A Neemi 13 - WẼNNAAM SEBRE 2014

A Neemi waa ne tekr soolmã pʋga

¹ Wakat-kãnga, daar a yembre, b karma a Moyiis tõodã sebr Israyɛll nebã taoore, la b wa n taa zĩig ning b sẽn gʋls n yeel tɩ: «Amo nebã ne Moaab nebã ka tog n naag Wẽnnaam nebã tiging pʋg ye.»

² Bala, bãmb dag n ka seg Israyɛll nebã n kõ-b rɩɩb la koom ye. Sẽn paase, Amo nebã ne Moaab nebã rag n yao a Balaam ligd n yeel-a t'a kãab Israyɛll nebã wẽnga. La tõnd Wẽnnaamã teka kãab-wẽngã tɩ lebg barka.

³ Dẽ, Israyɛll nebã sẽn wʋm tõogã sẽn yeel woto wã, b yãka yam n na n welg sãamb nins fãa sẽn be bãmb buudã sʋkã toore.

⁴ Sẽn deng wakat-kãnga, b rag n yãka maan-kʋʋd a Eliyasɩɩb t'a na n get tõnd Wẽnnaamã roog ro-bãoonegã yelle. La rogem n dag n be yẽnda ne a Tobiza sʋka.

⁵ Rẽ kɩtame tɩ yẽnda kɩt tɩ b maneg ro-bedr n kõ a Tobiza. La hal tɩ ta sasa-kãnga, rag n yaa ro-kãng pʋg la b bĩngd bõn-koaadl kũunã, ne wisd kũunã, la Wẽnnaam doogã teedã, ne kũun ning b sẽn yãkd n kõt maan-kʋʋdbã, la koodã ne kaamã piig pʋɩɩrã sẽn yaa Leevi nebã ne yɩɩn-yɩɩndbã la tẽngã noy gũudbã rẽndã.

⁶ La yel-bãmbã fãa maanegã wakate, tɩ mam dag n ka be Zeruzalɛm ye. Bala, mam dag n lebg n leba Babilond dĩm a Artagzɛrzɛɛs nengẽ, la rẽ tɩ yaa a sẽn deeg a naamã tɩ yʋʋm pis-tã la a yiiblẽ. Wakat bilf sẽn paase, mam kosa rĩmã sore,

⁷ n lebg n leb Zeruzalɛm. Dẽ, mam yãnda tʋʋm-wẽng ning a Eliyasɩɩb sẽn maanã, a sẽn dɩk roog sẽn be Wẽnnaam doogã zak pʋg n kõ a Tobiza wã yĩnga.

⁸ Mam sũurã yika wʋsgo, la mam kɩtame tɩ b wʋk a Tobiza teed nins fãa sẽn be roogẽ wã n lob yɩng n bas roogã.

⁹ Rẽ poore, mam kɩtame tɩ b yɩlg roogã, la mam lebsa Wẽnnaam doogã teedã sẽn yaa kũunã ne wisdã, n ning b zĩigẽ.

¹⁰ B leb n togsa maam tɩ b ka kõt Leevi buudã nebã b maan-kʋʋr tʋʋmdã pʋɩɩr ye. Rẽ kɩtame tɩ Leevi nebã ne yɩɩn-yɩɩndbã ned kam fãa zoe n lebg n leb a meng pʋtẽ.

¹¹ Dẽ, mam zaba nanambsã n yeel-b yaa: «Bõe yĩng tɩ b bas Wẽnnaam doogã n ka leb n get a yelle?» Rẽ zugẽ, mam lebg n tigma Leevi nebã ne yɩɩn-yɩɩndbã n kɩt tɩ b ned kam fãa leb n dɩk a tʋʋmde.

¹² Dẽ, Zʋʋda nebã fãa leb n sɩng n tallda koodã ne reezẽ rã-paalgã, la kaamã piig pʋɩɩr n wat n kõt laogã bĩngr rotẽ.

¹³ Mam kõo noor tɩ b kɩt tɩ maan-kʋʋd a Selemiya, ne seb-gʋnd a Sadoke, la Leevi nebã ned a Pedaya get laogã bĩngr rotã yelle, la ned ning sẽn na n sõngd bãmb yaa a Mataniya biig a Zakʋʋr biig a Hanan. Bala, b kɩta kaset tɩ b yaa pʋ-peelem-dãmba. Rag n bee bãmb zug tɩ b lʋɩ taoore, n pʋɩt b saam-biisã kũunã.

¹⁴ Dẽ wã, mam Wẽnnaam, tẽeg-y mam yell bõn-kãng yĩnga! La y ra yĩm mam sẽn tʋm mam Wẽnnaamã roog yĩng ne pʋ-peelmã, la m sẽn lebs yãmb waoogrã a zĩigẽ wã yell ye.

¹⁵ Wakat-kãnga, mam yãnda Zʋʋda neb tɩ b wẽkd b reezẽ tɩɩs biis koom vʋʋsg daare, tɩ neb kẽer wʋkd b koodo, la b zɩlgd b bõens reezẽ rãam, ne b reezẽ tɩɩs biisi, la kankamã, ne zɩɩb buud toor-toore, n dat n tall n kẽng Zeruzalɛm vʋʋsg daarã. La mam zaba bãmb n yeel-b tɩ b ra koos b koosmã vʋʋsg daarã ye.

¹⁶ La Tɩɩr tẽng nebã sẽn dag n be Zeruzalɛm tẽngã pʋgã rag n wata ne zĩma, la koosem buud a taaba, n na n koos ne Zeruzalɛm ne Zʋɩf-rãmbã vʋʋsg daarã.

¹⁷ Dẽ, mam zaba Zʋʋda nanambsã n yeel-b yaa: «Bõe yĩng tɩ yãmb maand tʋʋm-wẽns a woto n paoogd vʋʋsg daarã?

¹⁸ Yãmb yaab-rãmbã me maana a woto, n kɩt tɩ tõnd Wẽnnaamã sɩbg tõndo, n bas tɩ to-kãensã fãa paam tõnd ne d tẽngã. Rẽ wã, yãmb sẽn paoog vʋʋsg daarã yĩnga, yãmb na n kɩtame tɩ Wẽnnaam sũurã puug wʋsg ne Israyɛll nebã n paase.»

¹⁹ Dẽ, mam kõo noor n yeel tɩ vʋʋsg daarã ket tɩ beoogo, wĩndgã sẽn wat n dat n kẽ, bɩ b pag Zeruzalɛm tẽngã noyã, la b ra pak-b tɩ sã n ka vʋʋsg daarã n loog ye. Dẽ, mam yãka m tʋmtʋmdbã neb kẽer n ning tẽngã noyã, tɩ b tõe n gɩdg tɩ ned ra tall koosem vʋʋsg daarã n kẽ tẽngã pʋgẽ ye.

²⁰ Dẽ, sẽn yɩɩd vugr bɩ naoor a yiibu, lɛɛbdã buud toor-toorã paa Zeruzalɛm lalgã poor n gãand vʋʋsg daarã yĩnga.

²¹ Dẽ, mam keooga bãmb n yeele: «Bõe yĩng tɩ yãmb wat n gãe lalgã poor vʋʋsg daarã? Yãmb sã n leb n maan a buudu, mam na n kɩtame tɩ b yõg yãmba.» La sẽn sɩng ne badaare, bãmb ka leb n wa beenẽ vʋʋsg daar ye.

²² Dẽ, mam yeela Leevi nebã tɩ b yɩlg b mense, n kẽng n tɩ gũ tẽngã noyã, tɩ nebã tõe n waoog vʋʋsg daarã. Bõn-kãng yĩnga, mam Wẽnnaam, tẽeg-y mam yelle, la y nonglem-kãsengã yĩnga, bɩ y zoe mam nimbãanega.

²³ Leb n yaa wakat-kãng me, la mam yã tɩ Zʋɩf-rãmb peeg Asdood ne Amo la Moaab nebã kom-pulgi, n maan b pagba.

²⁴ Bãmb kambã pʋɩ-sʋk gomda Asdood buudã goamã, la bãmb ned ba a yembr ka tol n wʋmd Zʋɩf-rãmbã buud goam ye. Yaa buud toay-toay goam bal la bãmb gomda.

²⁵ Mam zaba bãmb n kãab-b wẽnga. La mam tol n pãba bãmb sʋkã neb kẽere, n võ b zoobdã, la m kɩt tɩ b wẽen ne Wẽnnaam n yeel tɩ bãmb ka na n leb n dɩk b kom-pugli n kõ nin-bãmbã kom-dibli ye. La b ka na n leb n peeg nin-bãmbã kom-pugli wã n kõ b kom-dibli, wall y mens peeg n maan y pagb ye!

²⁶ Rẽ yĩnga, ka yel-kãngã n kẽes Israyɛll dĩm a Salmo beegr pʋgẽ wã sɩda? Soolem-dãmb wʋsgã sʋka, soolem ba a yembr yaool n dag n ka be n tar dĩm sẽn yaa wa rĩm a Salmo ye. Yẽnda Wẽnnaamã rag n nong-a lame, n yãk-a t'a lebg Israyɛll nebã fãa rĩmã. Baoosgo, pʋg-sãamsã n tus yẽnda t'a lʋɩ yel-wẽnd pʋga!

²⁷ Tõnd yaool n yãndame tɩ yãmb me maana yel-be-kẽeng-kãngã, n peeg pʋg-sãams n maan y pagba, n beeg tõnd Wẽnnaamã!

²⁸ Mam diga a Yoyada biig a yembr n yiis Zeruzalɛm, yẽnda yaa maan-kʋʋr kãsem a Eliyasɩɩb yagenga, n yaa Horon tẽng rao a Sãmbalat rɛɛmba!

²⁹ Mam Wẽnnaam, tẽeg-y b sẽn maanã yelle, bala, bãmb dẽgma maan-kʋʋr tʋʋmdã, la b rẽgem maan-kʋʋdbã ne Leevi buudã kaoolã!

³⁰ Mam yiisa sãambã fãa bãmb sʋka, la m lebs maan-kʋʋrã tʋʋmd n vigli, n lebs Leevi nebã b zĩigẽ, tɩ ned kam fãa maand a tʋʋmde.

³¹ Mam lebs n vigla raad kũunã b sẽn tog n kõ wa sẽn zems a wakatã, ne dẽenem biis kũunã me. Mam Wẽnnaam, tẽeg-y mam yelle, la y maan-m neere!