A Ooze 13 - WẼNNAAM SEBRE 2014

Israyɛll na n sãamame

¹ Efrayiim nebã sã n dag n gome. Nebã rigda ne rabeem. Bãmb n dag n so Israyɛlle. La bãmb sẽn waoog Baall n beegã, B kiime

² Moasã bãmb yel-wẽnã paasdame, Bãmb dõoga bõn-naandg ne b wanzuri wã, la b maan wẽn-naands b toore. Bõn-kãens fãa yaa tʋʋm-mitb nus tʋʋma. B yeta bãmb wɛɛngẽ yaa: Neb nins sẽn maand maoong ne ninsaalbã, b tõe n moka lolse!

³ Yaa rẽ n kɩte, tɩ b na n yɩ wa yibeoog wulgu, wa yibeoog meenem sẽn mesgdã, wa wudg sobg sẽn dɩkd zɛɛgẽ, la wa bug-zõos sẽn yit roog võorẽ.

⁴ Mam yaa Sẽn-Ka-Saab n yaa yãmb Wẽnnaam. Hal sẽn sɩng Ezɩpte, Yãmb ka mi Wẽnnaam a to, sã n ka maam ye. La fãagd a to ka be sã n ka maam ye

⁵ Maam n bãng yãmb we-raoogã pʋga, tẽng sẽn yaa koɛɛng pʋgẽ.

⁶ Bãmb paama yamd zĩig n wãb n tɩge. Bãmb sẽn bãng tɩ b wãb n tɩgame, b wuka b mens n yĩm mam yelle.

⁷ Mam lebga wa gɩgemd bãmb yĩnga. Mam na n gũusa bãmb wa ãbg sẽn be sor zugu.

⁸ Mam na n sega bãmba, wa b sẽn wʋk rũm-toaag kamb t'a zabdẽ. Mam na n pãrsa bãmb yãadã Mam na n wãba bãmb beenẽ wa gɩgem-yãanga, We-rũmsã na n beesa bãmba.

⁹ Israyɛll nebã, woto na n yɩɩ yãmb sãoongo, Yãmb sõangd yaool n dag n yaa maam.

¹⁰ Yãmb dĩmã bee yɛɛnẽ moasã? Bɩ a wa sõng yãmb tẽmsã fãa pʋse. Yãmb bʋ-kaoodbã bee yɛɛnẽ? Bʋ-kaoodb nins yãmb sẽn dag n gomd b wɛɛngẽ n yetẽ tɩ b kõ yãmb dĩm ne nanambsã.

¹¹ Mam kõo yãmb dĩm m sũ-yikrã wakate. La m deeg-a-la m sũ-puugrã wakate.

¹² B gʋlsa Efrayiim nebã kongrã ne b yel-wẽnã n bĩngi.

¹³ Bãmb na n namsa wa pag sẽn kũmd rogem. La yaa biig sẽn ka yam, Yẽnda rogem taame, La a ka rat n yi a ma pʋgẽ ye.

¹⁴ Mam na n fãaga bãmb kɩɩm-kulgu, La m na n fãag-b-la ne kũum. Kũum, fo toog bee yɛɛnẽ? Kɩɩm-kulgu, fo sãoong bee yɛɛnẽ? Mam ka leb n tar nimbãan-zoeer ye!

¹⁵ Baa bãmb sẽn womd biis b ba-biisã sʋkã, seobgã na n yii yaanga, Sẽn-Ka-Saab sobg sẽn yit we-raoogã pʋga, n wa kʋɩɩs a koomã ne a bulsã. Sẽn-Ka-Saab n na n wa fã laogã sẽn yaa te-sõama fãa.