A Salmo yɩɩla 1 - WẼNNAAM SEBRE 2014

¹ A Salmo yɩɩll sẽn yɩɩd yẽnda yɩɩl a taabã fãa.

Ned ne a noang goamã Pʋg-paalã

² Bɩ a mogs maam ne a noore! Bala, fo saagrã n são reezẽ rãam.

³ Fo parfẽ-rãmbã yũug nooma wʋsgo! Fo yʋʋrã yaa wa parfẽ yũ-noom sẽn sãeegde. Yaa rẽ n kɩt tɩ pʋg-sadbã fãa nong foom.

⁴ Wa peeg maam tɩ d zoe. Rĩmã talla maam n kẽ a ro-pʋsẽ wã. Tõnd na n maana sũ-noog fo yĩnga, tõnd na n kɩdma fo yĩnga. Tõnd na n pẽga fo saagrã n yɩɩd reezẽ rãam. A zemsame tɩ b nong foom.

Zo-rãmba Pʋg-paala

⁵ Zeruzalɛm kom-pugli, mam yaa sablga, la m yaa neer wa Kedaar fu-roto, la a wa a Salmo fu-bʋgsã.

⁶ Ra ges-y maam m sablmã yĩng ye. Yaa wĩntoog n wʋm maam. M ma-bi-raopã sũy yika ne maam tɩ b kɩt tɩ m kẽng b pʋtẽ n tɩ tʋme. Mam ka tʋm m meng pʋʋgẽ ye.

⁷ Kelg wɛ, m yam neda, fo wãbenda f piisã yɛɛnẽ? Fo gãnegda bãmb yɛɛnẽ tɩ b vʋʋsd wĩntoogo? Ra bas maam tɩ m yɩ wa gõaada, n bʋdg n tũ fo tũud-n-taasã rũms ye.

Zo-rãmba

⁸ Pagbã fãa sʋka, foom bal la pʋg-neere, fo sã n ka mi, bɩ f kẽng n dɩk piisã naoã, n kɩɩm f bʋʋsã pe-kɩɩmbã yiyã sɛɛga.

Pʋg-paal sɩdã

⁹ M noanga, mam makda foom ne wed-yãang ning sẽn takd Faarõ saar-dãmbã.

¹⁰ Fo yɛgã yaa neeb n be fo tʋblondã sʋka. La fo yublã toga ne lo-yɛrga.

¹¹ Tõnd na n maana sãnem yãnd sẽn tẽgs ne wanzuri n kõ foom.

Pʋg-paala

¹² Wakat ning rĩmã sẽn zĩ n dɩtẽ wã, mam parfẽ wã kaam yũug piuugame.

¹³ M noangã yaa wa yolg sẽn pid ne parfẽ n be mam bĩisã sʋka.

¹⁴ M noangã yaa wa tɩ-puud sẽn be Ɛn-Gedi reezẽ tɩɩs pʋtẽ.

Pʋg-paal sɩdã

¹⁵ M noanga, fo yaa neere, fo yaa neer wʋsgo. Fo ninã yaa wa wall nini.

Pʋg-paala

¹⁶ M noanga, fo yaa neer wʋsgo. Sɩda, fo noogda m sũuri. Yaa mood bal n yaa tõnd pĩiri.

Pʋg-paal sɩdã

¹⁷ Tõnd dotã sug-raad yaa sɛɛdr tɩɩs raado, la tõnd dotã lals luda ne sɩprɛs tɩɩs raado.