A Zã Sõng 3 - WẼNNAAM SEBRE 2014

A Zeezi ne a Nikodɛm

¹ Rao a yembr n dag n be Fariizẽ-dãmbã sʋka, n ya Zʋɩf-rãmbã naaba, t'a yʋʋr boondẽ t'a Nikodɛm.

² Yẽnda waa a Zeezi nengẽ ne yʋng n yeel-b yaa: Karen-saamba, tõnd miime tɩ yãmb yaa karen-saamb Wẽnnaam sẽn tʋme. Bala, ned ka tõe n maan bõn-bãn nins yãmb sẽn maandã, tɩ sã n ka Wẽnnaam n be ne-a ye.

³ A Zeezi leok-a lame n yeele: «Mam yeta foom sɩd-sɩd tɩ ned sã n ka leb n dog yɛsa, a ka tõe n yãnd Wẽnnaam soolmã ye.»

⁴ A Nikodɛm yeela bãmba: «Ned sẽn kʋʋl na n yɩɩ a wãn n leb n doge? A tõe n leb n kẽe a ma pʋgẽ yɛs n dog sɩda?»

⁵ A Zeezi leoka yẽnda n yeele: «Mam yeta foom sɩd-sɩd tɩ ned sã n ka rog ne koom la ne Sɩɩg-sõngo, a ka tõe n kẽ Wẽnnaam soolmẽ wã ye.

⁶ Bũmb ning yĩng sẽn dog yaa yĩnga, la bũmb ning Sɩɩg-sõng sẽn dog yaa sɩɩga.

⁷ Da sak tɩ mam sẽn yeel tɩ fo tog n leb n dogame wã yɛɛs foom ye.

⁸ Sobg fugd n teesd a sẽn datẽ. Fo wʋmda a rãamdã, la fo ka mi a sẽn yitẽ, la a sẽn dabdẽ me ye. Yaa woto me ne ned ning Sɩɩg-sõng sẽn doge.»

⁹ A Nikodɛm leb n gomame n yeele: «Bõn-kãng tõe n maana wãn n yɩ?»

¹⁰ A Zeezi leoka yẽnda: «Fo yaa Israyɛll karen-saam-kãsenga, n yaool n ka mi rẽnda?

¹¹ Mam yeta foom sɩd-sɩda, tɩ tõnd yeta d sẽn mi, la tõnd kɩta bũmb nins d sẽn yã wã kaseto, la yãmb ka tẽ tõnd kasetã ye.

¹² Mam sã n gom ne yãmb dũni bũmb yɛl tɩ yãmb ka tẽeda, yãmb na n yɩɩ a wãn n tẽ, mam sã n gom ne yãmb saasẽ yɛl yelle?

¹³ Ned baa a yembr ka rʋ saasẽ ye, sã n ka sẽn yi-a arzãn n wa wã: ‹yaa Ninsaal Bi-riblã.›

¹⁴ A wa a Moyiis sẽn zẽk zũud waafã we-rasempʋɩɩgẽ woto me yaa tɩlɛ tɩ b zẽk Ninsaal Bi-riblã,

¹⁵ tɩ ned ning fãa sẽn tẽed‑b bãmb na paam vɩɩm sẽn kõn sa.

¹⁶ Bala, Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.

¹⁷ Sɩd me, Wẽnnaam ka tʋm b Bi-riblã dũniyã zug tɩ b kao ninsaalbã bʋʋd ye, la yaa tɩ nebã na paam fãagr bãmb maasem yĩnga.

¹⁸ B ka na n kao ned ning sẽn tẽedã bʋʋd ye. La ned ning sẽn ka tẽedã, buud zoe kaoome, a sẽn ka tẽ Wẽnnaam Bi-ribl yendã yʋʋr yĩngã.

¹⁹ Bũmb ning sẽn wat ne bʋʋdã la a woto: vẽenem waa dũniyã zugu, la ninsaalbã nonga likã n yɩɩd vẽenemã, b tʋʋmã sẽn yaa wẽnsã yĩnga.

²⁰ Bala, ned ning fãa sẽn maand wẽng kisa vẽenem, n ka wat vẽenemẽ ye, t'a tʋʋm-wẽnsã na n wa puki.

²¹ La ned ning sẽn maand sɩd wata vẽenemẽ, tɩ nebã tõe n bãng t'a tʋʋmã tʋmda Wẽnnaam sakr pʋgẽ.»

A Zeezi ne a Zã

²² Dẽ poore, a Zeezi kẽnga Zʋʋde soolmẽ ne b karen-biisã, n pa be rasem bilf ne bãmba, la b lisd nebã.

²³ A Zã me dag n bee Eno, zĩig sẽn pẽ ne Salim n lisd nebã, bala, koom dag n bee be wʋsgo. Nebã dag n kẽnda be t'a lisd-ba.

²⁴ Bala, b dag nan ka sui a Zã bi-bees roogẽ ye.

²⁵ La a Zã karen-biis kẽer wẽe no-koeemd ne Zʋɩf a yembre, yɩlg-m-mengã poorẽ.

²⁶ Dẽ, bãmb kẽnga a Zã nengẽ n tɩ yeel-a: «Karen-saamba, ned ning sẽn dag n be ne yãmb Zʋrdẽ rʋʋndã, tɩ yãmb kɩs a kasetã, ad a lisda nebã, la nebã fãa dabda a nengẽ.»

²⁷ A Zã leokame n yeele: «Ninsaal ka tõe n deeg bũmb baa fʋɩ, tɩ sã n ka sẽn yi arzãnã n kõ-a ye.

²⁸ Yãmb mens yaa kaset dãmb tɩ mam yeelame tɩ mam ka Kirisã ye, la tɩ yaa bãmb n tʋm maam tɩ m deng b taoore.

²⁹ Yaa pag sɩd n so-a. La pʋg-sɩdã zoa bee ne-a n kelgd-a, la a sã n wʋm pʋg-sɩdã koɛɛga, a sũur yaa noogo. Sũ-no-kãng sẽn yaa mam dẽndã pida zãnga.

³⁰ Yaa tɩlay tɩ Bãmb tʋʋmdã lebgd kãseng n paasdẽ, tɩ mam dẽndã tar boogre.»

Kaset soab sẽn yit yĩngri

³¹ Sẽn yi-a yĩngr n wa wã yɩɩda nebã fãa. Sẽn yaa-a tẽng zug ka ned yaa tẽng bũmbu, la a gomda tẽng bũmb yɛla. Sẽn yi-a arzãnã yɩɩda nebã fãa.

³² Bãmb togsda bũmb nins b sẽn yã la b wʋme, la ned baa a yembr ka tẽed bãmb kasetã ye.

³³ Ned sã n deeg bãmb kasetã, a soabã wilgdame tɩ Wẽnnaam yaa sɩd soaba.

³⁴ Soab ning Wẽnnaam sẽn tʋmã togsda Wẽnnaam goamã, bala, Wẽnnaam kõta a soab bãmb Sɩɩgã tɩ seke.

³⁵ Ba wã nonga Bi-riblã, n dɩk bũmba fãa n ning a nugẽ.

³⁶ Ned ning sẽn tẽed-a Bi-riblã tara vɩɩm sẽn kõn sa. La ned ning sẽn kɩɩsd-a Bi-riblã kõn paam vɩ-kãng ye, la Wẽnnaam sũ-puugrã na n ta-a lame.