A Mark Sõng 6 - WẼNNAAM SEBRE 2014

Nazarɛt nebã kɩɩsa a Zeezi

¹ A Zeezi basa zĩ-kãngã n leb b meng tẽngẽ, la b karen-biisã tũu bãmba.

² La vʋʋsg daar sẽn ta, bãmb zãmsa nebã karen-doogẽ wã. Nebã wʋsg sẽn wʋm bãmb zãmsgã, b yɛɛsame n soke: «Bãmb bãng-kãng yita yɛ? Ad yaa yam meng-meng la b kõ-ba, hal tɩ b tõe n maan bõn-bãn ne b nusi!

³ Ka bãmb la ra-wãadã, a Maari biigã, a Zak la a Zooze la a Zuud la a Sɩmo ma-biigã? Bãmb ma-bi-pogs ka be tõnd sʋk ka sɩda?» La yõwã kɩtame tɩ Nazarɛt nebã ka tẽ a Zeezi ye.

⁴ La a Zeezi yeela bãmb yaa: «Wẽnnaam no-rɛɛs ka kongd waoogre, sã n ka a meng tẽngẽ la a roagdb sʋka, la a meng zakẽ ye.»

⁵ Bãmb ka tõog n maan bõn-bãnd baa a yembr beenẽ, sã n ka b sẽn tik bãad-dãmb kẽer ne b nus n maag-bã bal ye.

⁶ La nebã ka-tẽebã linga a Zeezi. A Zeezi saaga tẽn-kɩremsã n zãms nebã.

A Zeezi tʋma karen-biis piig la a yiibu

⁷ Dẽ, bãmb boola b karen-biisã piig la a yiibã, n sɩng n tʋm bãmb b yiib-yiibu, n kõ-b pãn-tõog tɩ b rig zĩn-dãmb nins sẽn yaa rẽgdã.

⁸ A Zeezi yeel-b lame tɩ b ra zã baa fʋɩ b kẽndã yĩnga, sã n ka rasaar bal ye. Tɩ b ra zã buri, wall korg bɩ ligd b sẽbds pʋs me ye.

⁹ B yeel-b lame tɩ b wid neooda la b ra yeelg fu-yord a yiib ye.

¹⁰ La a Zeezi rag n yeta bãmb yaa: «Yãmb sã n tɩ sig ned zakẽ, pa-y be hal tɩ ta y loogre.

¹¹ La yãmb sã n kẽng tẽngẽ tɩ b ka reeg yãmba, la b ka kelg yãmba, bɩ y yi be la y pĩms y naoã tom tɩ bõn-kãng yɩ kaset b yĩnga.»

¹² Bãmb loogame n moon n yeel nebã tɩ b tek yam n kos sugri.

¹³ Bãmb diga zĩn-dãmb wʋsgo, la b tigsa bãad-dãmb wʋsg ne kaam n maag-ba.

A Zãmbatiis kũum

¹⁴ Naab a Erood wʋma a Zeezi kibare, bala, b yʋʋrã saaga zĩigã fãa. Nebã yeelame: «A Zãmbatiis vʋʋgame n yi kũum sʋka. Yaa woto n kɩt t'a tar pãng n maand bõn-bãna.»

¹⁵ Neb a taab yeelame: «Yaa a Eli!» La neb kẽer yeelame: «Bãmb yaa Wẽnnaam no-rɛɛs wa Wẽnnaam no-rɛɛsdb a taabã.»

¹⁶ La a Erood sẽn wʋm woto, yẽnda yeelame: «Yaa Zã ning mam sẽn da fiuug a zugã. Yaa yẽnda n vʋʋge.»

¹⁷ Bala, a Erood meng dag n kɩtame tɩ b yõk a Zã n sẽb n kẽes bi-bees roogẽ, yẽnda ba-biig a Filip pag a Eroodyaad a sẽn peegã poorẽ.

¹⁸ Bala, a Zã rag n yeel-a lame tɩ ka zems ne tõog tɩ yẽnda dɩk a ba-biigã pag ye.

¹⁹ A Eroodyaad sũur yika ne a Zã t'a rat n kɩt tɩ b kʋ-a.

²⁰ La yẽnda ka tõe ye. Bala, a Erood zoeta a Zã, a sẽn mi t'a yaa nin-tɩrg la nin-sõngã yĩnga. Erood gũ-a lame, la a sẽn wʋm a Zã goamã, lebga tagsg wʋsg ne-a. Baoosgo, a kelg-a-la ne sũ-noogo.

²¹ A Erood sẽn tẽeg a dogem daar n maan tigr a nin-kãsemsã ne a sodaas nanambsã ne Galɩle soolem nanambsã yĩnga, a Eroodyaad paama weer n na n maan a sẽn dag n datã.

²² A Eroodyaad bi-pugl kẽe roogẽ wã n sao, la biigã saoog yɩɩ a Erood ne neb nins sẽn dag n zĩ ne yẽnda n dɩtẽ wã noogo.

²³ A Erood wẽena ne yẽnda n yeele: «Fo sẽn kos maam bũmb ning fãa, mam na kõ foom, baa sã n yaa mam soolmã pʋɩ-sʋka.»

²⁴ La bi-puglã yiime n tɩ sok a ma yaa: «M kos bõe?» La a ma wã leokame: «Kos a Zãmbatiis zugã.»

²⁵ La yẽnda leba rĩmã nengẽ tao-tao n tɩ kos yẽnda a woto: «Mam datame tɩ y kõ maam a Zãmbatiis zug ne lengr moasã bala.»

²⁶ Rĩma sũur sãamame. La a wẽenegã ne nebã sẽn zĩ ne yẽnda wã yĩnga, a rag n ka rat n zãgs ye.

²⁷ Tao-tao bala, rĩmã yeela dapoe-bil t'a kẽng n tɩ wa ne a Zãmbatiis zugã.

²⁸ Dapoe-bilã kẽngame n tɩ fiuug a Zã zugã bi-beesã roogẽ n sagl lengrẽ n tall n wa n kõ bi-puglã, la bi-puglã tallame n tɩ kõ a ma.

²⁹ La a Zã karen-biisã sẽn wʋme, b waa n dɩka a kũumã n tɩ solg yaoogẽ.

A Zeezi rɩlga neb tus a nu

³⁰ A Zeezi tẽn-tʋmdbã tigma taab bãmb nengẽ n wilg bãmb bũmb nins fãa bãmb sẽn maane, la b zãms nebã.

³¹ Neb wʋsg rag n watame la b loogdẽ hal tɩ bãmb ka tol n tar weer n na n dɩ ye. Dẽ, a Zeezi yeel-b lame yaa: «Wa-y tɩ d yi we-kɛɛnga, neb sẽn ka beẽ tɩ y tɩ vʋʋs bilfu.»

³² Bãmb kẽe koom-koglgã n na n yi kɛɛnga, zĩig neb sẽn ka beẽ.

³³ La neb wʋsg yãnda bãmb loogrã n bãng bãmba. La neb yii tẽms fãa n zoe ne nao n deng bãmb n ta zĩig ning bãmb sẽn dabdã.

³⁴ A Zeezi sẽn yi koom koglgẽ wã, b yãnda neb kʋʋng wʋsgã, la b nimbãaneg yõka bãmba, bala, bãmb wẽnda wa piis sẽn ka tar pe-kɩɩm ye. La bãmb sɩngame n zãms-b bũmb wʋsgo.

³⁵ Wakatã sẽn loogdã yĩnga, a Zeezi karen-biisã kolga bãmb n yeele: «Zĩ-kãngã yaa weoogo, la wakatã loogdame.

³⁶ Kɩt-y tɩ nebã loog n kẽng tẽn-bãoonegã la tẽn-kɩremsã sẽn pẽ wã n tɩ ra rɩɩb n dɩ.»

³⁷ A Zeezi leok-b lame yaa: «Bɩ yãmb mensã bao rɩɩb n kõ nebã tɩ b rɩ.» La b yeela a Zeezi yaa: «Tõnd na n kẽngame n tɩ ra bur deniye kobsi n wa n kõ-b tɩ b rɩ?»

³⁸ La a Zeezi leok-b lame n yeele: «Yãmb tara bur a wãna? Kẽng‑y n ges-y yã.» Karen-biisã kẽngame n tɩ gese, la b wa n togs a Zeezi tɩ yaa bur a nu ne zĩm a yiibu.

³⁹ Dẽ, bãmb yeelame tɩ b zĩnig nebã fãa sull-sull mo-maasã zugu.

⁴⁰ La bãmb zĩnda rulg-rulga, koabg-koabga la pis‑nunu.

⁴¹ A Zeezi dɩka bur a nu wã ne zĩm a yiibã n nak n ges yĩngri, n ning barka, n yaool n kao burã n kõ b karen-biisã tɩ b pʋɩ kʋʋngã. Bãmb pʋɩɩ zĩm a yiibã me tɩ ta nebã fãa.

⁴² Bãmb fãa rɩɩme n tɩge.

⁴³ La b wʋka bur-gɩrsã ne zĩm-kɛlã peoog piig la a yiibu.

⁴⁴ Neb nins sẽn dɩ burã yaa raop tus a nu.

A Zeezi kẽnda koom zugu

⁴⁵ Tao-tao bal yõwã zugẽ, a Zeezi kɩtame tɩ b karen-biisã kẽ koom-koglgã n deng bãmb taoor ko-kãsengã rʋʋnde, Betsayɩda sẽnẽ, tɩ bãmb mengã yõdg n kuils nebã.

⁴⁶ Bãmb sẽn kuils nebã n sa, b kẽnga tãngã zug n tɩ pʋʋse.

⁴⁷ Zĩ-sobd sẽn ta, koom-koglgã bee ko-kãsengã sʋka, t'a Zeezi be tẽng b yembre.

⁴⁸ Bãmb yãame tɩ b karen-biisã namsda wʋsgo, n dugsd koom-koglgã, bala, sobg n segd-ba. Sẽn kolg tõd-beoogo, a Zeezi kẽna ko-kãsengã zug n dabd b karen-biisã sẽnẽ, n dat n loog-ba.

⁴⁹ Bãmb sẽn yã a Zeezi tɩ b kẽnd koomã zugã, b tẽeme tɩ yaa kɩɩma,

⁵⁰ la b kelmame, bala, bãmb fãa yãnd-b lame, la rabeem yõka bãmba. Tao-tao bala, a Zeezi goma ne bãmb n yeele: «Keng-y y sũyã, yaa maam. Da zoe-y rabeem ye.»

⁵¹ Dẽ, bãmb kẽe koom-koglgã pʋgẽ n paas b karen-biisã, la sobgã yõkame. Karen-biisã yɛɛsame n sẽege,

⁵² bala, bãmb dag n ka wʋm burã bõn-bãndã võore, b sũyã sẽn diglmã yĩnga.

A Zeezi maaga bãad-dãmb Zenezarɛt

⁵³ La bãmb sẽn pɩʋʋg ko-kãsengã, bãmb taa Zenezarɛt soolmẽ, la b yalsa koomã noore.

⁵⁴ La bãmb sẽn yi koom koglgẽ wã, nebã bãnga a Zeezi tao-tao.

⁵⁵ La b zoeeme n kẽ soolmã fãa n tɩ rɩgs bãad-dãmbã ne pãnday n wa zĩig ning fãa b sẽn wʋm t'a Zeezi be.

⁵⁶ A Zeezi sẽn taẽ fãa, tɩ yaa tẽn-bãoonegẽ, tɩ yaa tẽn-bɛdẽ, tɩ yaa pʋt rotẽ, nebã gãnegda bãad-dãmb raas pʋse, la b kosa a Zeezi tɩ b sak tɩ b sɩɩs b fuugã noor bala. La neb nins fãa sẽn sɩɩsã paama laafɩ.