A Matiye Sõng 2 - WẼNNAAM SEBRE 2014

Yam dãmb waame n na n ges a Zeezi

¹ A Zeezi sẽn dog Betlehɛm Zʋʋde soolem tẽngã pʋgẽ wã, rĩm a Erood zamaanẽ, gese, yam dãmb yii yaang n wa Zeruzalɛm n soke:

² Zʋɩf-rãmbã rĩmã sẽn nan dogã bee yɛ? Bala, tõnd yãnda bãmb ãdg yaanga, la tõnd waame n na n waoog bãmba.

³ Rĩm a Erood sẽn wʋm dẽnda, yẽnda ne Zeruzalɛm dãmbã fãa yɛɛsame.

⁴ Erood tigma tẽngã maan-kʋʋdbã kãsem-dãmbã fãa ne tõog karen-saam-dãmbã n sok-b Kiris sẽn dag n tog n dog tẽng ningã.

⁵ Bãmb yeela yẽnda tɩ yaa Zʋʋde Betlehɛm, bala Wẽnnaam no-rɛɛsã dag n gʋlsame n yeel a woto:

⁶ «Foom Betlehɛm, Zʋʋda tẽnga, yaa vẽeneg tɩ fo ka poorẽ Zʋʋda tẽn-kãsemsã sʋk ye. Bala, naab n na n yi fo pʋgẽ n dɩlg Israyɛll sẽn yaa mam nebã.»

⁷ Woto, Erood soosame n bool yam dãmbã n sok-b neere n bãng ãdgã sẽn puk wakat ninga.

⁸ Yẽnda tʋma bãmb Betlehɛm n yeel-ba: Kẽng-y n tɩ bao-y n bãng-y biigã yell neere, la y sã n yãnd-a, bɩ y lebg n wa togs-ma, tɩ mam me tõe n kẽng n tɩ waoog-a.

⁹ Bãmb sẽn kelg rĩmã goam n sɛ, b loogame. La haya, ãdg ning bãmb sẽn dag n yãnd yaangã lʋɩɩ bãmb taoore, la a sẽn ta zĩig ning bi-bilfã sẽn be wã, a yalsame.

¹⁰ Bãmb sẽn yã ãdgã, b paama sũ-no-kãsenga.

¹¹ Bãmb kẽe roogẽ wã, la b yãnda biigã ne a ma a Maari, la bãmb wõgemdame n waoog biigã. Dẽ poore, bãmb logsa b kordo, n yãgs kũun n kõ Bãmba: yaa sãnem la wisdu, la miir sẽn tar yũ-noogo.

¹² La Wẽnnaam sẽn sagl bãmb zãmsd pʋgẽ tɩ b ra leb n tũ a Erood nengẽ, bãmb dɩka sor a to n kuili.

Betlehɛm kom-bãooneg kʋʋbo

¹³ Bãmb sẽn looge, Zu-soabã malɛɛk puka a meng ne a Zozɛf zãmsd pʋgẽ n yeel-a: Yik n dɩk biigã ne a ma n zoe n kẽng Ezɩpte. Zĩnd be hal tɩ mam leb n wa n gom ne foom. Bala, Erood na n baoo biigã, sẽn na yɩl n kʋ-a.

¹⁴ A Zozɛf yikame n dɩk biigã ne a ma ne yʋngo n kẽng Ezɩpte.

¹⁵ La yẽnda zĩnda be hal tɩ ta Erood kũum, tɩ bũmb ning Zu-soabã sẽn dag n gom ne b no-rɛɛsã noorã paam pidsgu. Bãmb yeelame: Mam boola m biigã t'a yi Ezɩpte.

¹⁶ La Erood sẽn mik tɩ yam dãmbã belga yẽnda, a sũurã puuga hal wʋsgo, t'a tʋm neb Betlehɛm ne a tẽn-kɩremsã tɩ b tɩ kʋ kamb nins fãa sẽn zems yʋʋm a yiibu la sẽn ka ta woto me, sẽn zems yẽnda sẽn dag n sok yam dãmbã n bãng ãdgã sẽn puk wakat ningã wã.

¹⁷ Woto, Wẽnnaam no-rɛɛs a Zeremi sẽn dag n togsã paama pidsgu. A yeelame:

¹⁸ Koɛɛg n zẽk Rama, yãbr la wiis-kãsemse. Yaa a Rasɛll n yãbd a kamba, la a ka sakd belsg ye, a kambã sẽn ka be wã yĩnga.

¹⁹ La Erood kũumã zugẽ, Zu-soabã malɛɛk puka a meng ne a Zozɛf zãmsd pʋgẽ Ezɩpt tẽng n yeel-a:

²⁰ Yik n dɩk biigã ne a ma n leb Israyɛll tẽnga, bala neb nins sẽn dag n baood biigã n na n kʋ wã kiime.

²¹ La a Zozɛf yik n dɩka biigã ne a ma n leb Israyɛll tẽnga.

²² La yẽnda sẽn wʋm t'a Arkelawuus reega a ba zĩig n dɩt naam Zʋʋde wã, yẽnda zoee rabeem n ka kẽng be ye. La Wẽnnaam sẽn sagl yẽnda zãmsd pʋgẽ yĩnga, a kẽnga Galɩle soolmẽ,

²³ la a tɩ zĩnda tẽng a ye pʋg sẽn boond tɩ Nazarɛte, tɩ bũmb ning Wẽnnaam no-rɛɛsdbã sẽn dag n togsã paam pidsgu. B yeelame: «B na n boola yẽnda tɩ Nazarɛt neda.»