A Zã Sõng 7 - WẼNNAAM SEBRE 2014

A Zeezi ma-biis ka-tẽebo

¹ Rẽ poore, a Zeezi dag n saagda Galɩle, bala, b dag n ka rat n saag Zʋʋde ye. Bala, Zʋɩf-rãmbã dag n baooda bãmb n na n kʋ.

² Rẽ tɩ zãnã tigrã, sẽn yaa Zʋɩf-rãmbã tigr dag n kolgame.

³ A Zeezi ma-biisã yeela bãmb yaa: Yi ka n kẽng Zʋʋde tɩ f karen-biisã me paam n yãnd tʋʋm nins fo sẽn maandã.

⁴ Ned sã n dat tɩ nebã yãnd-a, a ka soosd n tʋmd a tʋʋmã ye. Fo sẽn maand bõn-kãensã, maan tɩ dũni neb bãng-fo.

⁵ Sɩda, a Zeezi ma-biisã me dag n ka tẽed bãmb ye.

⁶ A Zeezi yeela bãmb yaa: «Mam wakatã nan ka ta ye, la ne yãmba, wakat fãa zemsame.

⁷ Dũni wã ka tõe n kisg yãmb ye. B kisa maam, bala, mam kɩta kaset tɩ b tʋʋmã yaa wẽnse.

⁸ Kẽng-y tigrã. Mam nan ka na n kẽng tig‑kãngã ye, bala, mam wakatã nan ka pid ye.»

⁹ A Zeezi sẽn gom ne bãmb woto n sa, a Zeezi kell n paa Galɩle.

A Zeezi kẽnga zãnã tigrã

¹⁰ A Zeezi ma-bi-raopã sẽn kẽng tigrã, bãmb mengã me yaool n kẽngame. B soosame n kẽng tɩ nebã ka yã bãmb ye.

¹¹ Zʋɩf-rãmbã dag n baooda a Zeezi tigrã wakat n sokdẽ: «B bee yɛ?»

¹² La vũn-vũn n dag n be kʋʋngã sʋk wʋsg bãmb poorẽ. Neb kẽer yetame tɩ bãmb yaa nin-sõngo, tɩ kẽer yetẽ tɩ ayo, bãmb kẽesda nebã moogo.

¹³ Ned baa a yembr ka saagd n gom bãmb yellã vẽeneg ye, b sẽn zoet Zʋɩf-rãmbã yĩnga.

¹⁴ Tigrã rag n zoe n taa pʋɩ-sʋka, t'a Zeezi kẽng wẽnd doogẽ wã, n sɩng n zãmsd nebã.

¹⁵ Linga Zʋɩf-rãmbã, la b sokame yaa: «Yẽnda yɩɩ wãn n mi Wẽnnaam gʋls-sõamy wã n yaool n ka paam zãmsgo?»

¹⁶ A Zeezi leoka bãmb n yeele: «Zãmsg ning mam sẽn zãmsd nebã ka yit mam nengẽ ye, a yita sẽn tʋm-a maamã nengẽ.

¹⁷ Ned ning fãa sẽn dat n tũ Wẽnnaam daabã na bãng zãms-kãng sã n yita bãmb nengẽ, wall mam goamã sã n yita mam meng nengẽ.

¹⁸ Ned ning goam sẽn yit a meng nengẽ baooda a meng waoogre. La ned ning sẽn baood sẽn tʋm-a yẽnda wã waoogr yaa sɩd soaba, la ka-tɩrlem ka be yẽnda pʋgẽ ye.

¹⁹ A Moyiis ka kõ yãmb tõogã sɩda? La yãmb ned baa a yembr ka maand tõogã sẽn yetã ye. Yaa bõe tɩ yãmb baood n na n kʋ maam?»

²⁰ Neb kʋʋngã leokame: «Zĩn n tar yãmba, ãnda n baood n na n kʋ yãmba?»

²¹ A Zeezi leoka bãmb n yeele: Mam tʋma tʋʋmd a yembre, la a yɛɛsa yãmb fãa.

²² A Moyiis n yeel yãmb tɩ y kẽes kom-dibli wã bãongo (bãongã ka sɩng ne a Moyiis ye. Yaa yaab-rãmbã n sɩng-a), la yãmb kẽesda kambã bãongo, baa ne vʋʋsg daare.

²³ Yãmb sã n tõe n kẽes ned bãong vʋʋsg daare, n ka kɩɩs a Moyiis tõogã, bõe tɩ yãmb sũyã yĩigd ne maam, mam sẽn kõ yĩn-tõr laafɩ vʋʋsg daarã yĩnga?

²⁴ Da bʋ-y bʋʋdã tɩ zems ne nin sẽn yãtã ya, bʋ-y bʋ-tɩrga.

Dẽ yĩnga, a Zeezi yaa Kirisã?

²⁵ Zeruzalɛm neb kẽer yeelame yaa: Ka rao‑kãngã la b sẽn baood n na n kʋ wã wɛ?

²⁶ Ad a sẽn yɛs nebã sʋk n gomd tɩ b ka yet-a tɩ bũmbu! Rẽ yĩnga, kãsem-dãmbã sɩd reegame tɩ yaa bãmb la Kirisã la?

²⁷ Tõnd yaool n mii rao‑kãngã sẽn yitẽ. La Kiris sã n wa, ned baa a yembr ka na n bãng b sẽn yitẽ ye.

²⁸ Dẽ, a Zeezi zẽka b koɛɛg wakat ning b sẽn zãmsd nebã wẽnd doogẽ wã n yeele: Yãmb mii maam, la y mii mam sẽn yitẽ. Baoosgo, mam ka wa m toor ye. La sẽn tʋm-a maamã yaa sɩd soaba, la yãmb ka mi-b ye.

²⁹ Mam mii bãmba, bala, yaa bãmb yʋʋr yĩng la mam sẽn be ka wã, la yaa bãmb n tʋm maam.

³⁰ Nebã da rat n yõka a Zeezi, la ned baa a yembr ka sɩɩs bãmb ye, bãmb wakatã sẽn dag n nan ka ta wã yĩnga.

³¹ Neb kʋʋngã sʋka, wʋsg tẽe a Zeezi n yetẽ: Dẽ yĩnga, Kiris sã n wa, b na n maana bõn-bãn n yɩɩd dao kãngã sẽn maandã sɩda?

B tʋma gũudb a Zeezi nengẽ

³² Fariizẽ-dãmbã wʋma neb kʋʋngã sẽn dag n gomd a Zeezi yell vũn-vũnã. Dẽ, maan-kʋʋdbã kãsem-dãmba ne Fariizẽ-dãmbã tʋma gũudb tɩ b tɩ yõk a Zeezi.

³³ A Zeezi yeel-b lame yaa: Mam ket n bee ne yãmb wakat bilf yĩng bala, la m na n leba sẽn tʋm-a maamã nengẽ.

³⁴ Yãmb na n baoo maam, la y ka na n yãnd maam ye, la mam sẽn na n zĩnd zĩig ningã, yãmb ka tõe n wa be ye.

³⁵ Zʋɩf-rãmbã goma ne taab n yeele: A na n kẽe yɛ tɩ tõnd da yãnd-a? A na n kẽnga Zʋɩf-rãmb nins sẽn sãeeg n be Gɛrk-rãmbã sʋka nengẽ n tɩ zãms Gɛrk-rãmbã bi?

³⁶ A sẽn yeel tɩ tõnd na n bao-a lame n ka yã, la tɩ tõnd ka tõe n wa zĩig ning a sẽn na n zĩndẽ wã, gom‑kãng võor yaa bõe?

Kʋɩls koom sẽn kõt vɩɩm

³⁷ Tigrã yaoolem daare, daar ning sẽn yaa-a kãseng n yɩɩdã, a Zeezi yalsa yĩngr n zẽk b koɛɛg n yeele: Bɩ Ko-yũud sẽn tar ned ning wa mam nengẽ n yũ.

³⁸ Kʋɩlse, b koom sẽn kõt vɩɩm na n yii ned ning sẽn tẽed maamã pʋgẽ, wa Wẽnnaam gʋls-sõamyã sẽn yetã.

³⁹ A Zeezi dag n goma Sɩɩg-sõngã neb nins sẽn tẽed bãmbã sẽn na n deegã yelle. Bala, b dag n nan ka kõ nebã Sɩɩg-sõngã ye, a Zeezi sẽn dag n nan ka paam waoogrã yĩnga.

Welgr kẽe nebã sʋka

⁴⁰ Nebã sẽn wʋm gom-kãensã, neb n zĩnd kʋʋngã sʋk n yeel tɩ dao‑kãngã sɩd yaa Wẽnnaam no-rɛɛsa.

⁴¹ Kẽer da yetame tɩ dao-kãngã yaa Kirisã. La neb a taab yetame yaa: Dẽ yĩnga, sɩd yaa Galɩle la Kirisã tog n yi sɩda?

⁴² Wẽnnaam gʋls-sõamyã ka yeel tɩ «Kirisã na n yɩɩ a Davɩɩd yagenga, n dog Betlehɛm sẽn yaa a Davɩɩd tẽngã» sɩda?

⁴³ Dẽ, welgr zĩnda nebã sʋk a Zeezi poorẽ.

⁴⁴ Neb kẽer bãmb sʋk dag n dat n yõka a Zeezi, la ned baa a yembr ka sɩɩs bãmb ye.

Ned nan ka gom wa rao-kãngã ye

⁴⁵ Gũudbã leba maan-kʋʋdbã kãsem-dãmbã ne Fariizẽ-dãmbã nengẽ, la b sok-b lame tɩ yaa bõe tɩ b ka tall a Zeezi n wa?

⁴⁶ Gũudbã leokame n yeele: Ned nan ka gom wa rao-kãngã ye.

⁴⁷ Tɩ Fariizẽ-dãmbã leb n sok-ba: «A tõog n belga yãmb me n tõog la?

⁴⁸ Dẽ yĩnga, naab bɩ Fariizẽ baa a yembr tãa beeme n tẽ bãmb sɩda?

⁴⁹ Sã n yaa neb kʋʋngã sẽn ka mi tõogã, b yaa neb kãab-wẽng sẽn be b zutu.»

⁵⁰ Bãmb ned a yembre, a Nikodɛm, sẽn dag n wa-a a Zeezi nengẽ pĩndã yeel-b lame yaa:

⁵¹ «Dẽ yĩnga, tõnd tõodã kaooda ned bʋʋd tɩ d ka reng n kelg a soaba, la d bãng bũmb ning a sẽn maanã sɩda?»

⁵² B leoka yẽnda n yeele: «Fo me yaa Galɩle ned la? Vɛɛs sõama n gese, la f na yãnd tɩ Wẽnnaam no-rɛɛs ka yit Galɩle ye.»

⁵³ [Rẽ poore, ned fãa kuila a yiri.