A Ooze 4 - WẼNNAAM SEBRE 2014

Wẽnnaam bʋʋda ne Israyɛll nebã

¹ Israyɛll nebã, kelg-y Sẽn-Ka-Saab koɛɛga! Sẽn-Ka-Saab tara yell ne tẽngã nebã, bala, sɩd ne maan-neere, la Wẽnnaam bãngr ka be tẽngã pʋgẽ ye.

² Tẽngã pida ne kãab taab wẽnga, la zãmbo, ne nin-kʋʋre, la wagdem, ne yoobo, la maan taab pãnga. Wakat fãa yaa zɩɩm daagr woo zɩɩm daagre.

³ Woto n kɩte, tɩ sũ-sãang na n kẽ tẽngã. Tẽngã nebã ne we-rũmsã, la yĩngr liuuli wã, hal baa ne zĩmã sẽn be ko-kãsengã pʋgẽ wã na n sãamame.

Maan-kʋʋdbã beegre

⁴ La bɩ ned ba a yembr da bao n bʋ ne a to ye. Bɩ ned da ning a to taal ye. Maan-kʋʋda, yaa ne foom la mam tar yelle!

⁵ Fo na n laka wĩndga, la no-rɛɛsã sẽn be ne foomã na n laka yʋngo, la mam na n sãama f ma wã.

⁶ Mam nebã sãamdame, bãngr kaalem yĩnga. Fo sẽn zãgs bãngrã yĩnga, mam me na n zãgsa foom, tɩ f ka leb n yɩ maan-kʋʋd yɛs ye. Fo sẽn yĩm f Wẽnnaamã tõogã yĩnga, mam me na n yĩma f kambã yelle.

⁷ Maan-kʋʋdbã sõor paasdame, la b kongrã me paasdame, la mam na n teka b waoogrã tɩ lebg paoogre.

⁸ Bãmb tũnugda mam nebã yel-wẽnã n paamd n dɩtẽ, bãmb pirsd-b lame tɩ b maand kongr nins bãmb mensã sẽn maandã.

⁹ Yell ning sẽn na n paam nebã, n na n paam maan-kʋʋdã me. Mam na n sɩbga yẽnda a manesem-wẽnsã yĩnga, la m na n lebsa yẽnda wa sẽn zems a tʋʋmã.

¹⁰ Bãmb na n dɩɩme, la b kõn tɩg ye, Bãmb na n yoome, la b kõn fɩɩg ye, bala, bãmb basa Sẽn-Ka-Saabo.

Israyɛll nebã yoobo

¹¹ Yoobo, la reezẽ rãam, ne reezẽ rã-paalg menesda ned yam.

¹² Mam nebã sokda raad b sẽn peese. Bãmb dasaarã n gomd ne-ba. Yoobã sɩɩg kẽes-b-la moogo, n kɩt tɩ b zãag ne b Wẽnnaamã.

¹³ Bãmb maanda maand tãmsã zutu, bãmb yõogda wisd kunkubã zutu, la sɛn tɩɩse, ne pepliye tɩɩse, la terebẽnt tɩɩs sẽn tar maasem wʋsg tẽngre. Woto yĩngã, yãmb kom-pugli na n yoome, la yãmb bi-pagbã na n yɩɩ yoaadba.

¹⁴ La m ka na n sɩbg y kom-pugli wã, wall y bi-pagbã b yoobã yĩng ye. Bala, yãmb mensã kẽeda ne pʋg-yoaadba, n naagd pʋʋsg zĩisẽ pʋg-yoaadbã n maand maando. Yãmb yaa neb sẽn ka tar yam, la y na n sãamame!

¹⁵ Israyɛll nebã, yãmb basa maam wa pag sẽn bas a sɩd n kẽng yoobo. La bɩ Zʋʋda nebã ra maan wa yãmba, n kong bʋʋm ye. Da kẽng-y Gilgall ye, ra kẽng-y Bet-Avɛn ye, la ra wẽen-y ne Sẽn-Ka-Saab sẽn vɩ wã yʋʋr ye!

¹⁶ Israyɛll nebã yaa tõatb wa nag-sadga, la moasã Sẽn-Ka-Saab na n wãbnega bãmb wa pe-bil sẽn be zĩ-yalengẽ n wãbdẽ.

¹⁷ Efrayiim nebã tũuda wẽn-naandse. Bas-y-ba!

¹⁸ Bãmb ka yãt n yũ n sɛ, la b leb n lʋɩ yoobã pʋgẽ ye. Bãmb nanambsã nonga paoogre.

¹⁹ Sebg n na n dɩk bãmba, la yãnd na n yõk-b-la b maandã yĩnga.