taab n yeel yaa: «Wa-y tɩ d maan poeer n bãng sẽn yaa ned ning yĩng la yel-kãngã paamd tõndo.» La bãmb maana poeere, la poeerã wilgame tɩ yaa a Zonaase.

⁸ Dẽ, bãmb yeela a Zonaas yaa: «Yaa fo yĩng la yel-kãngã sẽn paam tõndã. Dẽ wã, togs tõnd tʋʋmd ning fo sẽn tʋmde! Fo yita yɛɛnẽ? Fo yaa tẽn-bʋg neda? La fo yaa bu-bʋg neda?»

⁹ La a Zonaas leoka bãmb n yeel yaa: «Mam yaa Ebre buudã neda, la m pʋʋsda Sẽn-Ka-Saab sẽn yaa saasẽ Wẽnnaamã. Yaa bãmb n naan ko-kãsengã, la tẽn-gãongã.»

¹⁰ La rabeem-kãseng yõka neb nins sẽn dag n be koglgã pʋgã. Bala, a Zonaas ra yeela bãmb tɩ yẽnda zoetame n na n zãag ne Sẽn-Ka-Saabo. Dẽ, bãmb yeela a Zonaas yaa: «Yaa bõe tɩ fo maand a woto?»

¹¹ La bãmb leb n soka a Zonaas yaa: «Tõnd na n maana foom bõe n paam tɩ koomã sigi?» Bala, wakat-kãng tɩ ko-pɛmã rag n paamda pãng n paasdẽ.

¹² A Zonaas leok-b lame yaa: «Mam miime tɩ yaa mam yellã yĩng n kɩt tɩ sob-kẽen-kãngã lengd yãmba. Rẽ wã, bɩ y rɩk maam n lob ko-kãsengã pʋgẽ, la koomã na n sigame.»

¹³ Koom koglgã pʋg nebã rag n maoodame n dat n ta kʋɩl-koakã, la b ka tõog ye, ko-pɛmã sẽn dag n lengd bãmb wʋsg n yɩɩd pĩndã yĩnga.

¹⁴ Dẽ, bãmb yõka Sẽn-Ka-Saab sɛɛg n yeel yaa: «Tõnd kot-y lame tɩ y ra bas tɩ d ki nin-kãngã yellã yĩng ye. Da rɩk-y pʋ-peen-ned yell n dogl tõnd zug ye. Bala, yaa yãmb a Sẽn-Ka-Saab n maan y raabo.»

¹⁵ Dẽ, bãmb dɩka a Zonaas n lob koomẽ wã. La wakat-kãng bala, sob-kãsengã yõkame, tɩ ko-pɛmã sigi.

¹⁶ Woto, Sẽn-Ka-Saab rabeem kãseng yõk-b lame. Dẽ, bãmb maana maoong n kõ Sẽn-Ka-Saabo, la b maan pʋleng ne bãmba.