A Neemi 6 - WẼNNAAM SEBRE 2014

Bɛɛbã leb n seda taab n dat n sãam tʋʋmdã

¹ A Sãmbalat ne a Tobiza, la a Gesɛm sẽn yaa Araabã, ne tõnd bɛɛb a taabã wʋmame tɩ mam tõog n lebs n mee Zeruzalɛm tẽngã lalga, t'a ka leb n yaa weds ye. Wakat-kãng tɩ mam dag n nan ka lugl tẽngã noy kʋɩlems ra-lugdsã ye.

² A Sãmbalat ne a Gesɛm tʋmame tɩ b wa bool maam tɩ m wa tɩ d seg taab Kafirim tẽngã sẽn be Ono tãngã longẽ wã. Bãmb dag n tagsd n dat n maana maam wẽnga.

³ Dẽ, mam tʋma neb tɩ b tɩ leok-b n yeele: «Mam ket n tara tʋʋm-kãsenga, rẽ wã, mam ka tõe n bas tʋʋmdã n wa seg yãmb ye.»

⁴ Bãmb tʋmame n bool maam sẽn tat naoor a naase, la wakat fãa, mam leokda bãmb wa pĩndã bala.

⁵ La baoosgo, a Sãmbalat tʋma a meng rakõorã naoor a nu soabã, t'a tall sebr sẽn ka page, n wa kɩs maam.

⁶ A yeela a sebrã pʋg yaa: «Bu-zẽmsã sʋka, b gomda vũn-vũni, la a Gasmu mengã yeelame tɩ foom ne Zʋʋda nebã tagsdame n dat n yik n kɩɩs rĩmã noore. Tɩ yaa rẽndã yĩng n kɩt tɩ yãmb yik n lebs n met lalgã. Sẽn paas me, b yeelame tɩ fo ratame n lebg bãmb dĩma.

⁷ B tol n gomdame meng tɩ fo yãka f no-rɛɛsdb tɩ b na n moon Zeruzalɛm tẽngã pʋgẽ n yeel tɩ fo lebga Zʋʋda nebã rĩmã. Moasã, bãng tɩ Pɛrs-rãmbã rĩm ka tõe n ka wʋm yel-kãngã ye. Rẽ wã, wa tɩ d seg taab n yẽse.»

⁸ Dẽ, mam tʋmame tɩ b tɩ leok a Sãmbalat yaa: «Fo sẽn togsdã ba a yembr ka sɩd ye. Yaa fo mengã n naan bõn-kãensã fãa.»

⁹ Sɩdã, nin-bãmbã fãa rag n makdame n dat n kẽes tõnd dabeem. Bãmb dag n tagsdame tɩ tõnd daoodã na n boogame tɩ d bas tʋʋmdã tɩ lʋɩ. «Moasã, Zu-soaba, mam kot-y lame tɩ y kõ maam pãnga.»

¹⁰ Daar a yembre, mam kẽng n na n tɩ gesa a Metabeyɛll yageng a Semaya sẽn yaa a Delaya biigã, la mikame tɩ yẽnda rag n paga a meng roogẽ. A yeelame yaa: «Wa tɩ d seg taab Wẽnd doogã pʋgẽ, n kẽng zĩ-sõngã pʋga, la d pag kʋɩlemsã neere, bala, bɛɛbã rat n wa kʋʋ foom, la yaa yʋngã la b rat n wa kʋ-fo.»

¹¹ Mam leoka yẽnda yaa: «Rẽ yĩnga, rao wa maamã leb n baood n zoeeme? Ned wa maamã na leb n zoet n na n kẽ Wẽnd doogẽ n fãag a yõore? Mam sã n maan a woto, mam na n kiime, dẽ wã, mam ka na n kẽng Wẽnd doogẽ wã ye.»

¹² Mam dag n bãngame t'a sẽn togsd maamã ka yit Wẽnnaam nengẽ ye. Yaa a Tobiza ne a Sãmbalat n yao yẽnda ligd n yeel-a t'a gom ne maam a woto.

¹³ Woto fãa, yaa sẽn na n kẽes maam dabeem, tɩ mam sak a saglgã n kẽ kongr pʋga. La yaa sor b sẽn na n tũ n sãam mam yʋʋrã, n kɩt tɩ yãnd yõk maam.

¹⁴ Dẽ wã, mam Wẽnnaam, tẽeg-y-yã a Tobiza ne a Sãmbalat tʋʋmã yelle, la y tẽeg no-rɛɛs-poak a Noadiya ne no-rɛɛsdb a taabã sẽn dag n baood n kẽes maam dabeemã me yelle!

¹⁵ Tõnd mee lalgã n sɛ Elull kiuugã rasem pisi la a nu daare, la yaa rasem pis-nu la a yiib la tõnd dɩk n me lalgã n sɛ.

¹⁶ Dẽ, tõnd bɛɛbã fãa sẽn wʋm tɩ tõnd mee lalgã n sɛ, la bu-zẽms nins sẽn gũbg tõndã sẽn yã bõn-kãnga, rabeem yõk-b lame, la yãnd yõk-b-la wʋsgo. Dẽ, bãmb bãngame tɩ tõnd sẽn tõog n maan tʋʋm-kãngã yaa ne tõnd Wẽnnaamã tʋlsem.

¹⁷ Wakat-kãnga, Zʋʋda kãsem-dãmbã gʋlsa sɛb wʋsg n tʋm a Tobiza, la a Tobiza me gʋlsa sɛb n tʋm bãmba.

¹⁸ Bala, neb wʋsg sẽn dag be Zʋʋda pʋgã rag n tara lagem-n-taar ne a Tobiza, tɩ bala, yẽnda rag n yaa a Aara biig a Sekaniya rɛɛmba, la yẽnda mengã bi-ribl a Yohanan me rag n dɩka a Berekɩya biig a Mesulam bi-pugl n maan a paga.

¹⁹ Bãmb dag n pẽgda a Tobiza mam taoore, la b rɩkd mam goamã n kẽnd n togsd a Tobiza. A Tobiza rag n tʋmda maam sɛbã, n dat n kẽes maam dabeem.