A Nahum 3 - WẼNNAAM SEBRE 2014

Tẽn-kũum paama tẽng ning sẽn daagd-a zɩɩmã

¹ Ade, tẽng ning sẽn daagd-a zɩɩmã na paam toogo! Yẽnda pida ne zãmb la fãabo, la a ka basd a fãabã ye.

² Tẽngã pʋga, b wʋmda kalwaas-rãmb sẽn fɩɩnde, ne saar-dãmb nao rãamde, la wiid nao-kida, la zabr saar-dãmb bʋrgo.

³ Zabrã yikame, Zab-zabdbã sʋʋs pɩndame, tɩ kãnã pɩʋʋmd wa sa-yãgbo. Kũumã rʋra zĩigã fãa, kũumã zama taaba. B sõorã ka tar tɛk ye. Naoor sẽn tabgdẽ fãa yaa kũum.

Niniiv na n paama yãnde

⁴ La rẽ fãa yaa pʋg-yoodrã yoobã yĩnga. Yẽnda maana yoob naoor ka tɛka, la yẽnda rɩka a neermã n belg buud a taabã. Yẽnda maana sɩlem n tus buud a taabã, n kẽes yembd pʋga.

⁵ Rẽ n kɩte, tɩ Saasẽ-Pãng-Soabã yetẽ yaa: Mam na n zaba ne foom! Mam na n pilga f fuugã n tãag f nengã, tɩ buud a taabã yãnd f sẽn yaa zaalã, tɩ soolem-dãmbã yã f yãndã.

⁶ Mam na n vu-f-la begdẽ, n ning f yãnd nebã nifẽ.

⁷ Woto, ned ning sẽn yãnd-a foom fãa, a na n loba a neng kɛɛng n yeele: «Niniiv tẽnga, fo sãamame. Ãnda n na n yãb-fo? M na n yãnda bɛlsd yɛɛnẽ n kõ-fo?»

Niniiv na n paama sɩbgr wa Tɛɛb tẽngã

⁸ Niniiv tẽnga, fo sãoo No-Amon tẽngã Nill kʋɩlgã sẽn dag n gũbgã la? Ko-kãseng n dag n yaa yẽnda lal-gũbri.

⁹ Kuus ne Ezɩpt n dag n kõt yẽnda teegre, la Put ne Libi n dag n sõngd yẽnda zabr wakate.

¹⁰ La ne rẽ fãa, b yõga No-Amon tẽng nebã, n tall-b n tɩ kẽes yembdo. Bãmb bɛɛbã neema bãmb kom-pogdã so-tiisẽ, la b yõg a nanambsã n sẽb ne bãense. Gãndaadã yõga bãmb kãsem-dãmbã, n pʋɩ taab n maan-b yembse.

¹¹ Niniiv tẽnga, fo me neng na n yilma wa ned sẽn tɩg rãam, la fo na n baoo zĩig sẽn na soonde, sẽn na yɩl n paam n põs f bɛɛbã.

Niniiv lʋɩɩse

¹² Fo lalsã fãa yaa wa kankang bi-rẽems sẽn bɩ, tɩ b sã n miimd-a bɩ a kankamã lʋɩt sẽn dat-a n dɩ fãa noorẽ.

¹³ Ade, fo tãb-biisã yaa nin-saan-pagb gilli. Fo rignoyã pagsa b toore, tɩ f bɛɛbã tũud be n kẽedẽ. Bugum dɩta fo rignoyã kʋɩlen-kũyã.

¹⁴ Niniiv tẽnga, Wi koom n bĩng zabrã yĩnga! Maneg f lalsã n me! Kẽ begdẽ n tab tãndo, La f rɩk f tãn-koeem-wamã!

¹⁵ La baa ne rẽ fãa, bãng tɩ bugum n na n dɩ-fo. Fo na n paa tãpẽ! Bugmã na n dɩ-f-la wa kalwaar sẽn dɩt koodo. Bɩ fo nebã zama taab wa kalwaare! Bɩ b zam taab wa sʋyã!

¹⁶ Niniiv tẽnga, fo lɛɛbdbã sõor dag n lebga wʋsgo, tɩ b sõorã yɩɩd yĩngr ãdse, n yẽnegd wa kalwaar sẽn dɩ bɩle n sɛ n bas n yɩke.

¹⁷ Fo rigno-gũudbã rag n yaa wʋsg wa sʋyã, tɩ fo tʋmtʋmdbã rag n yaa wʋsg wa kalwaare, tɩ zĩig sã n maage, bɩ b rʋʋgd tuud zutu. La sõorã sã n puki, b yɩkdame tɩ ned ka mi b sẽn teesẽ ye.

¹⁸ Asiiri rĩma, fo kombɛɛmbã gõeeme. Fo gãndaadã ka leb n maand rãamd ye! Fo nebã sãeegame n be tãmsã zutu, tɩ ned ka be n na n tigim-b ye.

¹⁹ Fo poglgã ka tar tɩɩm ye, Fo nodrã na n tũu ne f yõore. Neb nins fãa sẽn na n wʋm tɩ b gomd fo yellã na n maana sũ-noogo, bala, ãnda n be tɩ fo ka maan-a wẽnga?