A Zã Sõng 14 - WẼNNAAM SEBRE 2014

A Zeezi yaa sore

¹ Da sak-y tɩ y sũyã sãam ye. Tẽ-y Wẽnnaam, la y tẽ maam me.

² Rot wʋsg be m ba wã yiri, sã kaẽ dẽ, mam dag n na n yeela yãmba. Bala, mam dabdame n na n tɩ segl zĩig yãmb yĩnga.

³ Dẽ, mam sã n kẽng n tɩ segl zĩigã yãmb yĩnga, mam na n lebg n waa n peega yãmba, tɩ maam sẽn be zĩig ningã, bɩ yãmb me zĩnd be.

⁴ Yãmb mii mam sẽn dabd zĩig ningã sore.

⁵ A Toma yeela bãmb yaa: «Zu-soaba, tõnd ka mi yãmb sẽn dabdẽ ye. Dẽ, tõnd na n yɩɩ a wãn n bãng a sore?»

⁶ A Zeezi yeela yẽnda yaa: «Maam la sore, la sɩda, la vɩɩm. Ned baa a yembr ka tõe n wa m ba nengẽ tɩ ka tũ ne maam ye.

⁷ Yãmb sã n dag n miẽ maam, yãmb dag n na miẽ m ba me. La sẽn sɩng ne moasã, yãmb mii bãmba, la yãmb yãnda bãmba.»

⁸ A Filip yeela bãmb yaa: Zu-soaba, wilg-y tõnd y ba wã, la rẽ na sek tõndo.

⁹ A Zeezi yeela yẽnda yaa: «Filipu, mam be ne yãmb hal daar zãr tɩ fo ket n nan ka bãng maam? Sẽn yãnd-a maam yãnda m ba. Yɩta a wãn tɩ fo yet maam: ‹Wilg tõnd y ba?›

¹⁰ Fo ka tẽed tɩ mam bee m ba wã pʋgẽ, tɩ m ba wã be mam pʋgẽ la? Goam nins mam sẽn gomd ne yãmbã ka yit mam meng nengẽ ye. M ba sẽn be mam pʋgẽ wã n maand b tʋʋma.

¹¹ Bɩ y tẽ maam, tɩ mam bee m ba pʋgẽ, tɩ m ba be mam pʋgẽ. Ka rẽ bɩ y tẽ maam tʋʋm kãsemsã yĩnga.

¹² Sɩd-sɩdã, mam yeta yãmb tɩ ned ning sẽn tẽed maam me na n tʋma tʋʋm nins mam sẽn tʋmdã, la a na n tʋma tʋʋm kãsems n yɩɩda, bala, mam dabda m ba nengẽ,

¹³ la bũmb nins fãa yãmb sẽn na kos ne mam yʋʋre, mam na n maan-b lame, tɩ m ba wã paam ziir b biigã pʋgẽ.

¹⁴ Yãmb sã n kos maam bũmbu, mam na maane.»

A Zeezi kãabame tɩ b na n tʋma Sɩɩg-sõngo

¹⁵ Yãmb sã n nong maam, y na n saka mam tõodã,

¹⁶ la maam, mam na n bõosa m ba, tɩ b kõ yãmb sõangd a to tɩ b pa ne yãmb wakat sẽn kõn sa.

¹⁷ Sõangd‑kãng yaa sɩd Sɩɩg dũniyã sẽn ka tõe n deege, a sẽn ka ne bãmba la a ka mi‑bã yĩnga. La yãmba, yãmb mii bãmba, bala, b bee ne yãmba, la b na n zĩnda yãmb pʋsẽ.

¹⁸ Mam ka na n bas yãmb kɩɩbd ye, mam na n waa yãmb nengẽ.

¹⁹ Bilf bal sã n paase, dũni rãmb kõn leb n yãnd maam ye. La yãmb yẽ, y na n yãnd maam. Bala, mam vɩɩme, la yãmb me na n vɩɩmde.

²⁰ Badaare, yãmb na bãng tɩ mam bee m ba pʋgẽ, tɩ yãmb be mam pʋgẽ, tɩ mam be yãmb pʋsẽ.

²¹ Ned ning sẽn talld-a mam tõodã n sakd-ba, yaa yẽnda soab n nong maam. Ned ning sẽn nong-a maam, m ba na n nong‑a la mam me na n nong-a lame, la m na n puka m meng ne-a.

²² A Zʋʋde, sẽn ka a Iskaryo yeela bãmb yaa: «Zu-soaba, yɩta a wãn tɩ yaa ne tõnd la yãmb tog n puk y menga, la ka ne dũniyã nebã?»

²³ A Zeezi leoka yẽnda yaa: «Ned sã n nong maam, a na n saka mam gomde, la m ba na n nonga a soaba. Tõnd na n waa yẽnda nengẽ, n zĩnd yẽnda pʋgẽ.

²⁴ Ned ning sẽn ka nong-a maam ka sakd mam goam ye. La gomd ning yãmb sẽn wʋmdã ka mam gomd ye, yaa m ba, sẽn tʋm-a maamã gomde.

²⁵ Mam goma ne yãmb bõn-kãng yelle, mam sẽn ket n be ne yãmb wakate.

²⁶ La sõangdã, Sɩɩg-sõngã m ba sẽn na n tʋm ne mam yʋʋrã, yaa bãmb n na n zãms yãmb bũmb fãa, la b tẽeg yãmb bũmb nins fãa mam sẽn yeel yãmbã.

²⁷ Mam basda laafɩ ne yãmba. Mam kõta yãmb m laafɩ. Mam ka kõt yãmb wa dũni wã sẽn kõtã ye. Bɩ y ra sak tɩ y sũyã sãam wall rabeem yõk yãmb ye.

²⁸ Yãmb wʋma mam sẽn yeel yãmb tɩ m na n loogame la m na n lebg n waa yãmb nengẽ wã. Yãmb sã n da nongẽ maam, y dag n na maanẽ sũ-noogo, mam sẽn dabd m ba nengẽ wã yĩnga. Bala, m ba yɩɩda maam.

²⁹ Mam togsa yãmb bõn-kãens moasã tɩ b nan ka ta ye, tɩ b sã n wa n pidsi, bɩ y tẽ.

³⁰ Mam ka na n tol n leb n gom ne yãmb yɛs ye. Bala, dũni naabã watame. A baa fɩ ka be mam pʋgẽ ye.

³¹ La yaa tɩ dũniyã na bãng tɩ mam nonga m ba, la tɩ mam maanda wa m ba sẽn yeel maamã. Yik-y tɩ d loog ka.»