A Zã Sõng 2 - WẼNNAAM SEBRE 2014

Yi-kãadem sẽn zĩnd Kana

¹ Dasem a tãab rẽnda zugẽ, yi-kãadem n zĩnd Galɩle Kana. A Zeezi ma rag n bee be.

² La b boola a Zeezi me ne b karen-biisã tɩ b wa yi-kãadmã.

³ La reezẽ rãamã sẽn paooge, a Zeezi ma wã yeela lame: «Nebã ka leb n tar reezẽ rãam ye.»

⁴ A Zeezi leoka lame: «Paga, bõe n be maam ne fo sʋka? Mam wakatã nan ka ta ye.»

⁵ Bãmb ma wã yeela tʋmtʋmdbã tɩ b maan bũmb ning fãa a Zeezi sẽn na n yeel-b tɩ b maane.

⁶ Sĩms a yoob sẽn pees ne kug n dag n be be, tɩ b ningd koom tɩ Zʋɩf-rãmbã tar n yɩlgd‑b mens wa sẽn zems bãmb miningu, la a yembr fãa tõe n deega ko-yʋy a naas bɩ a nu koom.

⁷ A Zeezi yeel-b lame tɩ b pids sĩmsã ne koom, la b pids-b la pal-pale.

⁸ La a Zeezi yeel-b lame: «Toog‑y moasã n tɩ kõ ned ning sẽn get-a rɩɩbã pʋɩɩb yellã.» La b tallame n tɩ kɩs-a.

⁹ Sẽn get-a rɩɩbã pʋɩɩb yellã fʋrga koomã sẽn tedg n lebg reezẽ rãamã. Yẽnda rag n ka mi reezẽ‑rã‑kãng sẽn yitẽ ye, la tʋmtʋmdb nins sẽn wi-b koomã rag n miime.

¹⁰ A boola pʋg-paalã sɩd n yeel-a: «Ned fãa rengd n kõo nebã reezẽ rã‑sõngã, tɩ nebã nens sã n wa n yuusdẽ, bɩ a yaool n kõ-b reezẽ rãam ning sẽn ka-a sõama zãngã. La foom, fo bĩnga reezẽ rã‑sõngã hal tɩ ta moasã.»

¹¹ Bõn-bãnã a Zeezi sẽn maanã sɩnga a woto Galɩle Kana. Bãmb wilga b ziiri, la bãmb karen-biisã tẽe bãmba.

¹² Rẽ poore, bãmb kẽnga Kapɛrnaom ne b ma wã, la b ma-bi-raopã, ne b karen-biisã, tɩ b tɩ zĩnd be rasem bilf bala.

A Zeezi riga koaasdb wẽnd doogẽ wã

¹³ Zʋɩf-rãmbã Pakã tigr dag n kolgame, la a Zeezi kẽnga Zeruzalɛm.

¹⁴ Bãmb tɩ yãame tɩ neb n dag n zĩ wẽnd doogã zakẽ n koosd niigi, piisi, la manwalla.

¹⁵ A Zeezi rɩka wĩy n kal n maan kaase, n dig bãmb fãa tɩ b yi wẽnd doogã zakẽ, la b riga piisã ne niigã, la b sãeeg ligd tɛkdbã ligdi, la b leeb taabl-dãmbã,

¹⁶ la b yeel man-wal koaasdbã yaa: «Yiis-y yõwã kaanẽ. Da rɩk-y mam ba wã roog tɩ yɩ leebg zĩig ye.»

¹⁷ Bãmb karen-biisã tẽegame t'a gʋlsame: «Yãmb roogã nonglem na n sooga maam zãnga.»

¹⁸ Zʋɩf-rãmbã goma ne a Zeezi n yeele: «Bõe bãnd la yãmb na n wilg tõndo, n wilg tɩ yãmb tara noor tɩ maan bõn-kãnga?»

¹⁹ A Zeezi leoka bãmb n yeele: «Sãam-y wẽnd do-kãngã, la rasem a tãab pʋgẽ, mam na lebs-a n me.»

²⁰ Dẽ, Zʋɩf-rãmbã yeela bãmb yaa: Yaa yʋʋm pis-naas la a yoob pʋgẽ la b rɩk n tõog n me wẽnd do-kãngã n sa, tɩ fo na n wa n lebs-a n me rasem a tãab pʋgẽ?

²¹ La a Zeezi dag n gomda b yĩngã sẽn yaa wẽnd doogã yelle.

²² Bãmb sẽn wa n vʋʋg n bas kũumã, b karen-biisã tẽegame t'a Zeezi dag n yeela a woto, la b tẽe Wẽnnaam gʋls-sõamyã ne gomd ning a Zeezi sẽn dag n gomã.

A Zeezi mii nebã fãa

²³ Bãmb sẽn dag n be Zeruzalɛm Pakã tigrã wakatã, neb wʋsg tẽe bãmb yʋʋrã, b sẽn yã bãnã bãmb sẽn dag n maandã yĩnga,

²⁴ la sã n yaa ne a Zeezi, bãmb ka bas yard ne-b ye. Bala, bãmb dag n mi-b-la fãa,

²⁵ la bãmb dag n ka baood tɩ ned kɩs a to kaset ye, bala, bãmb mengã mii bũmb ning sẽn be ninsaal pʋgẽ.