A Neemi 7 - WẼNNAAM SEBRE 2014

A Neemi yãka nanambse

¹ B sẽn wa n me lalgã n sɛ wã, mam kɩtame tɩ b lebs n lug a kʋɩlemsã. Rẽ zugẽ, tõnd yãka tẽngã rignoy gũudba, ne yɩɩn-yɩɩndba, la d kɩt tɩ Leevi buudã rɩk b tʋʋmde.

² Mam kõo noor tɩ b yãk m saam-biig a Hanani, ne tãb-biisã naab a Hananiya sẽn yaa sɩd soaba, n yaa ned sẽn zoet Wẽnnaam wʋsg n yɩɩd neb a taabã, n yeel-b tɩ b soog Zeruzalɛm tẽngã.

³ Mam yeela bãmb yaa: «Wĩntoogã sã n nan ka zẽke, bɩ y ra pak tẽngã noy ye. La y pag rignoyã sõama, tɩ gũudbã ket n be beenẽ. Gũudbã sã n ka ket b zĩigẽ wã, b tog n paga kʋɩlemsã sõama. B tog n kɩtame tɩ Zeruzalɛm tẽngã neb gũ tẽngã n dees taaba. Neb kẽer na n gũuda tẽngã noyã, tɩ neb a taabã ned kam fãa gũuda a roogo.»

⁴ Tẽngã rag n yalmame, la a bedmame, la nebã sẽn dag n be a pʋgẽ wã sõor dag n ka waoog ye. La b rag n nan ka lebs n me rotã ye.

Zʋɩf-rãmb nins sẽn lebg n wa wã yʋy

⁵ Mam Wẽnnaamã ninga mam yamẽ, tɩ m tigim kãsem-dãmbã ne nanambsã, ne neb a taabã sẽn ketã, n sõd-ba. Mam gesa sẽn deng n yi-b yembdã pʋg n wa wã sõadg sebrẽ, la m yãndame tɩ b gʋlsa beenẽ a woto:

⁶ Ad neb nins Babilond naab a Nebukatnedzaar sẽn dag n yõg n tɩ kẽes yembdã sʋk neb kẽer sẽn yi beenẽ n lebg n wa Zeruzalɛm ne Zʋʋda tẽngã pʋgã. La ned kam fãa kuila a meng tẽngẽ.

⁷ Ad neb nins sẽn tall bãmb n wa wã yʋya: Yaa a Zorobabɛlle, a Zozoe, a Neemi, a Azariya, a Raamiya, a Nahamani, a Mordokayi, a Bilsãn, a Misperɛte, a Bigvayi ne a Nehum la a Baana. Ad Israyɛll neb nins sẽn tũ bãmb n wa wã sõore.

⁸ A Paryoos yagensã yaa neb tus a yiib la koabg la pis-yopoe la a yiibu,

⁹ t'a Sefatiya roogã neb yaa kobs-tã la pis-yopoe la a yiibu,

¹⁰ t'a Aara roogã neb yaa kobs-yoob la pis-nu la a yiibu,

¹¹ la a Pahat-Moaab roogã neb sẽn yaa a Zozoe ne a Zoaab yagensã yaa neb tus a yiib la kobs-nii la piig la a nii,

¹² t'a Elam roogã neb yaa tusr la kobsi la pis-nu la a naase,

¹³ t'a Zatu roogã neb yaa kobs-nii la pis-naas la a nu,

¹⁴ t'a Zakayi roogã neb yaa kobs-yopoe la pis-yoobe,

¹⁵ t'a Binui roogã neb yaa kobs-yoob la pis-naas la a nii,

¹⁶ t'a Bebayi roogã neb yaa kobs-yoob la pisi la a nii,

¹⁷ t'a Azgaad roogã neb yaa tus a yiib la kobs-tã la pisi la a yiibu,

¹⁸ t'a Adonikam doogã neb yaa kobs-yoob la pis-yoob la a yopoe,

¹⁹ t'a Bigvayi roogã neb yaa tus a yiib la pis-yoob la a yopoe,

²⁰ t'a Adin doogã neb yaa kobs-yoob la pis-nu la a nu,

²¹ la a Ezekɩyaas ned a Atɛɛr roogã neb yaa pis-wɛ la a nii,

²² t'a Asum doogã neb yaa kobs-tã la pisi la a nii,

²³ t'a Besayi roogã neb yaa kobs-tã la pisi la a naase,

²⁴ t'a Harif roogã neb yaa koabg la piig la a yiibu,

²⁵ t'a Gabawõ roogã neb yaa pis-wɛ la a nu,

²⁶ la Betlehɛm ne Netofa nebã yaa koabg la pis-nii la a nii,

²⁷ tɩ Anatot nebã yaa kobg la pisi la a nii,

²⁸ tɩ Bɛt-Avmawɛt nebã yaa pis-naas la a yiibu,

²⁹ la Kiryat-Yeyarim ne Kefɩra la Beerot nebã yaa kobs-yopoe la pis-naas la a tãabo,

³⁰ tɩ Rama ne Geeva nebã yaa kobs-yoob la pisi la a yembre,

³¹ tɩ Mikmaas nebã yaa koabg la pisi la a yiibu,

³² tɩ Betɛll ne Ayi nebã yaa koabg la pisi la a tãabo,

³³ la Neebo tẽng a to wã nebã yaa pis-nu la a yiibu,

³⁴ tɩ Elam a to me yagensã sõor yaa tusr la kobsi la pis-nu la a naase,

³⁵ t'a Harim roogã neb yaa kobs-tã la pisi,

³⁶ t'a Zeeriko roogã neb yaa kobs-tã la pis-naas la a nu,

³⁷ la a Lood ne a Hadiid la a Ono roogã neb yaa kobs-yopoe la pisi la a yembre,

³⁸ t'a Sena roogã neb tus a tãab la kobs-wɛ la pis-tã,

³⁹ la maan-kʋʋdbã, rat n yeel t'a Yedaya sẽn yaa a Zozoe roogã neb yaa kobs-wɛ la pis-yopoe la a tãabo.

⁴⁰ A Imeer doogã neb yaa tusr la pis-nu la a yiibu,

⁴¹ t'a Pasehʋʋr doogã neb yaa tusr la kobsi la pis-naas la a yopoe,

⁴² t'a Harim doogã neb yaa tusr la piig la a yopoe,

⁴³ La maan-kʋʋdbã sẽn yaa Leevi buudã, sẽn yaa a Zozoe yagensã, rat n yeel t'a Kadmiyɛll ne a Hodwa neb yaa pis-yopoe la a naase.

⁴⁴ La yɩɩn-yɩɩndbã sẽn yaa a Azaf yagensã yaa neb koabg la pis-naas la a nii,

⁴⁵ Zag-noy gũudbã, a Salum ne a Atɛɛre, la a Talmon, ne a Akuub la a Hatita ne a Sobayi yagensã fãa yaa neb koabg la pis-tã la a nii.

⁴⁶ Ad tʋmtʋmdbã: yaa a Siha ne a Hasufa, la a Tabaot yagensã,

⁴⁷ ne a Keroose, la a Siya, ne a Padon yagensã,

⁴⁸ ne a Levana yagensã, la a Hagaava yagensã, ne a Salmayi yagensã,

⁴⁹ la a Hanan yagensã, ne a Gidɛll yagensã, la a Gahaar yagensã,

⁵⁰ ne a Reyaya yagensã, la a Resin yagensã, ne a Nekoda yagensã,

⁵¹ la a Gaazam yagensã, ne a Uuza yagensã, la a Paseya yagensã,

⁵² ne a Bezayi yagensã, la a Mewunim yagensã, ne a Nefisim yagensã,

⁵³ la a Bakbuk yagensã, ne a Hakufa yagensã, la a Harʋʋr yagensã,

⁵⁴ ne a Baslit yagensã, la a Mehida yagensã, ne a Harsa yagensã,

⁵⁵ la a Barkoos yagensã, ne a Sizeera yagensã, la a Tama yagensã,

⁵⁶ ne a Nesiyat yagensã, la a Hatifa yagensã.

⁵⁷ A Salmo tʋmtʋmdbã yagens yaa a Sotayi yagensã, a Soferɛt yagensã, la a Perida yagensã,

⁵⁸ ne a Yaala yagensã, la a Darkon yagensã, ne a Gidɛll yagensã,

⁵⁹ la a Sefatiya yagensã, ne a Hatill yagensã, la a Pokerɛt-Ha-Sebayim yagensã, ne a Amo yagensã.

⁶⁰ Wẽnnaam doogã tʋmtʋmdbã zãnga, ne a Salmo yembsã kamb fãa sõor yaa neb 392.

⁶¹ Ad neb nins sẽn yi Tɛll-Mela, ne Tel-Harsa, la Keruub-Adõn, ne Imeer n wa, n yaool n ka tõog n wilg tɩ bãmb ba wã roogo, wall b buudã yaa Israyɛll buudã.

⁶² Bãmb fãa sõorã rag n yaa neb kobs-yoob la pis-naas la a yiibu, la bãmb yaa a Delaya ne a Tobiza la a Nekoda yagense.

⁶³ Maan-kʋʋdbã sʋk me, yaa a Hobaya yagensã, ne a Hakoos yagensã, la a Barzɩlayi yagensã. A Barzɩlayi rag n peega Galaad rao a Barzɩlayi bi-pugl n maan a paga, tɩ b kell n dɩk a rɛɛmbã yʋʋr n pʋd-a t'a Barzɩlayi.

⁶⁴ Bãmb vɛɛsa b yaab-rãmbã sõadg sɛb pʋse, n na n ges b sã n yaa Israyɛll buudu, la bãmb ka yã bũmb sẽn wilgd tɩ b yaa Israyɛll buud ye. Dẽ, b geelga bãmb wa bu-rẽgdo, la b yiis-b-la maan-kʋʋr tʋʋmdã pʋga.

⁶⁵ La gʋvɛrneerã meng yeela bãmb tɩ b ra tol n dɩ kũunã sẽn welg toorã rɩɩbo, hal tɩ maan-kʋʋdã sok Wẽnnaam ne Urim la Purim n ges b sã n segd n dɩɩme wal b ka segd n dɩ.

⁶⁶ Israyɛll neb nins sẽn yi yembdã pʋg n lebg n wa wã fãa sõor yaa neb tus-pis-naas la a yiib la kobs-tã la pis-yoobe.

⁶⁷ La yaa sẽn ka naag ne bãmb tʋmtʋmd-pogsã la tʋmtʋmd-raopã sõor sẽn yaa tus a yopoe la kobs-tã la pis-tã la yopoe, n paas yɩɩn-yɩɩndba, pagb ne raop kobsi la pis-naas la a nu n dag n be b sʋka.

⁶⁸ Bãmb dag n tara yʋgma kobs-naas la pis-tã la a nu, ne bõens tus a yoob la kobs-yopoe la pisi.

⁶⁹ Buudã kãsem-dãmbã kẽer kõo kũun tʋʋmdã yĩnga. La gʋvɛrneerã kõo sãnem wakɩ-koeems tusri, ne laas pis-nu, la maan-kʋʋr fut kobs-nu la pis-tã.

⁷⁰ Buudã kãsem-dãmbã sẽn kõ kũunã tʋʋmdã yĩngã yaa sãnem wakɩ-koeems tus-pisi, ne wanzuri sẽn tat kɩlo tus a yiib la kobsi.

⁷¹ La Israyɛll neb a taabã kõo sãnem wakɩ-koeems tus-pisi, ne wanzuri kɩlo tusri, la maan-kʋʋr fut pis-yoob la a yopoe.

⁷² Woto, maan-kʋʋdbã ne Leevi buudã, la zag-noy gũudbã, ne yɩɩn-yɩɩndbã, la nebã pʋɩ-sʋka, Israyɛll neb a taab sẽn yaa Wẽnd doogã tʋmtʋmdbã, ne Israyɛll neb a taabã ned kam fãa kẽng n tɩ kẽ b meng tẽmsẽ wã. La kiuug a yopoe soabã sẽn wa n na n ta, tɩ Israyɛll yagensã ned kam fãa be a tẽngẽ.