A Zã Sõng 15 - WẼNNAAM SEBRE 2014

A Zeezi yaa reezẽ tɩɩg meng-menga

¹ Mam yaa reezẽ tɩɩg meng-menga, la m ba yaa reezẽ tɩɩgã koaada.

² Will ning fãa sẽn tão mam zug n yaool n ka womd biisi, m ba kɛɛgd‑a lame. La will ning fãa sẽn womd biisi, m ba yosd-a lame t'a tõe n wom biis n paase.

³ B zoe n yosa yãmba, gomd ning mam sẽn togs yãmbã yĩnga.

⁴ Pa-y mam pʋgẽ, wa mam sẽn paad yãmb pʋsẽ wã. A wa reezẽ tɩɩg will sẽn ka tõe n wom biis a toore, a sã n ka kell n tong ne reezẽ tɩɩgã, woto me, yãmb ka tõe n wom biisi, y sã n ka pa mam pʋgẽ ye.

⁵ Maam la reezẽ tɩɩgã menga, tɩ yãmb ya wilã. Ned ning sẽn paad mam pʋgẽ, tɩ mam paad a soab pʋgẽ womda biis wʋsgo. Bala, sã n ka ne maam, yãmb ka tõe n maan bũmb baa fɩ ye.

⁶ Ned sã n ka paad mam pʋgẽ, b na n lob-a-la yɩng wa reezẽ tɩɩg willã, la a na n kʋɩɩme. La b wʋkda wilã n tugund bugum, la bugmã rɩt-b lame.

⁷ Yãmb sã n pa mam pʋgẽ, tɩ mam goamã pa yãmb pʋgẽ, bɩ y kos bũmb ning fãa y sẽn data, la b na kõ yãmba.

⁸ Yãmb sã n wom biis wʋsgo, m ba na n paama waoogre, la yãmb na n yɩɩ mam karen-biisi.

⁹ Mam me nonga yãmb wa m ba sẽn nong maamã. Pa-y mam nonglmã pʋgẽ.

¹⁰ Yãmb sã n tall mam tõodã, yãmb na n paa mam nonglmã pʋgẽ, wa mam me sẽn tall m ba tõod n be bãmb nonglem pʋgẽ wã.

¹¹ Mam goma ne yãmb a woto, tɩ mam sũ-noogã na zĩnd yãmb pʋgẽ, la tɩ y sũ-noogã na pidi.

¹² Ad mam tõogo: «Nong-y taab wa mam sẽn nong yãmbã.»

¹³ Nonglem ka be ninsaal yĩnga, n yɩɩd tɩ kõ f vɩɩm f zo-rãmb yĩng ye.

¹⁴ Yãmb sã n maan bũmb nins mam sẽn yet yãmbã, yãmb yaa mam zo-rãmba.

¹⁵ Mam ka boond yãmb tɩ tʋmtʋmdb ye, bala, tʋmtʋmd ka mi a zu-soab sẽn maand ye. Mam boola yãmb tɩ m zo-rãmba, bala, mam kɩtame tɩ yãmb bãng bũmb nins fãa m ba sẽn togs maamã.

¹⁶ Ka yãmb n yãk maam ye, yaa maam n yãk yãmba, n ning m tʋʋmd yãmb zutu, tɩ yãmb na kẽng n wom biisi, la tɩ yãmb biisã na pa wakat fãa. Woto, bũmb ning fãa yãmb sẽn na kos m ba ne mam yʋʋre, b na kõ yãmba.

¹⁷ Bũmb ning mam sẽn yet yãmb tɩ y maane, yaa tɩ y nong taaba.

Dũni wã kisa a Zeezi ne b karen-biisã

¹⁸ Dũni neb sã n kis yãmba, bãng-y tɩ b reng n kisga maam.

¹⁹ Yãmb sã n dag n yaa dũniyã rẽnda, dũniyã neb dag n na nong bũmb nins a sẽn so. La yãmb sẽn ka dũniyã rẽnda, n paas mam sẽn tũus yãmb n yiis dũniyã neb sʋkã yĩnga, dũniyã rãmb kisa yãmba.

²⁰ Tẽeg-y gomd ning mam sẽn yeel yãmbã. Mam yeela yãmb tɩ tʋmtʋmd ka yɩɩd a zu-soab ye. B sã n namsa maam, b na n namsa yãmb me. B sã n deega mam goamã, b na n deega yãmb goam me.

²¹ La b na n maana yãmb bõn-kãensã fãa mam yʋʋrã yĩnga, bala, b ka mi sẽn tʋm-a maamã ye.

²² Mam sã n dag n ka waẽ, la m dag n ka gomẽ ne-ba, beegr dag n kõn zĩnd b zut ye. La moasã, b ka tar padeng sẽn na n padem b yel-wẽnã yĩng ye.

²³ Sẽn kis-a maam kisa m ba me.

²⁴ Mam sã n dag n ka maanẽ tʋʋm nins ned baa a yembr sẽn nan ka maan bãmb sʋkã, beegr dag n kõn zĩnd b zut ye. Moasã, b yãnda mam tʋʋmã, la b kisga maam ne m ba wã fãa.

²⁵ La beemã kẽeme, tɩ bũmb ning sẽn gʋls bãmb tõogã pʋgẽ wã pidsi. A yeela be yaa: «Bãmb kisga maam zaalem bala.»

²⁶ Sõangdã mam sẽn na n deeg m ba nengẽ n tʋm yãmbã, sɩd Sɩɩgã sẽn yit m ba pʋgẽ wã sã n wa, b na n kɩsa mam kaseto,

²⁷ la yãmb me na n kɩsa mam kaseto, yãmb sẽn be ne maam hal sɩngr wẽndẽ wã yĩnga.