A Zã Sõng 1 - WẼNNAAM SEBRE 2014

Gomdã rɩka yĩnga

¹ Hal sɩngr wẽndẽ, gomdã dag n beeme, la gomdã dag n bee ne Wẽnnaam, la gomdã yaa Wẽnnaam.

² Bãmb dag n bee ne Wẽnnaam hal sɩngr wẽndẽ.

³ B naana bũmb fãa ne bãmba, la bũmb ka be sẽn naane, tɩ ka yɩ ne bãmb ye.

⁴ Vɩɩm dag n bee bãmb pʋgẽ, la vɩɩmã dag n yaa vẽenem ninsaalbã yĩnga.

⁵ Vẽenemã yãga lik pʋgẽ, la likã ka reeg-a ye.

⁶ Dao a yembr la Wẽnnaam tʋm t'a wa. A yʋʋr la a Zã.

⁷ Dao‑kãng waame n yaa kaset kɩta, n na n kɩs vẽenemã kaseto, tɩ nebã fãa tõe n tẽ yẽnda yĩnga.

⁸ Dag n ka yẽnda la vẽenemã ye, la a waame n na n kɩs vẽenemã kaseto.

⁹ Vẽen-kãng yaa sɩd vẽenem, n wa dũni pʋgẽ n vẽnegd ned fãa.

¹⁰ Gomdã dag n bee dũni pʋgẽ. B naana dũni wã ne bãmba, la dũni ka bãng bãmb ye.

¹¹ Bãmb waa b meng nebẽ, la b nebã ka reeg bãmb ye.

¹² La neb nins fãa sẽn deeg bãmba, la neb nins sẽn tẽed bãmb yʋʋrã, b kõo bãmb noor tɩ b lebg Wẽnnaam kamba.

¹³ Ka kamb b sẽn dog ne zɩɩm, wall ne yĩng ratem, wall ne ninsaal datem ye, yaa Wẽnnaam sẽn doge.

¹⁴ B kɩtame tɩ gomdã rɩk yĩng n zĩnd tõnd sʋka. Tõnd gesa bãmb ziiri, Bi-ribl sẽn ka to ziir a sẽn deeg a ba nengẽ, la b pida ne bark la sɩda.

¹⁵ A Zã kɩsa bãmb kaset n yeele: Yaa soab ning mam sẽn gom a yell n yeel tɩ ned ning sẽn pʋgend maam n watẽ wã yɩɩda maam, bala, b renga maam n beẽ wã.

¹⁶ La tõnd fãa paama bãmb yalẽ wã, n deegd bãmb barkã n paasd wakat fãa.

¹⁷ Bala, b tũnuga a Moyiis n kõ tõogã, la barkã ne sɩdã tũnuga a Zeezi Kiris n wa.

¹⁸ Ned baa a yembr nan ka yã Wẽnnaam ye. Wẽnnaam sẽn yaa Bi-ribl‑yend sẽn ka to, n be ba a Wẽnnaam nengẽ wã n kɩt tɩ nebã bãng bãmba.

A Zãmbatiis kaseto

¹⁹ Ad kaset ning a Zã sẽn kɩs wakat ning Zʋɩf-rãmbã sẽn tʋm maan-kʋʋdbã ne Leevi rãmbã tɩ b yi Zeruzalɛm n wa n sok yẽnda wã: «Fo yaa ãnda soabã?»

²⁰ Yẽnda vẽnegame n togsame n ka kɩɩs ye. A yeelame: «Mam ka Kirisã ye.»

²¹ Bãmb leb n sok-a lame dẽ wã, fo yaa ãnda? fo yaa a Eli bɩ? T'a leoke: «Mam ka a Eli ye.» La b sok-a lame: «La yaa foom la Wẽnnaam no-rɛɛsã bɩ?» T'a leok tɩ ayo.

²² La b leb n yeelame yaa: «Foom la ãnda, tɩ tõnd tõe n tɩ leok neb nins sẽn tʋm-b tõndã! Fo mengã yetame tɩ fo yaa ãnda?»

²³ A Zã yeelame: Mam yaa soab ning sẽn kelemd we-rasempʋɩɩgẽ n yetẽ: «Rems‑y Zu-soabã sor tɩ yɩ tɩrga, wa Wẽnnaam no-rɛɛs a Ezayi sẽn yeelã.»

²⁴ B sẽn dag n tʋm b rãmbã yaa Fariizẽ-dãmbã.

²⁵ B sok-a lame yaa: «Bõe yĩng tɩ fo lisd nebã, fo sã n ka Kiris bɩ a Eli bɩ Wẽnnaam no-rɛɛsã?»

²⁶ A Zã leokame n yeele: «Maam, mam lisda yãmb koomẽ. La yãmb sʋkã, ned a yembr n be beenẽ yãmb sẽn ka mi ye.

²⁷ Soab‑kãng pʋgenda maam, la mam ka zems tɩ lood bãmb neooda loets ye.»

²⁸ Gom-kãens goma Betani, Zʋrdẽ rʋʋnde, zĩig ning a Zã sẽn dag n lisd nebã.

²⁹ Vẽkembeoogo, a Zã yãnda a Zeezi sẽn wat yẽnda nengẽ, n yeele: «Ad Wẽnnaam pe-bilã, sẽn yiisd-a dũni yel-wẽnã.»

³⁰ Yaa bãmb yell la mam dag n gom ne yãmb n yeel tɩ dao n pʋgend maam, la b yɩɩda maam, bala, b renga maam n beẽ wã.

³¹ La mam dag n ka mi bãmb ye, la mam waa n lisda nebã koomẽ tɩ bãmb tõe n vẽneg b meng ne Israyɛll nebã.

³² A Zã leb n kɩsa kaset n yeele: «Mam yãnda Sɩɩg-sõng sẽn yi arzãn n sig wa wall n pa bãmb zugu.»

³³ La mam dag n ka mi bãmb ye. La sẽn tʋm-a maam tɩ m wa n lis nebã koomẽ wã yeela maam yaa: «Fo sẽn na n yãnd ned ning tɩ Sɩɩg-sõng sig n pa a soab zugã, bɩ f bãng tɩ yaa yẽnda n lisd nebã Sɩɩg-sõng pʋgẽ.»

³⁴ Maam, mam yãame, la mam kɩsa kaset tɩ yaa bãmb la Wẽnnaam Bi-riblã.

Pipi karen-biisi

³⁵ Vẽkembeoogo, a Zã rag n leb n bee be ne a karen-biis a yiibu.

³⁶ A dag n geta a Zeezi sẽn loogd n yeele: «Ad Wẽnnaam pe-bilã.»

³⁷ Karen-biis a yiibã wʋma gom-kãense, la b pʋgla a Zeezi.

³⁸ A Zeezi wẽnegame n mik tɩ b pʋgda bãmba, la b sok-b lame: «Yãmb baooda bõe?» B leoka a Zeezi n yeele: «Rabbi, sẽn dat n yeel tɩ karen-saamba, yãmb yir yaa yɛ?»

³⁹ A Zeezi yeela bãmb yaa: «Wa-y tɩ y na yã.» B kẽngame n tɩ yã zĩig ning a Zeezi sẽn be wã, la b paa ne bãmb da-kãnga. Dag n yaa zaabr wakat a naas sẽnẽ.

⁴⁰ Neb a yiibã sẽn wʋm a Zã goam n pʋgl a Zeezi wã, a yembr bãmb sʋk la a Ãndere, a Sɩmo Pɩyɛɛr ba-biiga.

⁴¹ A Ãndere reng n yãnda a meng ba-biig a Sɩmo n yeel-a: «Tõnd yãnda Mesi wã, sẽn dat n togs tɩ ‹Kirisã.›»

⁴² Yẽnda talla a Sɩmo n wa a Zeezi nengẽ. A Zeezi ges-a lame n yeele: Foom la a Sɩmo, a Zonaas bi-ribla. B na n boonda foom t'a Sefaase, sẽn dat n yeel tɩ Pɩyɛɛr (wall kugri).

A Zeezi boola a Filip ne a Natanayɛll

⁴³ Vẽkembeoogo, a Zeezi yãka yam n na n kẽng Galɩle. Bãmb yãnda a Filip n yeel-a t'a tũ bãmba.

⁴⁴ A Filip dag n yaa Betsayɩda sẽn yaa a Ãndere ne a Pɩyɛɛr tẽngã neda.

⁴⁵ A Filip yãnda a Natanayɛll n yeel-a yaa: «Dao ning a Moyiis tõogã ne Wẽnnaam no-rɛɛsdbã sẽn gom a yellã, tõnd yãnd-a lame. Yaa Nazarɛt dao a Zeezi, a Zozɛf bi-riblã.»

⁴⁶ A Natanayɛll soka yẽnda yaa: «Dẽ yĩnga, bõn-sõng tõe n yii Nazarɛt sɩda?» A Filip yeel-a lame: «Wa n gese.»

⁴⁷ A Zeezi sẽn yãnda a Natanayɛll t'a wat bãmb nengẽ wã, b goma a yell n yeele: «Ad Israyɛll ned sɩd-sɩda, zãmb sẽn ka be a pʋgẽ ye.»

⁴⁸ A Natanayɛll soka bãmb yaa: «Yãmb bãnga maam yɛɛnẽ?» A Zeezi leok-a lame n yeele: «Sẽn deng a Filip sẽn na n bool foomã, fo sẽn dag n be kankangã tẽngrã, mam yãnda foom.»

⁴⁹ Dẽ, a Natanayɛll yeelame yaa: «Karen-saamba, yãmb la Wẽnnaam Bi-riblã! Yãmb la Israyɛll Rĩmã!»

⁵⁰ A Zeezi leok-a lame n yeele: «Mam sẽn yeel tɩ mam yãnda foom kankangã tẽngrã yĩnga, fo tẽedame. La fo na n yãnda bõn-kãsems sẽn yɩɩd a woto.

⁵¹ Sɩd-sɩda, mam yeta yãmb tɩ yãmb na n yãnda arzãn sẽn pake, la Wẽnnaam malegs sẽn dʋʋd la b sigd ninsaal Bi-riblã zugẽ.»