A Salmo yɩɩla 2 - WẼNNAAM SEBRE 2014

¹ Mam yaa wa Saaron kũnkubã zut tɩ-puudu, la rulg lɛlem sẽn be tãn-lond pʋsẽ.

Pʋg-paal sɩdã

² Rulg-lelemd sẽn yaa bũmb ning gõos sʋkã, m noangã me yaa woto kom-pugli sʋka.

Pʋg-paala

³ Pom tɩɩg sẽn yaa bũmb ning tʋgr tɩɩs sʋkã, m noangã me yaa woto kom-bɩɩsã sʋka. Mam nong n zĩnda yẽnda maasmẽ, la yẽnda biisã nooma maam.

⁴ Yẽnda talla maam n kẽ reezẽ rãam doogẽ, la tãb-kaoor ning yẽnda sẽn zẽk mam zugẽ wã yaa nonglem.

⁵ Keng-y maam ne reezẽ gila, la y paas maam pãng ne pom-dãmba, bala, yaa nonglem bãag n tar maam.

⁶ Bɩ a bas tɩ m kʋgl a goabg nugã, la a mobg maam ne a rɩtgã.

⁷ Zeruzalɛm kom-pugli, mam kota yãmb tɩ y zoe yãgsã la y zoe walsã sẽn be weoogẽ wã, la y ra sak n nek nonglem t'a wakat nan ka ta ye.

⁸ Kelg-y-yã! Yaa m noangã rãamde. Ade, a watame. A yɩgda tãmsã zutu, n tĩimd kunkubã zutu.

⁹ M noangã yaa wa yãk la wal-bila. Gese, yẽnda yasa tõnd dapoorã. Yẽnda lɩkda peem-lɛɛgẽ wã n getẽ. Yẽnda bee rigno-pĩirẽ wã n lɩkdẽ.

¹⁰ M noangã goma ne maam n yeel yaa: «M zoa, m yam neda, yɩk n wa!

¹¹ Bala, waood wẽnd loogame, saag yoogame, a loogame.

¹² Tɩɩs ningda puud tẽng zugu. Yɩɩl wakat taame, la b wʋmda wall sẽn yãbd tõnd tẽngã pʋga.

¹³ Kankang womda pipi biisi, la reezẽ tɩɩs puud yũug yitame. M zoa, m yam neda, yɩk n wa!

¹⁴ M walle, fo bee pĩis bogdẽ n solgd f meng pẽgsẽ. Sak tɩ m yãnd f neng la m wʋm f koɛɛga. Bala, fo koɛɛg yaa noogo, la fo neng yaa neere.»

Pagb a taabã

¹⁵ Yõg-y we-baasã, we-ba-bi nins sẽn sãamd reezẽ tɩɩsã. Bala, tõnd reezẽ tɩɩsã ningda puudu.

Pʋg-paala

¹⁶ M noangã yaa mam dẽnda, la mam yaa m noangã rẽnda. Yẽnda wãbenda a rũmsã rulg-lɛlmã sʋka.

¹⁷ M noanga, zoe n wa wa yãka, la wa wal-poal sẽn zoet to-to tãmsã pẽgsẽ wã, tɩ zĩigã nan ka maag ye, tɩ maasmã nan ka kɩll ye.