A Neemi 8 - WẼNNAAM SEBRE 2014

A Ɛsdraas karma tõodã sebr nebã taoore

¹ Nebã fãa tigma taab ne yam a yembr Zeruzalɛm tẽngã pʋga, bãmb tigma taab noor ning b sẽn boond tɩ koom noorã nen-taoore. La Israyɛll nebã kosa a Ɛsdraas sẽn yaa gʋlsdã t'a tall tõodã sebr wa. Yaa tõod nins Sẽn-Ka-Saab sẽn dag n kõ a Moyiis t'a kõ Israyɛll nebã.

² Dẽ, maan-kʋʋd a Ɛsdraas talla tõodã sebr n wa zãma wã taoore. Yaa pagb la raopa, ne neb nins fãa sẽn tõe n kelg n wʋm a võorã taoore. Rag n yaa kiuug a yopoe soabã pipi daare.

³ A Ɛsdraas yalsa koomã rignoor sɛɛga, pagbã la raopa, ne neb nins fãa sẽn tõe n kelg n wʋm a võorã taoore, n karem tõodã sebr yibeoog n tɩ tãag wĩnto-sʋka. La nebã fãa rag n kelgda tõodã sebr kaoreng neer-neere.

⁴ Gʋlsd a Ɛsdraas rag n dʋʋ ra-pegdã b sẽn maneg n ti kaorengã yĩngã zugu, n yals yĩngri. Neb nins sẽn dag be yẽnda nug-rɩtgã: Yaa a Matitiya, a Sema, a Anaya, a Uuriya, a Hilkiiza, ne a Maseya. La neb nins sẽn dag n be-b yẽnda goabgã, yaa a Pedaya, a Misayɛlle, a Malkiya, a Hasum, a Hasebadana, a Zakari, ne a Mesulam.

⁵ A Ɛsdraas sẽn dag n beẽ wã zãntame n yɩɩd nebã sẽn beẽ wã, la nebã fãa rag n ne-a lame. Dẽ, yẽnda sẽn lak sebrã, nebã fãa yika yĩngri.

⁶ La a Ɛsdraas pʋʋsa Sẽn-Ka-Saab sẽn yaa Wẽnnaam-kãsengã barka, la nebã fãa zẽka b nus n yeel tɩ Ãmina! Ãmina! La bãmb zõondame n wõgemd Sẽn-Ka-Saab taoor n fõgen b nens tẽnga.

⁷ Rẽ poore, bãmb roogame, la a Zozoe, a Baani, a Sereviya, a Yamindi, a Akuubi, a Sabetayi, a Hodiya, a Maseya, a Kelita, a Azariya, a Yozabaade, a Hanane, ne a Pelaya sɩngame n bilg nebã tõodã võore, la nebã rag n ket n yasa yĩngr zĩ-kãnga

⁸ Bãmb dag n karemda Wẽnnaam tõodã sebr sõama vẽeneg-vẽenega, la b bilgd a võorã tɩ ned kam wʋmd b sẽn karmã sẽn dat n yeel a soaba.

⁹ Dẽ, gʋvɛrneer a Neemi, ne maan-kʋʋd a Ɛsdraas sẽn yaa gʋlsdã, ne Leevi buudã neb nins sẽn dag n bilgd tõodã võorã yeela nebã fãa yaa: «Rũndã daarã yaa daar sẽn welg toor Sẽn-Ka-Saab yĩnga. Rẽ wã, ka neer tɩ y sãam y sũyã, n yãb ye.» Bala nebã fãa sẽn wʋm kaorengã b yãbame.

¹⁰ La a Ɛsdraas yeela nebã yaa: «Kuil-y-yã! Kẽng-y n tɩ bao-y rɩ-nood n dɩ, la y bao bõn-yũudlɩ sẽn yaa noog n yũ, la y yãk rɩɩbã n kõ neb nins sẽn ka tõog n seglã! Bala, rũndã daarã yaa daar sẽn welg toor tõnd Zu-soabã yĩnga. Da maan-y sũ-sãang ye! Yaa sũ-noog ning sẽn yit Sẽn-Ka-Saab nengẽ wã n kõt yãmb pãnga.»

¹¹ Leevi buudã belsa nebã n yeel-b yaa: «Sĩnd-y la y ra yãb ye! Rũndã daarã yaa daar sẽn welg toore. Da maan-y sũ-sãang ye!»

¹² Dẽ, nebã fãa kuilame n na n tɩ rɩ la b yũ, la b yãk rɩɩb n kõ sẽn ka tar-bã, la b maan tig-kãsenga, bala, bãmb wʋma goam nins b sẽn bilg bãmbã võore.

Zãn tigri

¹³ Rasem a yiibẽ daarã, Israyɛll buudã nanambsã, ne maan-kʋʋdbã la Leevi nebã tigma taab a Ɛsdraas sẽn yaa gʋlsdã nengẽ, n na n maneg n kelg tõodã zãmsg sõama n paase.

¹⁴ Bãmb yãndame tɩ b gʋlsa tõod nins Sẽn-Ka-Saab sẽn kõ a Moyiisã pʋgẽ, n yeel tɩ kiuug a yopoe soabã tigrã pʋga, Israyɛll nebã tog n zĩnda zãn tẽngre.

¹⁵ La b tog n bãnga bõn-kãnga, n moon-a n togs b tẽmsã fãa pʋse, la ne Zeruzalɛm pʋgẽ wã me, n yeel nebã yaa: «Kẽng-y tãmsã zut n tɩ kao oliiv tɩ-sends vãado, wall weoog oliiv tɩɩs vãado, ne mirt tɩɩs vãado, la koms vãado, ne tɩ-poal vãado, n wa maan zãna, wa sẽn gʋls tõodã sebr pʋgẽ wã.»

¹⁶ Dẽ, Israyɛll nebã kẽng n tɩ kɛɛ vãadã n wa. La ned kam fãa wa n tii zãnde. Kẽer tii b gãosg zugu, tɩ kẽer ti b zakã pʋga, la kẽer me tii Wẽnd doogã zak pʋga, la kẽer tii rignoor ning b sẽn boond tɩ koom rignoorẽ wã, ne noor ning b sẽn boond tɩ Efrayiim rignoorẽ wã.

¹⁷ Dẽ, Israyɛll neb nins fãa sẽn yi yembdã pʋg n lebg n wa wã tii zãn n kẽ n zĩnd b pʋse. Sẽn sɩng a Nun biig a Zozoe zamaan hal tɩ ta badaare, Israyɛll nebã rag n ka leb n maan bũmb a woto buud ye. La yɩɩ kɩdeng meng-meng daare.

¹⁸ La tigrã pipi daarã, n tɩ tãag a yaoolem daarã, b rag n karemda Wẽnnaam tõodã daar fãa. Tigrã kaoosa rasem a yopoe, la rasem a niiẽ wã daare, bãmb maana tigin-kãsenga, wa sẽn zems no-tũudrã.