A Zã Sõng 21 - WẼNNAAM SEBRE 2014

A Zeezi puka b meng ne b karen-biis a yopoe

¹ Rẽ zugẽ, a Zeezi puka b meng ne karen-biisã Tiberyaad ko-kãsengã noore. Ad b sẽn puk b meng to-to:

² A Zeezi karen-biisã rag n bee ne taaba: A Sɩmo Pɩyɛɛr ne a Toma b sẽn boond tɩ Didim, la a Natanayɛll sẽn yit Galɩle Kana wã, la a Zebde kom-dibli wã ne a Zeezi karen-biis a taab a yiibu.

³ A Sɩmo Pɩyɛɛr yeelame: «Mam na n tɩ yõga zĩma!» la neb a taabã yeel-a lame: «Tõnd me na n tũu foom.» B yiime n tɩ kẽ koom koglgẽ. La yʋn-kãnga, b ka yõk bũmb ye.

⁴ Zĩigã sẽn wa n yẽegdẽ, a Zeezi dag n bee kʋɩl-koakẽ wã, la karen-biisã dag n ka mi tɩ yaa a Zeezi ye.

⁵ A Zeezi yeel-b lame yaa: «M kamba, yãmb ka tar sẽn na rɩ la?» B leoka a Zeezi tɩ ayo.

⁶ A Zeezi yeel-b lame yaa: «Lob-y zĩm-gãmbrã koglgã rɩtgo, la y na n paamame.» Dẽ, b loba zĩm-gãmbrã, la b dag n ka leb n tõe n tak-a ye, zĩmã waooglem yĩnga.

⁷ Dẽ, karen-biig ning a Zeezi sẽn dag n nongã yeela a Pɩyɛɛr yaa: «Yaa Zu-soabã!» A Sɩmo sẽn wʋm tɩ yaa Zu-soaba yee, la a sẽn yeelg a fuugu, bala, a dag n yaa beelle, la a yɩk n lʋɩ koomẽ wã.

⁸ Karen-biis a taabã taee zĩm-gãmbrã sẽn pid ne zĩmã ne koom-koglgã n wa, bala, b ne tẽngã dag n ka yɩɩd nao-yakem koabg la pis-nu ye.

⁹ Bãmb sẽn yi koomẽ wã n ta tẽnga, bãmb yãnda bug-saal sẽn wit tɩ zĩm be a zugu, n paas buri.

¹⁰ A Zeezi yeel-b lame tɩ b wa ne zĩmã b sẽn yõg paalmã.

¹¹ A Sɩmo Pɩyɛɛr kẽe koom koglgẽ wã n vuug zĩm-gãmbrã n yiisi, la a dag n pida ne zĩm-bɛd koabg la pis-nu la a tãabo. La baa ne zĩmã sẽn dag n waoog a woto wã, zĩm-gãmbrã ka kẽeg ye.

¹² A Zeezi yeel-b lame: Wa n dɩ-y-yã. La karen-biisã ned baa a yembr ka saag n sok bãmb b sẽn yaa a soab ye, bala, b dag n miime tɩ yaa Zu-soabã.

¹³ A Zeezi kolgame n dɩk burã n kõ-ba, la b kõ-b zĩmã me.

¹⁴ A Zeezi sẽn vʋʋg n yi kũum sʋkã tɛka, naoor a tãab moasã la b puk b meng ne b karen-biisã.

A Zeezi ne a Pɩyɛɛre

¹⁵ Bãmb sẽn dɩ n sa, a Zeezi yeela a Sɩmo Pɩyɛɛr yaa: «Zã biig a Sɩmo, dẽ yĩnga fo nonga maam n yɩɩd bãmbã sẽn nong maamã bɩ?» A leoka bãmb yaa: «N-yẽe, Zu-soaba! Yãmb miime tɩ mam nonga yãmba.» A Zeezi yeel-a lame yaa: «Ges mam pe-bi wã yelle.»

¹⁶ B leb n yeel-a-la naoor a yiib soab yaa: «A Zã biig a Sɩmo, dẽ yĩnga, fo nonga maam?» A Pɩyɛɛr leoka bãmb n yeele: «N-yẽe, Zu-soaba! Yãmb yẽ mi tɩ mam nonga yãmba.» A Zeezi yeel-a lame yaa: «Yɩ mam piisã pe-kɩɩma.»

¹⁷ B yeela yẽnda naoor a tãab soab yaa: «Zã biig a Sɩmo, dẽ yĩnga fo nonga maam?» A Pɩyɛɛr sũur sãamame, a Zeezi sẽn sok yẽnda naoor a tãab moasã tɩ rẽnda yĩnga yẽnda nonga bãmbã yĩnga. La a leoka bãmb n yeele: «Zu-soaba, yãmb mii bũmb fãa. Yãmb miime tɩ mam nonga yãmba.» A Zeezi yeel-a lame yaa: «Ges m piisã yelle.»

¹⁸ Sɩd-sɩdã, mam yeta foom tɩ fo sẽn dag n yaa bi-bɩɩga, fo dag n sẽbgda f sɛɛg sẽbdga, n dabd f sẽn datẽ. La fo sã n wa n kʋʋle, fo na n zẽka f bãgdo, tɩ ned a to sẽb foom f sẽbdgã, n tall foom n kẽng f sẽn ka ratẽ ye.

¹⁹ A Zeezi goma a woto n na n wilg kũum ning buud a Pɩyɛɛr sẽn na n ki n kõ Wẽnnaam waoogrã. A Zeezi sẽn gom a woto n sa, b yeel-a lame yaa: «Wa n tũ maam!»

A Zeezi ne b karen-bi-nongre

²⁰ A Pɩyɛɛr wẽnegame n yãnd karen-biig ning a Zeezi sẽn nongã t'a wat bãmb nengẽ. Yaa soab‑kãng n kɩll a Zeezi yãoogẽ wã rɩɩbã wakat n sok bãmb tɩ: Zu-soaba, yaa ãnda n na n zãmb yãmb n yõk n kõ wã?

²¹ A Pɩyɛɛr sẽn yã yẽnda wã, a soka a Zeezi yaa: «Zu-soaba, la bõe n na n paam rao-kãngã?»

²² A Zeezi yeel-a lame yaa: Mam sã n dat t'a vɩɩmd hal tɩ mam wa, bʋg n pak foom? Fo yẽ we n wa n tũ maam.

²³ Gom-kãng zugẽ, gomd n saag ba-biisã sʋk n yetẽ tɩ karen-bi-kãng ka na n ki ye. A Zeezi yaool n ka yeel t'a ka na n ki ye. B yeelame tɩ bãmb sã n dat t'a vɩɩmd hal tɩ bãmb wa, bʋg n pak a Pɩyɛɛre?

²⁴ Yaa karen-bi-kãng n kɩt bõn-kãens kaseto, la a gʋls-ba. La tõnd miime t'a kasetã yaa sɩda.

²⁵ A Zeezi maana bũmb wʋsg a taaba. Ned sã n dag n na n gʋlsẽ yɛla fãa yembr-yembre, mam ka tẽed tɩ dũniyã na n yã weer n tõog n deeg sɛbã b sẽn na n gʋlsã ye.