A Miise 1 - WẼNNAAM SEBRE 2014

Zeruzalɛm ne Samaari sãoongo

¹ Ad koɛɛg ning Sẽn-Ka-Saab sẽn kõ a Miise sẽn yaa Moresɛt tẽng nedã, Zʋʋda rĩm-dãmb a Zotam, ne a Akaaze, la a Ezekɩyaas sẽn wa n dɩt-b naamã wakatã, la ad vẽnegr ning yẽnda sẽn yã sẽn kẽed ne Samaari la Zeruzalɛm wɛɛngẽ wã:

² «Nebã fãa, kelg-y-yã! Bɩ dũniyã ne bũmb nins fãa sẽn be a pʋgẽ wã kelg neere! Zu-soab a Sẽn-Ka-Saab na n zĩnda b ro-sõngã pʋg n yɩ kaset soab n ning yãmb taale!

³ Gese, Sẽn-Ka-Saab yita b zĩigẽ wã, bãmb sigdame n kẽnd dũniyã zĩ-zãonglsã zutu.

⁴ Tãmsã yẽnegda bãmb naoã tẽngre, tɩ tẽn-nabdrã pusd wa bugum sẽn dɩt sɩ-ribdu, la wa koom sẽn yi tãng zug n sigda.

⁵ La bõn-kãens fãa yaa a Zakoob yagensã beegrã yĩnga, yaa Israyɛll buudã kongrã yĩnga. Yaa ãnda rãmb n kɩt tɩ Zakoob buudã beege? Ka Samaari nebã la! La ãnda rãmb n kɩt tɩ Zʋʋda buudã waoogd wẽn-naandse? Ka Zeruzalɛm nebã la!

⁶ Mam na n kɩtame tɩ Samaari tẽngã lebg raboogo, la reezẽ pʋʋgo. M na n kɩtame tɩ Samaari tẽngã kugã bilim n dʋʋg tãn-longã pʋga, la m kɩt tɩ tẽngã meeb yẽbgr puki.

⁷ B na n pãba a wẽn-naandsã fãa n wã, n wʋk a paoongã fãa n yõog bugum, mam na n sãama b wẽn-naandsã, bala teedã bãmb sẽn tigmã fãa, yaa ne bãmb yoobã yaood la b rɩk n da. La b na n dɩka bõn-kãens n tɩ yao pʋg-yoaadba.»

A Miise wiisgu

⁸ Rẽ kɩtame tɩ maam a Miise na n yãb n wiisi, n piid m neooda n kẽn nao-zaal la beelle. Mam na n yãbame n wiis wa we-baaga, m na n yãba wa naneoong kamba.

⁹ Samaari sẽn paam sɩbgr ningã sãam-a-la zãnga. La a sãoongã sãag n ta Zʋʋda, a sãag n ta m nebã tẽng dignoorẽ Zeruzalɛm.

¹⁰ Da moon-y kiba-kãng Gat tẽngã pʋg ye, ra yãb-y Ako tẽngã pʋg ye. Mam na n bilma tomẽ Bɛt-Leyafra.

¹¹ Safɩɩr tẽng nebã, loog-y zaal ne yãnde, Sahanan tẽng nebã ka saagd n na n yi ye. Bɛt-Esɛll tẽng nebã wiisg yĩng kɩtame, tɩ yãmb ka tõe n paam a sõngr ye.

¹² Maarot tẽng nebã maanda yɩɩre, ne b vɩɩmã sẽn na n yɩ-a soaba. Bala, Sẽn-Ka-Saab kɩtame tɩ toog wa, la a taa Zeruzalɛm tẽngã rignoyã.

¹³ Lakɩɩs tẽng nebã, sog-y wiidã saar-dãmba, Sɩyõ tẽn-neerã beegr sɩnga ne yãmba, bala, b yãame tɩ yaa yãmb n kɩte, tɩ Israyɛll nebã maan yel-wẽnã.

¹⁴ Yaa rẽ n kɩte, tɩ yãmb ne Moresɛt-Gat tẽng nebã tog n bas taaba. Ade, Akziib rotã na n yɩɩ belgr dot Israyɛll rĩm-dãmbã yĩnga.

¹⁵ Maaresa nebã! Mam na n leb n kɩtame tɩ ned a to wa soog yãmba. Israyɛll ziirã na n loog n taa hal Adulam.

¹⁶ Zʋʋda nebã! Wõrs-y y zoobdã, põng-y y zutã, kõog-y y zutã koɛbla, wa yɩbreng zugu, y kom-nongdsã yĩnga, bala, b na n yõg-b lame n tall n kẽng yembd n zãag ne yãmba.