A Ooze 2 - WẼNNAAM SEBRE 2014

Zɩzreyɛll da-kãsengã

¹ Israyɛll nebã sõor na n yɩɩ wa bĩisrã sẽn be ko-kãsengã noore, tɩ b ka tõe n sõd-b n bãng a sõor ye. Zĩig ning b sẽn dag n yet bãmb tɩ: ‹Yãmb ka mam neb ye›, b na n bool-b lame tɩ: ‹Wẽnnaam sẽn vɩ kamba.›

² Wakat-kãnga, Zʋʋda nebã ne Israyɛll nebã na n lagma taaba, la b na n yãka naab a yembr t'a soog-ba. Bãmb na n sooga tẽngã, bala, Zɩzreyell daarã na n yɩɩ ra-kãsenga.

³ Bool-y y saam-biisã tɩ ‹mam nebã›, la y bool y tãopã tɩ ‹b sẽn zoet-b rãmb nimbãanega.›

Israyɛll yaa wa pʋg-yoodre

⁴ Bool-y y ma wã bʋʋdo, bool-y-yã-a bʋʋd t'a ka mam paga, la mam me ka a sɩd ye! Bɩ a yiis yoobã bãn sẽn be a nengã zugã, la sẽn be a bĩisã sʋkã.

⁵ Sã n ka rẽ, mam na n yees-a lame n bas-a a zaala, wa a ma sẽn dog-a to-to wã. Mam na n kɩtame t'a lebg wa we-raoogo, la wa tẽng sẽn kʋɩ, la ko-yũud n na n kʋ-a.

⁶ Mam ka na n zoe a kambã nimbãaneg ye, bala, bãmb yaa yoodem kamba.

⁷ N-yẽe, bãmb ma wã maana yoobo. Sẽn dog-a bãmbã ninga a meng yãnde. Bala, yẽnda yeelame: «M na n pʋga m dolsen-dãmbã, bãmb n kõt-m dɩɩb ne koom, la b kõt-m fut sẽn wʋg ne pe-kõbdo, la lẽ gĩsi, ne kaam la bõn-yũudla!»

⁸ Ade, maam a Sẽn-Ka-Saab na n gɩdga f sorã ne gõose. Mam na n mee lalg n zẽk t'a ra leb n tõog n yãnd a sorã ye.

⁹ Yẽnda na n pʋga a rolsen-dãmbã, la a kõn tõog n paam-b ye. A na n bao-b lame, la a kõn yãnd-b ye. Dẽ, a na n yeelame: «Mam na n lebg n leba m sɩd-kʋdgẽ wã, tɩ beenẽ wã n são moasã wã.»

¹⁰ Yẽnda ka mi tɩ yaa maam n dag n kõt-a koodã ne reezẽ rãamã, la kaamã, ne wanzuri wã, la sãnemã b sẽn dag n tar n waoogd wẽn-naandg a Baallã ye!

¹¹ Woto yĩngã, mam na n lebs n deega m koodã ne m reezẽ rãamã b wakate. La m lebs n deeg m futã sẽn wʋg ne pe-kõbdã, la ne lamd gĩs-bãaneg fuugã sẽn dag n lut a yãndã.

¹² La moasã, mam na n yeesa a futã n ning-a yãnd a roelsen-dãmbã nifẽ, la ned kõn tõog n fãag-a mam nugẽ ye.

¹³ Mam na n kɩtame tɩ yẽnda kɩdengã ne a tigã la a ki-paalã ne a vʋʋsg rayã la a tig a taabã fãa sɛ.

¹⁴ Mam na n sãama a reezẽ tɩɩsã ne a kankamsã. Yẽnda rag n gomda b yell n yetẽ: «Woto fãa yaa yaood mam dolsen-dãmbã sẽn yao maam!» La mam na n kɩtame, t'a lebg kãgr tɩ we-rũmsã wãb-a.

¹⁵ Maam a Sẽn-Ka-Saab yetame: «Mam na n sɩbg-a lame, ray nins yẽnda sẽn yõog wisd n kõ a Baallã yĩnga. Yẽnda rag n ningda tʋblond ne muizãan n kẽnd a roelsen-dãmbã nengẽ, la maam, yẽnda yaool n yĩm mam yelle.»

Wẽnnaam na n lebsa b nebã b zĩigẽ

¹⁶ Woto yĩnga, mam na n belg-a lame n tɛ-a n kẽng we-raoogẽ wã, la m na n belm-a lame.

¹⁷ La beenẽ, mam na n lebs-a-la a reezẽ tɩɩs pʋtã, la m kɩt tɩ Akoor longã lebg tẽeb sɩngre. Beenẽ, yẽnda na n saka wa a pʋg-sademdẽ wã, la wa wakat ning a sẽn dag n yi Ezɩptã.

¹⁸ Maam a Sẽn-Ka-Saab yetame: Badaare, fo na n boola maam: «M sɩda,» f kõn leb n bool maam tɩ: «M Baalle, m soaal» ye.

¹⁹ Mam na n kɩtame t'a Baall-dãmbã yʋyã ra leb n yi fo noorẽ ye. B kõn leb n pʋd b yʋyã meng ye.

²⁰ Badaare, mam na n maana kaool bãmb yĩng ne we-rũmsã, la yĩngr liuuli wã, la tẽngã bõn-vuudsã. Mam na n kaoo tãbd ne zabr sʋʋse, n kɩt tɩ zabr sɛ tẽngã pʋgẽ, la bãmb na n zĩnda ne bãane.

²¹ Mam na n yɩɩ fo sɩd wakat sẽn ka sɛta, la fo na n yɩɩ mam paga, tɩrlem, maan-sɩda, nonglem, la nimbãan-zoeer pʋga.

²² Fo na n yɩɩ mam pag maan-sɩd pʋga, la fo na n bãnga maam a Sẽn-Ka-Saabo.

²³ Badaare, maam a Sẽn-Ka-Saab na n leokame. Mam na n kɩtame tɩ saagã ni, la saagã na n ni n kõo tẽngã koom,

²⁴ Tẽngã na n kõo koodo, la divẽ ne kaam. La Zizreyɛll ka na n kong bũmb ye.

²⁵ Mam na n bʋda mam mengã yĩng tẽngã pʋgẽ, m na n zoe a Lo-Ruhama nimbãanega. Mam na n boola a Lo-Ami tɩ: ‹mam nebã!› La yẽnda na n boola maam tɩ: ‹Mam Wẽnnaam!›