A Ooze 10 - WẼNNAAM SEBRE 2014

Israyɛll soolmã sɛɛbo

¹ Israyɛll dag n yaa reezẽ tɩɩg sẽn be zĩ-sõngẽ, n womd biisi. La a biisã sõor sẽn dag n lebgd wʋsgã, a paasda a tẽn-kugã me sõore. A paoongã sẽn dag n paasdã, a manega a kug-vigindsã tɩ b lebg neeba.

² Bãmb yaa yam a yiib rãmba. Moasã, bãmb kongrã na n luɩ b zugu. Sẽn-Ka-Saab na n wãa bãmb tẽn-kugã.

³ La moasã, bãmb yetame: Tõnd ka tar dĩm ye. Bala, tõnd ka zoe Sẽn-Ka-Saab rabeem ye. La rĩmã, bõe la a na n maan tõnd yĩnga?

⁴ Bãmb wẽeda nokoɛɛma, n wẽend zĩrẽ-be-wẽenego, la b maand kaoola. Sɩbgrã na n yii wa tɩɩg sẽn tar zẽnem sẽn yit pʋt vũgsẽ.

⁵ Samaari nebã na n zoee rabeem Bet-Avɛn nag-sadsã poorẽ. Nebã na n yãb n kaasa a yĩnga. La maan-kʋʋdb nins sẽn waoogd-a wã na n diga ne rabeem a yĩnga, la a ziirã sẽn na n yi n bas-a wã yĩnga.

⁶ B na n dɩk-a lame n kõ Asiiri, t'a yɩ yaood rĩm-kãsengã yĩnga. Yãnd na n yõka Efrayiim buudã, Israyɛll saag-wẽnsã yãnd na n yõk-a lame.

⁷ Samaari wãame, la a rĩmã yaa wa tɩɩg will sẽn daeed koom zugu.

⁸ B na n sãama maoong kʋʋb zĩis nins Israyɛll sẽn dag n maand yel-wẽn-kãsemsã b zutã. Gõos ne tuud na n yii b tẽn-kugã zutu. Bãmb na n yeela tãmsã tɩ b bus-ba, la b yeel kunkubã tɩ b lʋɩ n yẽeg-ba.

⁹ Hal sẽn sɩng Gɩbeya, foom a Israyɛll maana yel-wẽna. Bãmb paa yel-wẽn-kãens pʋga, la zabrã na n paama nin-wẽnsã Gɩbeya.

¹⁰ Mam na n sɩbg-b-la wa m sẽn date. B beegr a yiibã yĩnga, buud toay-toay na n tigma taaba n zab ne bãmba.

¹¹ A Efrayiim dag n yaa nag-sad-wubdg sẽn nong n tabd koodo. La maam n balg a yublã sẽn yaa neerã. Mam soga Efrayiim buudã ne wãka, Zʋʋda na n koome. La Zakoob buudã na n taka wãkã.

¹² Israyɛll nebã, maan-y sẽn yaa tɩrga, la y maan sẽn zems sɩda. Tuk-y pʋ-paalle! Wakat taame tɩ y tog n bao Sẽn-Ka-Saabo, hal tɩ b wa kɩt tɩ tɩrlem zĩnd yãmb sʋka.

¹³ Yãmb bʋda wẽnga, n tigs zãmbo, Yãmb dɩɩ zĩrẽ yagb rɩɩbo. Israyɛlle, fo sẽn teeg f meng pãngã, la f teeg f gãndaadã sõorã yĩnga,

¹⁴ bʋr-kãseng na n yii fo nebã sʋka, la fo tẽms nins sẽn gũbg ne lalsã na n sãama wa a Salman sẽn zab ne Bɛt-Arbɛlle, n sãam-a wa b sẽn kʋ ma n naag a kambã.

¹⁵ Yaa woto n na n paam Betɛlle, wẽng ning yãmb sẽn maanã yĩnga. Zĩigã sã n yẽege, Israyɛll dĩmã na n sãamame.