A Matiye Sõng 3 - WẼNNAAM SEBRE 2014

A Zãmbatiis koe-moonego

¹ Wakat kãnga, a Zãmbatiis waa n moonda koe-noog Zʋʋde we-rasempʋɩɩgẽ wã n yetẽ:

² Tek-y yam n kos sugr tɩ arzãn soolem kolgame.

³ Yaa a Zã yell la Wẽnnaam no-rɛɛs a Ezayi dag n gom n yeele: Ned a yembr koɛɛg n kelemd we-rasempʋɩɩgẽ n yetẽ: Maneg-y Zu-soabã sore, rems-y bãmb so-bugsã tɩ yɩ tɩrse.

⁴ A Zã rag n yera fuug sẽn wʋg ne yʋgemd kõbdo, la a rag n sẽbga a sɛɛgã ne gãong sẽbdga. A rɩɩb rag n yaa sʋy la weoog sɩɩdo.

⁵ Zeruzalɛm dãmbã ne Zʋʋde fãa nebã, la tẽms nins fãa sẽn pẽ Zʋrdẽ wã neb kẽnga yẽnda nengẽ.

⁶ La bãmb vẽnegame n togs b yel-wẽna, tɩ yẽnda lis bãmb Zʋrdẽ koomã pʋgẽ.

⁷ La a Zã sẽn yã Fariizẽ-dãmbã ne Saduusẽ-dãmbã wʋsg sẽn wat lisgã, a yeel-b lame yaa: Wag-toos buudu, ãnda n wilg yãmb y sẽn na maan to‑to n zoe n põs sũ-puugr sẽn watã?

⁸ Sã n yaa a woto, bɩ y wom biis sẽn zems neb sẽn tek yam n kos sugri,

⁹ la y ra tags t'a Abrahaam sẽn yaa yãmb ba wã sekame ye. Bala, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abrahaam kamba.

¹⁰ Lar zoe n bee tɩɩs yẽgẽ moasã. B na n kɛɛga tɩɩg ning fãa sẽn ka womd bi-sõamyã n lob bugmẽ.

¹¹ Mam yẽ lisda yãmb koomẽ yam tekr yĩnga, la sẽn pʋgend-a maam n watẽ wã yɩɩda maam, tɩ mam pʋs n pa zems tɩ logs bãmb neooda sẽbds ye. Bãmb na n lisa yãmb Sɩɩg-sõng pʋgẽ la bugum pʋgẽ.

¹² Bãmb zãada b kaorgo. Bãmb na n pɩɩsa b zɛɛga, n wʋk b ki n sui b baoorẽ, la b na n yõoga wudgã ne bugum sẽn ka kiida.

A Zeezi koom lisgu

¹³ A Zeezi yii Galɩle n wa a Zã nengẽ Zʋrdẽ kʋɩlgẽ wã t'a lis-ba.

¹⁴ La a Zã zãgsame n yeele: Yaa maam n tog n wa yãmb nengẽ tɩ yãmb lis maam, tɩ yãmb wat mam nengẽ?

¹⁵ A Zeezi leoka yẽnda yaa: Bas tɩ yɩ a woto, bala, a zemsame tɩ tõnd pids bũmb nins fãa sẽn yaa tɩrse. La a Zã ka kɩɩs bãmb yɛs ye.

¹⁶ A Zeezi sẽn paam lisg n sa, b yii koomẽ wã. La gese, yĩngr pakame, la bãmb yãnda Wẽnnaam Sɩɩg sẽn wẽnd wall t'a sigd bãmb zugu.

¹⁷ La koɛɛg zĩnda saasẽ n yeele: «Ada yaa mam Bi-ribl-nongr sẽn ta mam yam zãnga.»