A Ruti 1 - WẼNNAAM SEBRE 2014

¹ Wakat ning bʋ-kaoodbã sẽn dag n so Israyɛll nebã, kom-kãseng n zĩnd Kana soolem pʋgẽ. La rao a ye n yi Zʋʋda tẽng a ye pʋgẽ sẽn boond tɩ Betlehɛm, ne a pag la a kamb a yiib n na n tɩ zĩnd Moaab weoogẽ wã.

² Rao-kãng yʋʋr boondame t'a Elimelɛke, t'a pagã yʋʋr boondẽ t'a Naoomi, t'a kamb a yiibã yʋy yaa a Maklõ, ne Kilyõ, bãmb dag n yaa neb sẽn be Betlehɛm, Zʋʋda soolmã pʋgẽ, tɩ b boond-b tɩ Efrat-dãmba. Bãmb taa Moaab weoogẽ wã n zĩnd be.

³ Dẽ zugẽ, a Naoomi sɩd a Elimelɛk wa n kiime, la yẽnda paa be n zĩnd ne a kamb a yiibã.

⁴ La a Naoomi kom-dibli wã peega Moaab kom-pugli wã n maan b pagba. A yembr yʋʋr boondame t'a Orpa, t'a yembrã yʋʋr yaa a Ruti. La bãmb zĩnda be yʋʋm piiga.

⁵ La a Maklõ ne a Kilyõ me wa n kiime. Woto, a Naoomi n ka leb n tar sɩda, la yẽnda n ka leb n tar biiga.

^6-7 A Naoomi ne a bi-pagbã zĩnda Moaab tẽngã n wʋm tɩ Zu-soabã maana b nebã neer n kõ-b rɩɩbo, dẽ, bãmb yikame n yi be n dɩk sor n na n lebg n leb Zʋʋda.

⁸ La a Naoomi yeela a bi-pagb a yiibã yaa: «Lebg-y n kuil-y y ma-rãmb rotẽ, la bɩ Zu-soabã maan yãmb neer wa yãmb sẽn maan maam ne sẽn ki-bã neerã.

⁹ Bɩ Zu-soabã kõ yãmb y yiibã fãa sɩdb tɩ y zĩnd ne laafɩ. La a Naoomi moka bãmba, la a bi-pagb a yiibã zẽka b koees n yãbe.»

¹⁰ La bãmb yeela a Naoomi yaa: «Ayo! Tõnd na n tũu yãmb n kuil y nebẽ wã.»

¹¹ La a Naoomi yeelame: «M kamba, lebg-y n kuil-y-yã. Yaa bõe tɩ yãmb dat n tũ maam? Mam tõe n leb n doga kom-dibli tɩ yɩ yãmb sɩdb yɛs bɩ?»

¹² M kamba, kẽng-y n kuil-y-yã. Bala, mam yaa pʋg-yãang sẽn ka tõe n leb n kuil sɩd ye. La baa mam sã n yeel tɩ tõeeme, la mam sã n paam sɩd rũndã yʋngã n dog kom-dibli,

¹³ Yãmb na tõog n yaas tɩ bãmb bɩ sɩda? Yaa yõwã yĩng n na n kɩt tɩ yãmb zĩnd a woto n ka kuil sɩdb bɩ? Ayo! M kamba, mam sũ-toogã yɩɩda yãmba, Zu-soabã nug sẽn zɩsg mam zug a woto wã yĩnga.

¹⁴ La bãmb leb n zẽka b koees n yãbe. A Orpa moka a sɩda ma wã n bas-a n looge. La a Rut sũurã loee ne a sɩd-ma wã.

¹⁵ Dẽ, a Naoomi yeelame: «Ade, fo pʋg-to wã lebg n leba a nebẽ, la a wẽnnaam-dãmbẽ, bɩ f lebg n tũ-a tɩ y kuili.»

¹⁶ La a Rut yeelame: «Da pẽdg-y maam tɩ m lebg n loog n bas-y ye. Bala, zĩig ning yãmb sẽn na n kẽngẽ wã, mam me na n kẽnga be, la zĩig ning yãmb sẽn na n tɩ zĩndã, mam me na n zĩnda be, yãmb nebã na n yɩɩ mam neba, la yãmb Wẽnnaamã na n yɩɩ mam Wẽnnaam,

¹⁷ Yãmb sẽn na n ki zĩig ningã, mam me na n kii be, la b na muma maam beenẽ. Bũmb sã n tõog n welg maam ne yãmba, tɩ ka kũum, bɩ Zu-soabã sɩbg maam ne sɩbg-kãsenga.»

¹⁸ La a Naoomi sẽn yã t'a Rut rat n tũu yẽnda ne a sũur fãa wã, a basa a Rut pẽdgre.

¹⁹ Dẽ, bãmb b yiibã tũu taab n kẽn n ta Betlehɛm, la b sẽn kẽ Betlehɛm tẽngã pʋga, nebã fãa sũy sãamame, tɩ b gomda, tɩ pagbã sokdẽ: «Rẽ yĩnga, yaa Naoomi la woto bɩ?»

²⁰ La a Naoomi yeela pagbã yaa: «Da bool-y maam t'a Naoomi, sẽn dat n yeel t'a ‹sũ-noog› ye, bool-y maam t'a ‹Maara›, sẽn dat n yeel t'a ‹sũ-toogo.› Tɩ bala, Pãng-Soabã kɩtame tɩ mam vɩɩmã lebg toog wʋsgo.

²¹ Mam sẽn wa n loogdẽ wã tɩ m tara bũmb fãa, la Zu-soabã talla maam n lebg n wa ne nug-zaala. Yaa bõe tɩ y boond maam t'a Naoomi? Zu-soabã monga maam bʋʋm, Pãng-Soab a Wẽnd sɩbga maam.»

²² A Naoomi sẽn yi Moaab n lebg n wa wã yɩɩ woto. Yẽnda bi-pag a Rut sẽn yaa Moaab tẽng bi-puglã me yii be n tũ yẽnda n wa. La bãmb sẽn wa n ta Betlehɛmã, tɩ zemsa koodã tigsg sɩngr wakate.