A Mark Sõng 8 - WẼNNAAM SEBRE 2014

A Zeezi dɩlga neb tus a naase

¹ Wakat kãnga neb kʋʋng sẽn dag n leb n tigim taab a Zeezi sɛɛgẽ, n yaool n dag n ka tar dɩɩb sẽn na n dɩ wã yĩnga, a Zeezi boola b karen-biisã n yeel-b yaa:

² «Kʋʋngã nimbãaneg tara maam, bala, rasem a tãab moasã la b be ne maam n ka tar rɩɩb sẽn na rɩ ye.

³ Mam sã n kɩt tɩ b kuil ne kom, b na n tadga sorẽ, bala, kẽer sẽn yiẽ wã zãrame.»

⁴ Bãmb karen-biisã sok-b lame yaa: «D na n yãa bur yɛɛnẽ weoogẽ ka tɩ sek nin‑bãmbã fãa?»

⁵ A Zeezi soka bãmb yaa: «Yãmb tara bur a wãna?» Bãmb leokame t'a yopoe.

⁶ Dẽ, a Zeezi kɩtame tɩ kʋʋngã fãa zĩnd tẽnga. Bãmb dɩka bur a yopoe wã, la b sẽn ning-a bark n sa, b kaoome n kõ b karen-biisã tɩ b pʋɩ nebã, la b pʋɩ-b lame.

⁷ La bãmb dag n tara zĩm-bãooneg bilfu. La a Zeezi sẽn ning-a barka, b yeelame tɩ b pʋɩ rẽ me.

⁸ Nebã dɩɩme n tɩge. La karen-biisã wʋka bur-gɩrsã sẽn kellã peoog a yopoe n zã.

⁹ Sẽn dɩ-bã sõor kolga neb tus a naase. Dẽ poore, a Zeezi kuils-b lame.

¹⁰ Tao-tao bala, bãmb ne b karen-biisã kẽe koom-koglgã n kẽng Dalmanuta.

Fariizẽ-dãmbã kosa bãnde

¹¹ Fariizẽ-dãmbã waame n sɩng n gom ne a Zeezi. La sẽn na n yɩlẽ n mak a Zeezi, b kosa bãmb tɩ b wa ne bãnd sẽn yit yĩngri.

¹² A Zeezi wẽe sir-kãseng b sũurẽ n yeele: «Bõe tɩ zamaan‑kãngã nebã baood bãnde? Mam yeta yãmb sɩd tɩ zamaan‑kãngã nebã kõn tol n paam bãnd ye.»

¹³ Dẽ, a Zeezi basa bãmb n kẽ koom koglg n kẽng ko-kãsengã rʋʋnde.

Fariizẽ-dãmbã ne Erood rã-bɩlle

¹⁴ B karen-biisã yĩmame n ka zɩ bur ye. Yaa bur a yembr tãa bal la b dag n tar koglgã pʋgẽ.

¹⁵ A Zeezi sagla bãmb woto: «Gũus-y y mens neer ne Fariizẽ-dãmbã, la Erood rã-bɩlle.»

¹⁶ B karen-biisã yẽsa ne taab n yeel tɩ yaa bãmb sẽn ka tar burã yĩng la a Zeezi sẽn gom a woto wã.

¹⁷ A Zeezi bãngame n sok-b yaa: «Yaa a wãn tɩ yãmb yẽsd ne taab n yetẽ tɩ yaa yãmb sẽn ka tar burã yĩnga? Yãmb yam ket n nan ka vẽneg la? Yãmb ket n nan ka wʋm la? Yãmb yamã kɩdame la?

¹⁸ Yãmb sẽn tar ninã y ka ne la? Yãmb sẽn tar tʋbã y ka wʋmd la? Yãmb ka tol n tar pʋ-tẽer la?»

¹⁹ Mam sẽn kao bur a nu n kõ neb tus a nu wã, yãmb wʋka bur-gɩrsã sẽn kellã pet a wãna?» Bãmb leokame tɩ piig la a yiibu.

²⁰ La mam sẽn kao bur a yopoe n kõ neb tus a naasã, yãmb wʋka bur-gɩrsã sẽn kellã pet a wãna? Bãmb leokame t'a yopoe.

²¹ La a Zeezi sok-b lame yaa: Yãmb ket n ka wʋm la?

A Zeezi maaga zoang Betsayɩda

²² Bãmb kẽnga Betsayɩda, la b waa ne zoang a Zeezi nengẽ n kos bãmb tɩ b sɩɩs-a.

²³ Bãmb gãda zoangã nug n tɛ-a n yi tẽngã, n tʋbs kolkood n ning a ninã, n tik-a ne b nusi, n sok-a: «Fo nee bũmbu?»

²⁴ Zoangã puka a ninã n leoke: «Mam nee nebã, la b wẽnda wa tɩɩse, la b kẽndame.»

²⁵ A Zeezi leb n tika yẽnda ninã ne b nusã yɛsa. La zoangã sẽn ges kũii, a ninã pukame t'a ne vẽenega.

²⁶ Dẽ, a Zeezi kuilsa yẽnda a yiri, n yeel-a t'a ra kẽ tẽngã pʋgẽ ye.

A Pɩyɛɛr kaseto

²⁷ A Zeezi ne b karen-biisã kẽnga tẽms sẽn pẽ tẽng sẽn boond tɩ Filip Sezaare. La b sẽn be sorẽ, a Zeezi soka b karen-biisã yaa: «Nebã yetame tɩ mam yaa ãnda?»

²⁸ B leokame: «kẽer yetame t'a Zãmbatiisi, tɩ kẽer yetẽ t'a Eli, tɩ kẽer me yetẽ tɩ Wẽnnaam no-rɛɛsdbã ned a yembre.»

²⁹ La a Zeezi sok-b lame yaa: «La yãmba, yãmb yetame tɩ mam yaa ãnda?» A Pɩyɛɛr leoka bãmb n yeele: «Yãmb yaa Kirisã.»

³⁰ Dẽ, a Zeezi keooga bãmb neer tɩ b ra sak n gom ne ned bãmb yell ye.

A Zeezi pĩnd n goma b kũum la b vʋʋgr yelle

³¹ Dẽ, a Zeezi sɩngame n zãms b karen-biisã n yeel tɩ yaa tɩlɛ tɩ Ninsaal Bi-riblã nams wʋsgo, la tɩ tẽngã nin-kẽembã ne maan-kʋʋdbã kãsem-dãmbã, ne tõog karen-saam-dãmbã zãgs bãmba, la b kʋ bãmba, la b kũumã rasem a tãab daare, b na n vʋʋgame.

³² Bãmb wilga bõn-kãens vẽenega. La a Pɩyɛɛr boola bãmb kɛɛnga, n sɩng n zab bãmba.

³³ A Zeezi leb n wẽnegame n ges b karen-biisã, n leng a Pɩyɛɛr n yeele: «Sʋtãana, leb mam poorẽ, bala, fo tagsgã ka Wẽnnaam tagsg ye, yaa ninsaalb rẽnda.»

³⁴ Dẽ, bãmb boola b karen-biisã ne neb kʋʋngã n yeel-b yaa: «Ned sã n dat n tũ maam, bɩ a kɩɩs a mengã raabo, n dɩk a da-pɩk n tũ maam.

³⁵ Bala, ned ning fãa sẽn dat n gũ a vɩɩm, a vɩɩm na sãame, la ned ning fãa sẽn na n bas a vɩɩm mam yĩnga la koe-noogã yĩnga, a na paam fãagre.

³⁶ La ned sã n paam dũni bũmb fãa n yaool n bas n ki, bõe yõod la a paam a pʋgẽ?

³⁷ Ninsaal na n teka a vɩɩmã ne bõe?

³⁸ Sɩd me, ned ning fãa sẽn na n zoe‑a mam yãnde la mam goamã yãnde, zamaan‑kãngã nebã sẽn yaa yoaadbã la yel-wẽn maandbã sʋka, Ninsaal Bi-riblã sã n wa n wa ne b ziirã, la b ba wã ziiri, ne malegs-sõamyã, b na n zoee yẽnda me yãnde.»