A Zã Sõng 19 - WẼNNAAM SEBRE 2014

¹ Dẽ, a Pilat kɩtame tɩ b tall a Zeezi n tɩ pãb-b ne kalwaase.

² Sodaasã wʋga maanf ne gõos n fõgen a Zeezi zugu, la b yeelg bãmb ne fu-bed-miuugu,

³ n yaool n kolg bãmb n yetẽ yaa: «Zʋɩf-rãmbã-rĩma, tõnd pʋʋsda yãmba». La b dag n laanda bãmb pegse. Gõos maanfo.

⁴ A Pilate leb n yiime n yeel Zʋɩf-rãmbã yaa: «Ade, mam yiisda raoã yɩnga, tɩ yãmb na bãng tɩ mam ka yã bũmb baa a yembr ne-a sẽn sekd m na yeel t'a toga kʋʋb ye.»

⁵ Dẽ, a Zeezi yii yɩng ne gõos maanfã, la fu-bed-miuugã, la a Pilat yeela nebã yaa: «Ad dao wã!»

⁶ Maan-kʋʋdbã kãsem-dãmbã ne gũudbã sẽn yã a Zeezi wã, b kaasame n yeele: «Ka-a da-pɩk zugu! Ka-a da-pɩk zugu.» A Pilat yeel-b lame yaa: «Deeg-y-yã-a n ka-a y toore, bala, mam ka yã bũmb ne-a sẽn sek m na yeel t'a toga kʋʋb ye.»

⁷ Zʋɩf-rãmbã leoka a Pilat n yeele: «Tõnd tara tõogo, la ne tõogã, a segda kʋʋbo, bala, a maana a meng Wẽnnaam Bi-ribla.»

⁸ A Pilat sẽn wʋm gom-kãnga, a rabeemã paasame.

⁹ A leb n kẽe zakẽ wã n sok a Zeezi tɩ b yaa yɛ neda? La a Zeezi ka leok-a ye. Dẽ, a Pilat yeela bãmb yaa:

¹⁰ Maam la fo sĩnd n ka gomd ne? Fo ka mi tɩ mam tara noor tɩ kɩt tɩ b bas foom, la m tar noor tɩ kɩt tɩ b ka foom da-pɩk zug la?

¹¹ A Zeezi leokame n yeele: «Yãmb sã n dag n ka reegẽ noor yĩngi, yãmb ka tar noor tɩ maan maam baa fɩ. Rẽnda n kɩt tɩ ned ning sẽn tall maam n wa n kõ yãmbã yel-wẽnd yɩɩd yãmb dẽndã.»

¹² Sẽn sɩng ne wakat-kãnga, a Pilat baoome n na n bas a Zeezi. La Zʋɩf-rãmbã kaasame n yeele: «Yãmb sã n bas rao‑kãngã, rẽnd yãmb ka Sezaar zoa ye. Ned ning fãa sẽn maand a meng rĩm wilgdame t'a kisa Sezaare.»

¹³ A Pilat sẽn wʋm gom-kãensã, a talla a Zeezi n yi yɩnga, n zĩnd bʋʋdã zĩigẽ, b sẽn boond tɩ kug sẽn gãneg zĩiga, la ne Ebre goamã yaa Gabata.

¹⁴ Dag n yaa Pakã tigr seglg daare, sẽn kolg wĩnto-sʋka. A Pilat yeela Zʋɩf-rãmbã yaa: «Ad-y y rĩma!»

¹⁵ La b kaasame n yeele: «Kʋ-y-yã-a! Kʋ-y-yã-a! Ka-y-yã-a da-pɩk zugu!» A Pilat yeel-b lame yaa: «M ka y rĩmã da-pɩk zugu?» Maan-kʋʋdbã kãsem-dãmb leokame n yeele: «Tõnd ka tar dĩm a to, tɩ ka Sezaar ye.»

¹⁶ Dẽ, a Pilat kõ-b-la a Zeezi tɩ b tɩ ka da-pɩk zugu. La bãmb talla a Zeezi n looge.

B kaa a Zeezi da-pɩk zugu

¹⁷ A Zeezi meng n tʋk b ra-pɩkã n yi tẽngã, n tees zĩig ning b sẽn boond tɩ zu-wang zĩigã, la Golgota ne Ebre goamã.

¹⁸ Yaa be la b ka a Zeezi ne neb a yiib a taaba, da-pɩgs zutu, a yembr goabga la a yembr dɩtgo, t'a Zeezi be sʋka.

¹⁹ A Pilat gʋlsa ra-peok zug n tabl da-pɩkã. A gʋlsa be tɩ: «Nazarɛt dao a Zeezi, Zʋɩf-rãmbã rĩma.»

²⁰ Zʋɩf-rãmbã wʋsg karma gʋlsmã, bala, zĩig ning b sẽn ka a Zeezi da-pɩk zugã pẽe ne tẽngã. B rag n gʋlsa gomdã ne Ebre, la Latẽ, la Gɛrk.

²¹ Maan-kʋʋdbã kãsem-dãmbã yeela a Pilat yaa: «Da gʋls-y tɩ Zʋɩf-rãmbã dĩm ye, gʋls-y t'a yeelame t'a yaa Zʋɩf-rãmbã dĩma.»

²² A Pilat leokame n yeele: «Mam sẽn gʋlsã, m gʋlsame.»

²³ Sodaasã sẽn ka a Zeezi n sa, b wʋka bãmb futã n pʋɩ zĩis a naase, tɩ sodaag fãa dɩk pʋɩɩr a yembre. B rɩka a Zeezi fu-wokã me. A ka tar sẽnesem ye, yaa peen‑yend bala, yĩngr tɩ ta tẽngre. B goma ne taab n yeele:

²⁴ Wa-y tɩ d da pãrs fuugã ye. D maan bãnde, tɩ bãndã wilg ned ning sẽn na n soog-a fuugã. Yɩɩ woto tɩ Wẽnnaam gʋls-sõngã pidsi. A yeelame: «B pʋɩɩ mam futã ne taaba, la b maana bãnd mam fu-wokã yĩnga.» Ad bũmb ning sodaasã sẽn maanã.

²⁵ A Zeezi ma wã ne a ma-bi-poaka, a Kolopaas pag a Maari ne a Maari Madelɛn dag n yɛsa da-pɩkã sɛɛgẽ.

²⁶ A Zeezi sẽn yã b ma wã, la karen-biig ning bãmb sẽn nongã, t'a yɛs b ma wã sɛɛgẽ, b yeela b ma yaa: «Paga, ad f bi-ribla.»

²⁷ La b yeela karen-biigã yaa: «Ad f ma.» La sẽn sɩng ne wakat-kãnga, karen-biigã deega a Zeezi ma wã a zakẽ.

A Zeezi kũum

²⁸ Dẽ poore, a Zeezi sẽn mi tɩ bũmb fãa zoe n maan n saame wã, sẽn na n yɩlẽ tɩ gʋlsg sõmyã paam pidsgu, b yeelame: «ko-yũud n tar maam.»

²⁹ Laok n dag n dɩg be n pid ne reezẽ rã‑miisga. B rɩka neoodg n los reezẽ rã‑miisgẽ wã, n vil kãnkãre, n zẽk n tees a Zeezi noorã.

³⁰ La a Zeezi sẽn fõos reezẽ rã-miisgã n sa, b yeelame yaa: «Bũmb fãa maan n saame.» La b sulga b zugu, la b kiime.

B kõsa a Zeezi lʋgre

³¹ Dag n yaa Pakã tigr seglg daare. La Zʋɩf-rãmbã sẽn ka rat n bas nebã tɩ b pa ra-pɩgsã zut bãmb vʋʋsg daarã yĩnga, ‹Vʋʋsg da-kãng dag n yaa da-kãsenga,› b kosa a Pilat t'a kɩt tɩ b kao b gɛy wã la b sigs-ba.

³² Dẽ, sodaasã waame, n kao pipi ned ning sẽn dag n ka da-pɩk zug a Zeezi sɛɛgẽ wã gɛyã, la b kao ned a to wã me gɛya.

³³ B sẽn ta a Zeezi, n mik tɩ b zoe n kiime wã, b ka kao bãmb gɛyã ye.

³⁴ La sodaag a yembr kõsa bãmb lʋgr ne kãnde, la tao-tao bala, koom ne zɩɩm n yi be.

³⁵ Ned ning sẽn yã bõn-kãngã kɩsa a kaseto, la a kasetã yaa sɩda. La a miime t'a togsa sɩda, tɩ yãmb me na tẽ.

³⁶ Yɩɩ woto tɩ Wẽnnaam gʋls-sõngã pidsi. A yeelame yaa: «Bãmb kõbr baa a yembr ka na n kaoog ye.»

³⁷ Wẽnnaam gʋls-sõngã yeela zĩig a to yaa: «Bãmb na n gesa ned ning bãmb sẽn dag n kõsã.»

A Zeezi mumbu

³⁸ Rẽ poore, Arimate dao a Zozɛf sẽn dag n soos n yaa a Zeezi karen-biiga, a sẽn zoet Zʋɩf-rãmbã yĩngã kosa a Pilat noor n na n dɩk a Zeezi kũumã. La a Pilat kõ-a-la noore. Dẽ, a waa n sika kũumã n tall n looge.

³⁹ A Nikodɛm, sẽn dag n wa-a a Zeezi nengẽ ne yʋngã me talla miir ne alowɛs sẽn kalem taaba, sẽn tar yũ-noogo, sẽn tat kɩlo pis-naas la a nu n wa.

⁴⁰ Dẽ, b rɩka a Zeezi kũumã, n ning-a tɩdarã, n vil ne pɛɛla, wa sẽn zems Zʋɩf-rãmbã sẽn minim n mumd kũum to-to wã.

⁴¹ La tɩɩs zĩig n dag n be zĩig ning b sẽn ka a Zeezi da-pɩkã zugã, la zĩigã pʋgẽ, yao-paall n dag n be beenẽ b sẽn da nan ka mum ned a pʋgẽ ye.

⁴² Yɩɩ be la b mum a Zeezi kũumã, Zʋɩf-rãmbã seglg yĩnga, bala, yaoogã rag n pẽeme.