A Mark Sõng 7 - WẼNNAAM SEBRE 2014

Bũmb nins sẽn maand ned t'a lebg rẽgdo

¹ Fariizẽ-dãmbã ne tõog karen-saam-dãmbã kẽer sẽn yi Zeruzalɛmã tigma taab n gũbg a Zeezi.

² Bãmb yãnda a Zeezi karen-biisã kẽer sẽn dɩt rɩɩb ne nus-rẽgdo, sẽn dat n togs tɩ sẽn ka nudg ye.

³ Fariizẽ-dãmbã ne Zʋɩf-rãmbã fãa yaool n ka rɩt tɩ b ka reng n nudg b nusã neer wa sẽn zems b yaab-rãmbã miningã ye.

⁴ La bãmb sã n yi raagẽ n wa, b sã n ka waase b ka rɩt ye. La b tara minind a taab b sẽn sakda, a wa wamã la yʋyã la zũud laas neoodgo.

⁵ Fariizẽ-dãmbã ne tõog karen-saam-dãmbã soka a Zeezi yaa: «Bõe yĩng tɩ yãmb karen-biisã ka sakd b yaab-rãmbã miningu, n dɩt ne nus-rẽgdo?»

⁶ A Zeezi leoka bãmb yaa: «Zãmb-dãmba, a Ezayi sɩd togsa bãngr goam ne yãmb yelle, a sẽn gʋls n yeele: ‹Nin-kãensã waoogda maam ne b nobɩms bala, la b sũyã zãra ne maam.

⁷ La bãmb sẽn waoogd maamã yaa zaalem, bala, bãmb zãmsa nebã kaoreng sẽn yaa ninsaalb tõod bala.›

⁸ Yãmb basda Wẽnnaam tõod n sakd ninsaalb minindu.»

⁹ A Zeezi kẽnga taoor n yeele: «Yãmb tara sɩlem n maandẽ, n basd Wẽnnaam tõodã kɛɛng n sakd y mens minindu.

¹⁰ Bala, a Moyiis rag n yeelame: Waoog f ba la f ma, la ned sã n paoog a ba bɩ a ma bɩ b kʋ-a.›

¹¹ La ne yãmba, ned sã n yeel a ba bɩ a ma: ‹Mam sẽn dag n na n sõng yãmb ne bũmb ningã, a lebga korbã, sẽn dat n togs tɩ kũun Wẽnnaam yĩnga›.

¹² Yãmb ka leb n sakd t'a maan baa fʋɩ n kõ a ba bɩ a ma ye.

¹³ Woto, yãmb minindã yãmb sẽn karemd nebã kɩtdame tɩ Wẽnnaam goamã lebg zaalem. La yãmb maanda bũmb a woto buud wʋsgo.»

¹⁴ Dẽ poore, bãmb leb n boola neb kʋʋngã n yeel-ba: «Yãmb fãa, kelg-y maam la y bãnge.

¹⁵ Bũmb ka be n kẽed ninsaal pʋgẽ n tõe n kɩt t'a lebg rẽgd ye. Yaa bũmb ning sẽn yit ninsaal pʋgẽ wã n kɩtd t'a lebg rẽgdo.

¹⁶ [Sẽn tar-a tʋb sẽn wʋmda, bɩ a wʋme.]

¹⁷ Bãmb sẽn bas nebã n kẽ roogẽ, b karen-biisã soka bãmb yel-bũn‑kãng võore.

¹⁸ La a Zeezi yeel-b lame yaa: «Yãmb me yam ka vẽneg la? Yãmb ka bãng tɩ bũmb sẽn be yɩng n kẽed ninsaal pʋgẽ ka tõe n kɩt t'a lebg rẽgd la?

¹⁹ Bala, bõn-kãng ka kẽed yẽnda sũurã pʋgẽ ye, a kẽeda a pʋ‑roogẽ wã tɩ b yaool n tɩ yiis-a n bas we-kɛɛnga.» A Zeezi goma a woto n na n wilg tɩ rɩɩb fãa yaa sẽn na rɩ.

²⁰ Bãmb leb n yeelame: «Yaa bũmb ning sẽn yit ninsaal pʋgẽ wã n kɩtd t'a lebg rẽgdo.

²¹ Bala, yaa pʋgẽ, ninsaalbã sũyã pʋs la bõn-wẽnsã yita: tags-wẽnse, tʋʋm-dẽgdo,

²² wagdem, nin-kʋʋre, yoobo, yão-beedo, pʋ-toogo, sɩlem, rãmbgo, sũ-kiiri, nin-tʋʋre, tɩtaam la yalem-tagsgo.

²³ Bõn-wẽn‑kãens fãa yita ninsaal pʋgẽ n kɩtdẽ t'a lebg rẽgdo.»

Siiri Fenisi pag tẽebo

²⁴ A Zeezi basa zĩ-kãngã n kẽng Tɩɩr soolmẽ. Bãmb kẽe roogẽ n ka rat tɩ ned bãng ye, la b ka tõog n soond ye.

²⁵ Bala, zĩn-dẽgd n dag n tar pag a yembr bi-pugla, la pagã wʋma a Zeezi kibare, n wa n wõgemd bãmb taoore.

²⁶ Pʋg‑kãng dag n yaa Gɛrk sẽn yit Siiri Fenisi. Yẽnda kosa bãmb tɩ b rig zĩnã sẽn tar a biigã.

²⁷ A Zeezi yeela yẽnda: «Bas tɩ kambã rɩ n tɩg nanda, bala, a ka zems tɩ b rɩk kamb rɩɩb n kõ ba-bi ye.»

²⁸ Yẽnda leoka bãmb yaa: «Zu-soaba, yaa sɩda, la ba-bi sẽn be taabl tẽngr rɩta kambã rɩ-zersã.»

²⁹ Dẽ, bãmb yeel-a lame yaa: «Gom-kãngã yĩng bɩ f kẽnge. Zĩnã yiime n bas f bi-puglã.»

³⁰ La yẽnda sẽn ta yiri, a mikame tɩ zĩnã yii n basa a bi-puglã t'a gãe a gãagẽ.

A Zeezi maaga rao sẽn yaa bidg la wʋnga

³¹ A Zeezi basa Tɩɩr soolem n leb n tũ Sɩdõ n pɩʋʋg Dekapoll n kẽng Galɩle ko-kãsengã sẽnẽ.

³² B waa ne wʋng sẽn yaa bidg bãmb nengẽ n kos-b tɩ b tik-a ne b nusi.

³³ Bãmb peega yẽnda kʋʋngã sʋk n yi kɛɛnga, n ning b nug-bi a tʋbã pʋsẽ, la b tʋbsame, n tẽk a zelemdã ne kolkoodã,

³⁴ n yaool n nak n ges yĩngr n wẽ sir n yeele: «Efata», sẽn dat n togs tɩ yoke.

³⁵ Tao-tao bala, a tʋba yoosame, la a zelemdã lakame t'a gomd sõama.

³⁶ A Zeezi sagla bãmb tɩ b ra togs ned ye. La bãmb sã n sagendẽ, b moondame n yɩɩd pĩnda.

³⁷ Nebã yɛɛsa hal wʋsg n yetẽ: «Bãmb maanda bũmb fãa neere. Bãmb kɩtdame tɩ baa wʋms wʋmdẽ, tɩ mugs gomda.»