A Ruti 3 - WẼNNAAM SEBRE 2014

A Rut kẽnga a Boaaz nengẽ

¹ Daar a yembre, a Naoomi yeela a bi-pag a Rut yaa: «M biig sõngo, mam tagsdame tɩ yaa neer tɩ m sõng-f tɩ f paam zĩig tɩ f sũur yɩ noogo.

² Fo meng miime t'a Boaaze, ned ning sẽn bas-a tɩ fo pʋg a tʋmtʋmd-pogsã n yiis koodã yaa tõnd doagda. Yẽnda yaool n tara a ka-pãbr a zɛɛgẽ wã rũndã yʋngã.

³ Rẽ wã, bɩ f maneg n so koom, n zɛ kaam, la f rɩk f fu-soãma wã n yeelg n kẽng zɛɛgẽ wã. La sã n ka a wa n dɩɩme la a yũume n sɛ, bɩ f ra lik t'a yãnd-f ye.

⁴ A Boaaz sã n wa na n gãande, bɩ f gũus n ges zĩig ning a sẽn na n gãandẽ wã, t'a sã n gũsi, bɩ f yaool n kolg n maag f meng n lak a fu-goabgã n gãand a naoã sɛɛgẽ. Rẽ zugẽ, yẽnda mengã n na n wilg foom f sẽn tog n maan bũmb ninga.»

⁵ A Rut yeela a sɩd-ma wã yaa: «Mam na n maana wa yãmb sẽn yeelã.»

⁶ Woto, a Rut kẽnga a Boaaz zɛɛgẽ wã, la a sɩd maana wa a sɩd-ma wã sẽn yeel-a wã.

⁷ A Boaaz sẽn dɩ la a yũ n sɛ t'a sũur noomẽ, a kẽng n tɩ gãanda a ka-rʋrã sɛɛgẽ. Woto, a Rut maag a meng n kolg n lak a Boaaz fu-goabgã n gãand a naoã sɛɛga.

⁸ La yʋn-sʋk wakate, a Boaaz yɩɩ birbir n neke, la yɩɩ lingr ne yẽnda, a sẽn mik tɩ pag n gãe a naoã sɛɛgã.

⁹ La a Boaaz sokame: «Fo yaa ãnda?» La a Rut leokame: «Yaa yãmb tʋmtʋmd-poak a Ruti, sak-y tɩ m zĩnd y sɛɛgẽ, tɩ bala, yãmb n yaa ned ning sẽn tõe n deeg-a maam n zã, rẽ wã, bɩ y tẽeg y fu-goabgã noor n pil-ma.»

¹⁰ La a Boaaz yeelame: «M biig sõngo, bɩ Zu-soabã ning-f barka! Bala, fo sẽn maana wilgdame tɩ f kɩsa sɩd ne f sɩd-ma wã buud n yɩɩd pĩndã, bala, fo rag n tõe n baoo bi-bɩɩg sẽn yaa arzɛk soab bɩ naong soaba, la fo ka maan woto ye.

¹¹ M biig sõngo, sã n yaa woto, bɩ f ra maan rabeem ye. Mam na n maana bũmb ning fo sẽn kotã n kõ-fo, bala, ned ka be tẽngã pʋg ka, n ka mi tɩ fo yaa bark pag ye.

¹² Yaa sɩd tɩ mam yaa y roagd sẽn tõe n deeg foom n zã, la ned a to n be n tar rogem ne yãmb n yɩɩd maam.

¹³ Dẽ wã, bɩ f gãand ka yʋngã, woto beoog yibeoogo, d na ges a sã n na n sakame n deeg-fo. La a sã n ka tʋlg n na n deeg-fo, mam pʋlemda foom ne Sẽn-Ka-Saab sẽn vɩ wã yʋʋre, tɩ m na n deeg-f lame n zã! La nananda, pa n gãand n gũ beoogo.»

¹⁴ Dẽ, a Rut kell n pa a Boaaz naoẽ wã n gãand n ta tõd-beoogo, la a sãdame n loog tɩ zĩigã nan ka yẽeg ye. Bala, a Boaaz rag n ka rat tɩ ned bãng t'a Rut waa beenẽ ye.

¹⁵ La a Boaaz yeela a Rut yaa: «Tẽeg f fu-bilã n gãd sõama.» La a Rut tẽega a fuugã, la a Boaaz maka koodã wam a yoob n kiig-a, n sõng-a t'a tʋke. Rẽ poore, a Rut lebg n leba tẽnga pʋga.

¹⁶ A Rut taa a sɩd-ma wã nengẽ, la a sok-a lame: «M biig sõngo, f kẽngame tɩ tɩg n yɩ a wãna?» Dẽ, a Rut rɩka a Boaaz sẽn maan yẽnda bũmb ningã fãa n togs a sɩdã ma.

¹⁷ A Rut leb n yeelame: «Bãmb tol n kõo maam bɩle wam a yoobe, n yeel maam tɩ m ka tog n lebg wa yãmb nengẽ nug-zaal ye.»

¹⁸ A Naoomi yeelame yaa: «M biig-sõngo, fo we n maag f yĩng tɩ d na n gũ n gesa yellã sẽn na n baas to-to. Bala, a Boaaz na n maana a sẽn tõe tɛk tɩ yellã paam manegr rũndã.»