A Mark Sõng 2 - WẼNNAAM SEBRE 2014

A Zeezi maaga ned sẽn ki bogre

¹ Rasem bilf rẽ loogr poore, a Zeezi lebg n waa Kapɛrnaom, la nebã wʋmame tɩ b bee roogẽ.

² Nebã tigma taab hal wʋsgo, tɩ weer ka be baa rignoorẽ wã ye. La a Zeezi moona bãmb Wẽnnaam koɛɛga.

³ B talla ned a yembr sẽn ki bogr n wa bãmb nengẽ, la yaa neb a naas n tʋk-a.

⁴ La bãmb sẽn ka tõe n tall-a n ta a Zeezi nengẽ nebã waooglem yĩngã, b laka roogã zugu, zĩig ning a Zeezi sẽn yɛsã n tũnug võ-kãnga n sik ki-bogrã ne a gãagã.

⁵ A Zeezi sẽn yãnd b tẽebã, b yeela sẽn ki-a bogrã yaa: «M biiga, fo paama f yel-wẽnã sugri.»

⁶ Tõog karen-saam-dãmb kẽer sẽn dag n zĩ be rag n tagsda b sũurẽ woto:

⁷ Yaa a wãn tɩ rao-kãnga gomd a woto? Bãmb paoogda Wẽnnaam. Ãnda n tõe n kõ yel-wẽn sugr tɩ ka Wẽnnaam b yembr tãa?

⁸ A Zeezi bãnga bũmb nins b sẽn tagsd b sũurẽ wã n sok-b yaa: Yaa bõe tɩ yãmb tagsd woto y sũyã pʋse?

⁹ Bʋg n yaa naana n yɩɩd tɩ yeel ki-bogr soabã: Fo paama f yel-wẽnã sugri, bɩ f yik n dɩk f gãagã n kẽne?

¹⁰ La yaa sẽn na n yɩl tɩ yãmb bãng tɩ Ninsaal Bi-riblã tara pãn‑tõog dũni zug tɩ kõ yel-wẽn sugri.

¹¹ La a Zeezi yeela ki-bogr soabã yaa: Mam yeta foom tɩ f yik n dɩk f gãagã n kuili.

¹² Tao-tao bala, raoã yikame n dɩk a gãagã n loog nebã fãa nifẽ, tɩ b fãa yɛɛs n pẽg Wẽnnaam n yeele: «Tõnd nan ka yã bũmb a woto nand ye.»

A Leevi boolgo

¹³ A Zeezi leb n kẽnga ko‑kãsengã noore, la kʋʋngã fãa waa bãmb nengẽ. La bãmb zãms-b lame.

¹⁴ A Zeezi sẽn loogdã, b yãnda a Alfe biig a Leevi t'a zĩ yaood deegr zĩigẽ. Bãmb yeela yẽnda yaa: Tũ maam. La a Leevi yikame n tũ bãmba.

¹⁵ A Zeezi sẽn zĩ a Leevi roogẽ n dɩtẽ, yaood dɛɛgdbã ne yel-wẽn maandb wʋsg me lagmame n dɩt ne bãmba, ne b karen-biisã. Bala, b yɩɩ wʋsg n tũ bãmba.

¹⁶ Tõog karen-saam-dãmbã sẽn yaa Fariizẽ-dãmb sẽn yã t'a Zeezi rɩt ne yaood dɛɛgdbã la ne yel-wẽn maandbã, b soka b karen-biisã yaa: Bõe yĩng tɩ bãmb dɩt la b yũud ne yaood dɛɛgdbã la ne yel-wẽn maandbã?

¹⁷ A Zeezi sẽn wʋm woto, b yeela bãmb yaa: «Nin-kegems ka baood tɩp ye, yaa bãad-dãmb n baood‑a. Mam ka wa n na n bool nin-tɩrs ye, la yaa yel-wẽn maandbã.»

Sokr no-loeer poorẽ

¹⁸ A Zã karen-biisã ne Fariizẽ-dãmbã da loeta noore. Nebã wa n soka a Zeezi: Yaa bõe t'a Zã karen-biisã ne Fariizẽ-dãmbã karen-biisã loet noor tɩ yãmb karen-biisã ka loetẽ?

¹⁹ A Zeezi leok-b lame n yeele: Ned sã n maan kãadem n bool a zo‑rãmba, nin-kãens tõe n loee noor wakat ning pʋg‑sɩdã sẽn ket n be ne-bã sɩda? Bãmb sã n ket n be ne pʋg-paalã sɩda, b ka tõe n loe noor ye.

²⁰ Daar n wat tɩ b na n yiis pʋg-paal sɩdã b sʋka. Dẽ, wakat-kãnga, b na yaool n loe noore.

²¹ Ned ka rɩkd peen-paalg n lisg fu-kʋdg ye, bala, peen-paalgã na n kɩtame tɩ fu-kʋdgã kẽeg n yɩɩg pĩnda.

²² Ned ka be sẽn na n sui reezẽ rã-paalg ko-wao-kʋdẽ ye. Sã n ka rẽ, ko-waoosã na pusi, tɩ rãamã raage, la ko-waoosã na n yɩɩ bõne. Reezẽ rã-paalg tog n suii ko-wao-paals pʋse.

A Zeezi karen-biis yãgsa kood vʋʋsg daare

²³ Zʋɩf-rãmbã vʋʋsg daar a yembre, a Zeezi ne b karen-biisã dag n pɩʋʋgda pʋto, la b karen-biisã sẽn kẽndã, b sɩngame n yãgs koodo.

²⁴ Fariizẽ-dãmbã yeela a Zeezi yaa: «Gese, yaa bõe tɩ karen‑biisã maand bũmb ning sẽn ka zems tɩ maan vʋʋsg daare?»

²⁵ A Zeezi leok-b lame n yeele: «Yãmb zɩ n karem bũmb ning a Davɩɩd sẽn maan b yel-pakrã wakatã la? Komã sẽn yõk yẽnda ne neb nins sẽn dag n be ne yẽnda wã laa?

²⁶ Yẽnda sẽn kẽ Wẽnnaam doogẽ wã to‑to maan-kʋʋd a Abiyataar wakatẽ, n dɩ kaset burã, la a yãk n kõ neb nins sẽn dag n be ne yẽnda wã tɩ yaool n dag n ka zems tɩ b rɩ, kal maan-kʋʋdbã balã laa?»

²⁷ B rag n yet‑b lame: «Vʋʋsg raarã maana ninsaal yĩnga, la b ka maan ninsaal vʋʋsg daarã yĩng ye.

²⁸ Woto yĩnga, Ninsaal Bi-riblã n so vʋʋsg daarã me.»