A Zã Sõng 18 - WẼNNAAM SEBRE 2014

B yõka a Zeezi

¹ A Zeezi sẽn gom woto n sa, b yii ne b karen-biisã n kẽng Sedrõ kʋɩl-bilã rʋʋnd a to wã. Zẽed zĩig n be be, la a Zeezi kẽe be ne b karen-biisã.

² A Zʋdaase, soab ning sẽn da zãmbd-a bãmb n na n yõk n kõ wã rag n mii zĩ-kãng sõama, bala, a Zeezi ne b karen-biisã dag n tigma taab be naoor wʋsgo.

³ Dẽ, a Zʋdaas peega sodaas sulli, ne gũudbã maan-kʋʋdbã kãsem-dãmbã ne Fariizẽ-dãmbã sẽn tʋmã, tɩ b zãad bug-vɩlemse, la fɩtl-dãmba, la zab-teedo, n kẽng zĩigẽ wã.

⁴ A Zeezi sẽn mi bũmb nins fãa sẽn na n paam bãmbã, b kolga nebã n yeel-b yaa: Yãmb baooda ãnda?

⁵ La b leoka bãmb tɩ yaa Nazarɛt Zeezi wã. La a Zeezi yeel-b lame yaa: Yaa maam! A Zʋdaase, soab ning sẽn yõkd bãmb n na n kõ wã dag n bee ne nebã.

⁶ Wakat ning a Zeezi sẽn yeel tɩ: «yaa maamã,» nebã tarame n lʋɩ tẽnga.

⁷ A Zeezi leb n sok-b lame yaa: Ãnda la yãmb baooda? La b yeelame tɩ yaa Nazarɛt Zeezi wã.

⁸ A Zeezi leokame n yeele: Mam yeela yãmb tɩ yaa maam. Dẽ, sã n yaa maam la yãmb baooda, bɩ y bas nin-kãensã tɩ b looge.

⁹ Yaa sẽn na yɩl tɩ bãmb sẽn dag n yeelã pidsi: Neb nins yãmb sẽn kõ maamã, ned baa a yembr ka menem ye.

¹⁰ A Sɩmo Pɩyɛɛr dag n tara zabr sʋʋga, la a wõog-a lame n kɛ maan-kʋʋd kãsmã tʋmtʋmd n fiuug a rɩtg tʋbre. Tʋmtʋmdã yʋʋr la a Malkuusi.

¹¹ A Zeezi yeela a Pɩyɛɛr yaa: Lebs f zabr sʋʋgã a wʋʋgẽ. Mam ka na n yũ bõn-yũudl ning m ba sẽn kõ maamã la?

B waa ne a Zeezi a Ãnd ne a Kayif taoore

¹² Dẽ, sodaasã sull ne b sodaas naabã, la Zʋɩf-rãmbã gũudbã yõka a Zeezi n sẽbe.

¹³ B reng n talla bãmb n kẽng a Ãnd yiri, bala, yẽnda dag n yaa a Kayif sẽn yaa maan-kʋʋd kãsem yʋʋm‑kãngã rɛɛmba.

¹⁴ Yaa a Kayif n dag n sagl Zʋɩf-rãmbã tɩ ned a yembr tãa sã n ki soolmã nebã yĩng n são wã.

Maan-kʋʋd kãsmã taoore

¹⁵ Mik t'a Sɩmo Pɩyɛɛr ne a Zeezi karen-biig a to dag n pʋgda a Zeezi. Maan-kʋʋd kãsmã dag n mii karen-bi-kãnga, la karen-biiga tũu a Zeezi n kẽ maan-kʋʋd kãsmã zakẽ,

¹⁶ la a Pɩyɛɛr paa yɩnga, zag-noorã sɛɛga. Karen-biig a to wã maan-kʋʋd kãsmã sẽn mi wã yiime n gom ne pag ning sẽn gũud zakã noorã, n kɩt t'a Pɩyɛɛr kẽ.

¹⁷ Dẽ, tʋmtʋmd poakã, zag-no-gũudã yeela a Pɩyɛɛr yaa: Fo ka rao-kãngã karen-biig a yembr sɩda? La a Pɩyɛɛr yeelame tɩ yẽnda ka bãmb karen-biig ye.

¹⁸ Tʋmtʋmdbã ne gũudbã dag n yasa be. La waood yĩnga, b dag n yõgna saal bugum n wootẽ. A Pɩyɛɛr me dag n bee ne bãmb n woot bugmã.

¹⁹ Maan-kʋʋd kãsmã soka a Zeezi b karen-biisã yelle, la bũmb nins b sẽn zãmsd nebã yelle.

²⁰ A Zeezi leoka yẽnda n yeele: Mam goma nebã fãa taoor wakat fãa, mam zãmsa nebã karen-doogẽ la wẽnd doogẽ wã, zĩig ning Zʋɩf-rãmbã sẽn tigimd taabã, la mam ka soos n gom baa fɩ.

²¹ Bõe tɩ y sokd maam bumb nins m sẽn goma? Sok‑y neb nins sẽn kelg-b maamã bãmb mii bũmb nins mam sẽn gomã!

²² A Zeezi sẽn gom woto wã, gũud a yembr sẽn dag n be be wẽe a Zeezi pɛk n yeele: «Yaa woto la fo leokd maan-kʋʋd kãsmã?»

²³ A Zeezi leoka yẽnda n yeele: «Mam gomdã sã n yaa wẽnga, bɩ f wilg a sẽn yaa wẽng zĩig ninga. La mam sã n goma sõama, bõe yĩng tɩ f wẽed-ma?»

²⁴ Dẽ, a Ãnd kɩtame tɩ b tall a Zeezi b sẽn sẽbã n kẽng maan-kʋʋd a Kayif yiri.

A Pɩyɛɛr kɩɩsame t'a ka mi a Zeezi ye

²⁵ A Sɩmo Pɩyɛɛr dag n bee be n woot bugum. Ned n yeel-a yaa: «Fo me ka bãmb karen-biig a yembr sɩda?» Yẽnda kɩɩsame n yeel yaa: «Mam ka bãmb karen-biig ye.»

²⁶ Maan-kʋʋd kãsmã tʋmtʋmd a yembre, sẽn yaa rogem ne ned ning a Pɩyɛɛr sẽn dag n kɛ a tʋbr n fiuugã yeelame yaa: «Mam ka yã foom zẽedã zĩigẽ ne bãmb sɩda?»

²⁷ A Pɩyɛɛr leb n kɩɩsame. La wakat-kãng bala, no-raoog kelmame.

A Zeezi bee a Pilat taoore

²⁸ B yii ne a Zeezi a Kayif zakẽ wã n tall-b n kẽng gʋvɛrneerã zakẽ. Dag n yaa yibeoogo. Bãmb mensã ka kẽ zakã pʋg ye, sẽn na yɩl n da rẽgem b mense, n paam n dɩ Pak tigrã.

²⁹ Dẽ, a Pilat yiime n wa nebã nengẽ n yeel-ba: Bõe rõadg la yãmb tar ne rao-kãngã?

³⁰ B leokame n yeele: «A sã n dag n ka maanẽ wẽnga, tõnd dag n kõn tall-a n wa n kõ yãmb ye.»

³¹ Dẽ, a Pilat yeel-b lame yaa: «Bɩ yãmb mensã reeg-a n bʋ a bʋʋdã wa sẽn zems yãmb tõogã.» Zʋɩf-rãmbã yeela a Pilat yaa: «Tõnd ka tar noor tɩ kʋ ned ye.»

³² Yaa sẽn na yɩl la gomd ning a Zeezi sẽn gom n na n wilg kũum ning buud bãmb sẽn na n ki wã pidsi.

³³ A Pilat kẽe a zakẽ wã n bool a Zeezi n yeel-ba: «Yaa yãmb la Zʋɩf-rãmbã dĩma bɩ?»

³⁴ A Zeezi leokame n yeele: Yãmb meng n tags a woto n sokdẽ bɩ, bɩ yaa neb a taab n gom mam yell a woto?

³⁵ A Pilat leokame n yeele: «Dẽ yĩnga, mam yaa Zʋɩf la? Fo soolmã neb ne maan-kʋʋdbã kãsem-dãmbã n tall foom n wa n kõ maam. Bõe la f maan yã?»

³⁶ A Zeezi leokame n yeele: «Mam soolmã ka dũni ka rẽnd ye. Mam soolmã sã n dag n yaẽ dũni ka rẽnda, mam tʋmtʋmdbã dag n na zab n sõng maam, tɩ b ra yõk maam n kõ Zʋɩf-rãmbã ye. La moasã, mam soolmã ka tẽng zug ka rẽnd ye.»

³⁷ A Pilat yeelame: Dẽnd fo yaa rĩm wɛ? A Zeezi leokame n yeele: «Yaa wa yãmb sẽn yeelã, mam yaa rĩma. Ad bũmb ning yĩng mam sẽn dogã, la bũmb ning yĩng mam sẽn wa dũni wã: Yaa tɩ kɩs sɩdã kaseto. Ned ning fãa sẽn yaa sɩdã rẽnd kelgda mam koɛɛga.»

³⁸ A Pilat sokame yaa: «Sɩd yaa bõe?» A Pilat sẽn gom woto n sa, a leb n yiime n kẽng Zʋɩf-rãmbã nengẽ n yeel-b yaa: «Mam ka yã baa fɩ raoã nengẽ sẽn sekd tɩ b kao a bʋʋd n yeel t'a zemsa kũum ye.

B kaoo a Zeezi bʋʋd n yeel tɩ b tog n kiime

³⁹ La yãmb tara mining sẽn yaa tɩ mam yiis bi-bɛɛg a yembr y Pakã tigr wakat n base. Yãmb datame tɩ mam bas Zʋɩf-rãmbã rĩmã y yĩnga?»

⁴⁰ Nebã leb n kaasame n yeele: Ayo! Da bas-y yẽnda ye, bas-y-yã a Barabaase. A Barabaas yaool n dag n yɩɩ fãada.