A Neemi 9 - WẼNNAAM SEBRE 2014

Israyɛll nebã yel-wẽn sugr kosgo

¹ Kiu-kãng rasem pisi la a naasã daare, Israyɛll nebã yeelga boto, n yug b mens tom, la b tigim taab n na n loe noore.

² Neb nins sẽn yaa Israyɛll buudã welga toor n bas sãambã, n na n tɩ kos bãmb yel-wẽnã ne b yaab-rãmbã kongrã sugri.

³ Bãmb yik n yalsa yĩngr lɛɛr a tãabo, n kelg Sẽn-Ka-Saab sẽn yaa bãmb Wẽnnaamã tõodã sebr kaorengo. Bãmb leb n dɩka lɛɛr a tãab yɛs n yĩgimd Sẽn-Ka-Saab sẽn yaa bãmb Wẽnnaamã taoor n na n kos b yel-wẽnã sugri.

⁴ La a Zozoe ne a Baani, la a Kadmiyɛlle, ne a Sebaniya, la a Buni, ne a Serebiya, la a Bani ne a Kenani yalsa Leevi-rãmbã rʋʋdgã zugu, n zẽk b koees n kelem n bool Sẽn-Ka-Saab sẽn yaa bãmb Wẽnnaamã.

⁵ Dẽ, a Zozoe ne a Baani, la a Kadmiyɛlle, ne a Hasabneya, la a Serebiya, ne a Hodiya, la a Sebaniya ne a Petahiya sẽn yaa Leevi buudã nebã zẽka b koees n yeel yaa: «Yik-y yĩngri! Pʋʋs-y Sẽn-Ka-Saab sẽn yaa yãmb Wẽnnaamã barka! Pʋʋs-y bãmb bark wakat fãa!» Bɩ yãmb yʋʋrã sẽn tar ziirã paam pẽgre, yãmb yʋʋrã yɩɩda bark la waoogr buudã fãa!

⁶ Yãmb y yembr bal n yaa Sẽn-Ka-Saabo! Yãmb n naan saasã, yãmb n naan saasẽ-saasẽ ne a ãdsã fãa, la y naan tẽn-gãongã ne bũmb nins sẽn be a pʋgẽ wã, la y naan ko-kãsemsã ne b pʋsẽ teedã fãa, yãmb n kõt bõn-naandsã fãa vɩɩm, yĩngr ãdsã fãa wõgemdeda yãmb taoore.

⁷ Sẽn-Ka-Saabo, yaa yãmb a Wẽnnaam, n yãk a Abram, n yiis Ʋʋr sẽn be Kalde-rãmbã tẽngẽ wã, n pʋd bãmb yʋʋr t'a Abrahaam.

⁸ Yãmb yãndame tɩ b kɩsa sɩd ne yãmbã, dẽ, yãmb maana kaool ne bãmba, n kãab bãmb n yeel tɩ y na n kɩtame tɩ b yagensã soog Hɛt-rãmbã, Kana-rãmbã ne Amoor-dãmbã, Perɛɛz-rãmbã la Zebuus-rãmbã, ne Girgaaz-rãmbã tẽmse. La yãmb sɩd pidsa y gomdã. Bala, yãmb yaa tɩrlem soaba.

⁹ Yãmb yãnda tõnd yaab-rãmbã namsgã Ezɩpt tẽngã pʋgã. La yãmb wʋma b sẽn dag n be rudum ko-kãsengã noor n kelemd n kot yãmb sõngrã.

¹⁰ Yãmb maana bãna, la bõn-yɛɛsds n sɩbg Ezɩpt rĩm a Faarõ, la y sɩbg neb nins sẽn dag n be ne yẽnda wã, ne a tẽngã nebã fãa. Bala, yãmb dag n miime tɩ b wukda b mens n namsd tõnd yaab-rãmbã, la yãmb kɩtame tɩ y yʋʋrã yi, wa a sẽn ket n yaa to-to rũndã wã.

¹¹ Yãmb kɩtame tɩ ko-kãsengã pãrg bãmb taoore, tɩ b tab tẽn-koɛɛng n pɩʋʋge. La yãmb loba sẽn dag n digd-b bãmbã ko-zulumsã pʋsẽ, bãmb lisa bõra, wa b sẽn lob kugr ko-kãseng pʋga.

¹² La wĩndga, yãmb tɛta y nebã ne sawaodgo, la yʋngo, yãmb tɛt-b-la ne bug-witim sẽn vẽnegd bãmb sorã.

¹³ Yãmb yii saasẽ n sig Sinayi tãngã zug n gom ne bãmba. Yãmb kõo bãmb no-tũuds sẽn yaa tɩrse, la y kõ-b zãmsg sẽn yaa sɩda, la tõod sẽn yaa tɩrse, ne minind sẽn zems zãnga.

¹⁴ Yãmb kɩtame tɩ y tʋmtʋmd a Moyiis wilg bãmb y vʋʋsg daarã sẽn welg toorã. La yãmb kɩtame t'a zãms bãmb tõodã koees a taabã.

¹⁵ Yãmb kɩtame tɩ bur yi yĩngr n sig tɩ b rɩ n yiis b kom, la y kɩt tɩ koom pusg pĩig zug n yi, tɩ b yũ n yiis b ko-yũudu. La yãmb yeel-b lame tɩ b kẽng n tɩ reeg tẽng ning yãmb sẽn dag n zẽk y nug n wẽen n yeel tɩ y na n kõ-b lame tɩ b soogã.

¹⁶ La bãmba ne tõnd yaab-rãmbã wuka b mense, n kɩɩs yãmba, la b ka sak yãmb tõodã ye.

¹⁷ Bãmb zãgsame n ka kelg yãmb ye. La b ka tẽeg bõn-bãnã yãmb sẽn maan n kõ bãmbã yell ye. Bãmb kɩɩsgã pʋga, b kenga b sũyã, n yãk taoor soab n dat n lebg n leb b yembdã pʋg Ezɩpt tẽnga. La baa ne rẽ fãa, yãmb yaa Wẽnnaam sẽn kõt sugri, la y yaa nimbãan-zoɛta, la y yaa maan-neer soaba, la y sũur ka yikd tao-tao ye, la yãmb nonglmã sẽn yaa kãsengã yĩnga, yãmb ka bas-b ye.

¹⁸ Bãmb tol n dɩka kut n yẽneg n maan nag-bil n yeel yaa: ‹Ad yãmb Wẽnnaam ning sẽn yiis-a yãmb Ezɩpt tẽngã!› Bãmb maana woto n paoog yãmb yʋʋrã wʋsgo.

¹⁹ Yãmb nonglmã sẽn yaa wʋsgã yĩnga, yãmb ka bas bãmb we-raoogã pʋg ye. La sawaodgã ka bas bãmb yãagr wĩndg ye, la yʋngo, bug-witmã kell n yãaga bãmb sorã zug tɩ b kẽnda.

²⁰ Yãmb sõmblmã yĩnga, yãmb kõ-b-la yãmb yam-sõngã, tɩ b tõe n paam bãngre, la yãmb kõo bãmb mandã tɩ b rɩ, la y kõ-b-la koom tɩ b yũ n yiis b ko-yũudu.

²¹ Yãmb gesa bãmb yell we-raoogã pʋg yʋʋm pis-naase, la bũmb ka paoog bãmb ye. Bãmb futã ka ki, la b naoã me ka mod ye.

²² Yãmb kɩtame tɩ b tõog tẽmse, la buud toay-toaya. Bãmb sooga soolem toay-toaya. Bãmb deega Ɛsbon dĩm a Sihon tẽngã, ne Basan dĩm a Oog tẽngã.

²³ Yãmb kɩtame tɩ b kambã fɩɩge, n lebg wʋsg wa ãdsã sẽn be yĩngrã, la yãmb kɩtame tɩ b kẽ tẽng ning yãmb sẽn dag n wẽen n yeel tɩ b yaab-rãmbã na n tɩ reeg n soogame wã pʋgẽ.

²⁴ La bãmb kambã sɩd kẽeme n deeg tẽngã n sooge. Yãmb ninga Kana tẽngã rãmb yãnd bãmb taoore, n kɩt tɩ b tõog-b ne b rĩm-dãmbã, la b tẽngã nebã, n maan-b wa b sẽn date.

²⁵ Bãmb deesa tẽms sẽn tar pãnga, la b rees zĩis sẽn sakd koodo. Bãmb deesa rot sẽn pid ne laog buud toor-toore, la b rees buls b sẽn zoe n tu. Bãmb reesa reezẽ tɩɩs pʋt ne oliiv tɩɩs pʋto, la b rees tɩɩs wʋsg sẽn womd biisi. Yãmb sõmblmã sẽn yaa kãsengã yĩnga, bãmb dɩɩme n tɩg n nobe, la b vɩɩmda naar pʋga.

²⁶ La bãmb yik n kɩɩsa yãmba, n tud yãmb b kãare, n wẽnemd n bas yãmb tõodã, la b kʋ yãmb no-rɛɛsdb nins sẽn dag n keoogd bãmb tɩ b lebg n wa tũ yãmbã. La bãmb paooga yãmb yʋʋrã wʋsgo.

²⁷ Dẽ, yãmb basame tɩ b bɛɛbã tõog-ba, n nams-ba. La bãmb sũ-sãangã wakate, b kelmame n bool yãmba. La yãmb zĩnda saasẽ, n wʋm b kelemsã, la yãmb nimbãan-zoeerã sẽn yaa kãsengã yĩnga, yãmb tʋma fãagdb tɩ b wa fãag bãmb b bɛɛbã nusẽ.

²⁸ La bãmb sẽn wa n paam vʋʋsgã, bãmb leb n sɩngame n maand wẽngã yãmb taoore. Dẽ, yãmb leb n bas-b lame tɩ b bɛɛbã tõog-ba, n nams-ba. La bãmb leb n kelmame yɛs n bool yãmba, tɩ yãmb zĩnd saasẽ n wʋm b kɛlengã, la y nimbãan-zoeerã sẽn yaa kãsengã yĩnga, yãmb fãaga bãmb naoor wʋsgo.

²⁹ Yãmb keooga bãmb n yeel-b tɩ b sak yãmb tõodã. La bãmb tɩtaamã yĩnga, b ka kelg yãmb noyã ye. Bãmb kɩɩsa yãmb no-tũudsã. Yaool n yaa no-tũuds nins sẽn kõt neb nins sẽn sakd-bã vɩɩm. Bãmb yĩgsa b bãgdo, n nak b kãare, n ka sak n kelg yãmb ye.

³⁰ Yãmb maana sũ-mar ne bãmb n kaoos yʋʋm wʋsgo. Yãmb tũnuga y no-rɛɛsdbã n keoog bãmb ne yãmb Sɩɩgã pãnga, la bãmb ka kelg ye. Dẽ, yãmb kɩtame tɩ tẽn-zẽms neb tõog-ba.

³¹ La yãmb nimbãan-zoeerã sẽn yaa kãsengã yĩnga, yãmb ka sãam-ba, la y ka bas-b me ye. Bala, yãmb yaa Wẽnnaam sẽn yaa sugr soaba, la nimbãan-zoɛta.

³² Moasã, tõnd Wẽnnaam, yãmb yaa Wẽnnaam-kãseng sẽn tar pãnga, n tõe fãa, yãmb ka viigd y kaool ye, la y yaa pʋ-peelem soaba. Bɩ y ra ges tood nins sẽn paamd tõndã wa bõn-yaalg ye. Toogã paamda tõndo, d rĩm-dãmbã, d nanambsã, ne d maan-kʋʋdbã, la d no-rɛɛsdbã, ne d yaab-rãmbã, ne yãmb nebã fãa. Yaa sẽn sɩng ne Asiiri rĩm-dãmbã zamaan n tãag rũndã.

³³ Yell ning fãa sẽn paam tõndã, wilgdame tɩ yãmb yaa sɩd soaba, bala, yãmb wilgame tɩ y yaa sɩd soaba, la yaa tõnd n maan wẽnem.

³⁴ Tõnd dĩm-dãmbã ne d nanambsã, la d maan-kʋʋdbã, ne d yaab-rãmbã ka sak n tũ yãmb tõodã ye. La b ka kelg y noyã ne y keoogrã yãmb sẽn keoog bãmbã ye.

³⁵ Bãmb sẽn dag n wa n ket n be b soolmẽ wã, n be bãmb bõn-sõama nins fãa yãmb sẽn kõ-bã pʋgã, yãmb kɩtame tɩ bãmb zĩnd tẽn-yaleng sẽn yaa bʋgsg pʋgẽ, la bãmb ka sak n wẽnemd n bas b manesem-wẽnsã n tũ yãmb ye.

³⁶ Rẽ kɩtame tɩ rũndã, tõnd be yembd pʋga! Tõnd bee yembd pʋga, tẽng ning yãmb sẽn dag n kõ tõnd yaab-rãmbã, tɩ b tõe n dɩ tẽngã tɩɩs biisi, la b paam a laogã!

³⁷ Tẽngã tara laog wʋsgo, la tõnd beegrã yĩnga, yãmb kɩtame tɩ rĩm-dãmb soog tõndo, b soo tõnd mensã la b so d rũmsã n maand b sẽn date, n kɩt tɩ tõnd be sũ-sãan-kãseng pʋga.