A Mark Sõng 14 - WẼNNAAM SEBRE 2014

B baooda weer n na n kʋ a Zeezi

¹ Ra keta rasem a yiib tɩ ta Pak tigrã, la bur sẽn ka rã-bɩll tigrã. La maan-kʋʋdbã kãsem-dãmbã ne tõog karen-saam-dãmbã dag n baooda sɩlem ning bãmb sẽn na n maan n paam n yõk a Zeezi n kɩt tɩ b kʋ.

² La b yeelame tɩ b ra maan tigrã wakate, tɩ rãmbg ra wa n zĩnd nebã sʋk ye.

Pag kiiga tɩdar kaam a Zeezi zugu

³ A Zeezi sẽn be Betani n zĩ yĩng soab a Sɩmo roogẽ n dɩtẽ, pag a yembr n wa be n tar albatre tʋk sẽn pid ne naar halaal tɩdar kaam, a raab sẽn yaa toogo. La a wãaga tʋkã n kiig kaamã a Zeezi zugu.

⁴ Bãmb karen-biis kẽer sũy yikame tɩ b gom ne taab n yeel tɩ yaa bõe tɩ b sãam tɩdar kaamã?

⁵ Tɩ b ra tõe n koos-a-la deniye kobs-tã n kõ naong rãmba. La b yẽgma ne pagã.

⁶ La a Zeezi yeel-b lame: Bas-y-yã-a laafɩ. Bõe tɩ yãmb namsd-a? A maana maam yel-sõmde.

⁷ Bala, naong rãmb na n kell n bee ne yãmb wakat fãa, la yãmb tõe n maan-b‑la neer y sẽn dat wakate. La mam ka na n be ne yãmb daar fãa ye.

⁸ Pagã maana a sẽn tõe. A pĩnd n ninga mam yĩngã tɩdar kaam m mumb yĩnga.

⁹ Mam yeta yãmb sɩda tɩ dũni tɛk fãa, zĩig ning fãa b sẽn na n moon koe-no-kãngã, b na n togsa bũmb ning pagã sẽn maanã, a tẽegr yĩnga.

A Zʋdaas Iskaryo zãmba a Zeezi

¹⁰ A Zʋdaas Iskaryo sẽn yaa a Zeezi karen-biis piig la a yiibã ned a yembr kẽnga maan-kʋʋdbã kãsem-dãmb nengẽ n tɩ yeel-b t'a na n yõka a Zeezi n kõ-ba.

¹¹ Koe-kãng yɩ-b-la noogo, tɩ b kãab-a ligdi. La a Zʋdaas baoo weer ning a sẽn na paam n yõk bãmb n kõ.

A Zeezi rɩta Pak ne b karen-biisã

¹² Bur sẽn ka rã-bɩll tigrã pipi daar sẽn yaa Pakã pe-bilã kʋʋb raare, a Zeezi karen-biisã soka bãmb tɩ b ratame tɩ bãmb kẽng n tɩ segl Pakã tigr rɩɩb yɛ bãmb yĩnga.

¹³ La a Zeezi tʋma b karen-biis a yiib n yeel-ba: Kẽng-y tẽngã pʋgẽ, la yãmb na n sega rao sẽn zɩt koom ne yʋʋre. Pʋg-y yẽnda.

¹⁴ La a sẽn na n kẽ zak ningã, bɩ y yeel yirã soab tɩ karen-saamb sokdame yaa: «Zĩig bee yɛ mam sẽn na n dɩ Pakã tigr ne m karen-biisã?»

¹⁵ La a na n wilga yãmb do-kãseng sẽn be roog zugu, sẽn segle, tɩ teed fãa be a pʋgẽ. Yaa be la yãmb na n segl pakã tõnd yĩnga.

¹⁶ Karen-biisã loogame n kẽng tẽngã pʋgẽ, la b mikame tɩ bũmba fãa yɩɩ wa a Zeezi sẽn da yeelã, la b segla Pakã tigrã.

¹⁷ Zĩ-sobd sẽn ta, bãmb waa ne b karen-biisã piig la a yiibã.

¹⁸ Bãmb sẽn zĩ n dɩtẽ, a Zeezi yeelame: Yãmb ned a yembr sẽn dɩt ne maamã n na n zãmb maam.

¹⁹ Sũ-sãang sɩng n yõka bãmb tɩ b sok a Zeezi yembr-yembre: Yaa maam?

²⁰ A Zeezi leoka bãmba: Yaa yãmb piig la a yiibã ned a yembr sẽn tʋmd a nug ne maam laagẽ wã.

²¹ Ninsaal Bi-riblã na n kii wa b sẽn gʋls b yellã to-to wã. La rao ning sẽn na n yõk-a bãmb n kõ wã na n paama toogo. Rao-kãng ma sã n dag n ka rogẽ yã-a n são.

²² Rɩɩbã wakate, a Zeezi rɩka bur n ning bark n kao n kõ bãmb n yeele: «Deeg-y n dɩ-y-yã. Yõwã yaa mam yĩngã.»

²³ Dẽ poore, bãmb dɩka bõn-yũudla, n ning-a bark n kõ b karen-biisã, la b fãa yũume.

²⁴ La a Zeezi yeela bãmb yaa: «Yõwã yaa mam zɩɩm, kãab-paalg zɩɩm sẽn daag neb wʋsg yĩnga.»

²⁵ Mam yeta yãmb sɩda, tɩ mam kõn leb n yũ reezẽ rãam yɛs hal tɩ ta daar ning mam sẽn na n yũ a paalg Wẽnnaam soolmẽ wã ye.

A Zeezi pĩnd n togsa a Pɩyɛɛr kɩɩsgo

²⁶ Bãmb sẽn yɩɩl yɩɩlã n sɛ, bãmb kẽnga oliiv tɩɩs tãngã zugu.

²⁷ A Zeezi yeela b karen-biisã yaa: Yãmb fãa na n targ n basa maam. Tɩ bõe a gʋlsa a woto: «Mam na n wẽe pe-kɩɩmã, la piisã na n sãeegame.»

²⁸ La mam sã n vʋʋge, mam na n denga yãmb taoor Galɩle.

²⁹ A Pɩyɛɛr yeela bãmb yaa: «Baa nebã fãa sã n targ n bas yãmba, mam yẽ kõn targ ye.»

³⁰ A Zeezi leoka yẽnda: «Mam yeta foom sɩda, tɩ rũndã, yʋngã bala, sẽn deng no-raoog kɛleng a yiib soabã, foom, fo na n kɩɩsa naoor a tãab tɩ f ka mi maam ye.»

³¹ La a Pɩyɛɛr yeela ne pãng n yɩɩd pĩnda: «Baa sã n yaa tɩlɛ tɩ mam naag yãmb n ki, mam kõn kɩɩs tɩ m ka mi yãmb ye.» La bãmb fãa me yeela a woto.

A Zeezi pʋʋsg Zetsemaane

³² Bãmb taa zĩig a yembr sẽn boond tɩ Zetsemaane. La a Zeezi yeela b karen-biisã tɩ b zĩnd ka tɩ bãmb kẽng n tɩ pʋʋs la b wa.

³³ B peega a Pɩyɛɛr ne a Zak la a Zã tɩ b tũ bãmba. A Zeezi sɩngame n paam sũur zɩ-kãsenga.

³⁴ Bãmb yeela a Pɩyɛɛr dãmb yaa: «Sũ-sãang n tar maam hal n dat n kʋ maam. Pa-y ka n neende.»

³⁵ Dẽ, a Zeezi kẽnga taoor bilfu, n vãbend tẽng n pʋʋs n yeel tɩ sã n dag n tõeẽ bɩ to-kãngã da paam bãmb ye.

³⁶ Bãmb yeelame: «Abba, m ba, yãmb tõee bũmb fãa. Yiis-y bõn-yũudl‑kãngã mam taoore. Baoosgo, da maan-y mam daab ye, maan-y y raabo.»

³⁷ A Zeezi waa b karen-biisã nengẽ n mik tɩ b gõeeme. La bãmb yeela a Pɩyɛɛr yaa: «Sɩmo, fo gõeeme la? Fo ka tõe n neend lɛɛr a yembre?

³⁸ Neend-y la y pʋʋse n da wa n lʋɩ makr pʋg ye. Sɩɩgã ratame, la yĩngã pãng paoodame.»

³⁹ A Zeezi leb n zãaga bilf n tɩ pʋʋs wa pĩndã bala.

⁴⁰ Bãmb leb n waa n mikame tɩ b karen-biisã gõeeme yɛsa, bala, gõeemã rag n tar-b-la wʋsgo. La b karen-biisã ka mi b sẽn na n leok bãmb tɩ bũmb ning ye.

⁴¹ A Zeezi leb n waa naoor a tãab soab n yeel bãmb yaa: «Kell n gũs-y moasã n vʋʋse. Maan n sɛɛme. Wakatã taame. Ges-y-yã, b zãmba Ninsaal Bi-riblã n kõ yel-wẽn maandbã.

⁴² Yik-y tɩ d kẽnge. Ned ning sẽn na n zãmb-a maam n yõk n kõ wã kolgdame.»

A Zeezi yõkre

⁴³ A Zeezi sẽn nan ket n gomda, a Zʋdaas sẽn yaa bãmb karen-biisã piig la a yiibã ned a yembr waame, la a waa ne neb kʋʋng sẽn zãad sʋʋs la rasaba, maan-kʋʋdbã kãsem-dãmbã ne tõog karen-saam-dãmbã ne kãsem-dãmbã sẽn tʋme.

⁴⁴ Ned ning sẽn na n zãmb a Zeezi wã dag n kõo bãmb bãnd n yeel tɩ ned ning yẽnda sẽn na n mokã, yaa nin‑kãng la a Zeezi. Bɩ b yõk-a, n gũ-a neer n tall‑a n looge.

⁴⁵ A Zʋdaas sẽn ta bala, a kolga a Zeezi n yeel-ba «karen-saamba», la a mok-ba.

⁴⁶ Neb a taabã yõka a Zeezi. A Zʋdaas waa ne sodaase.

⁴⁷ Ned a yembr sẽn dag n be beenẽ wõoga a sʋʋg n kɛ maan-kʋʋd kãsmã tʋmtʋmd n fiuug a tʋbre.

⁴⁸ A Zeezi goma ne-b n yeele: «Yãmb waa ne sʋʋs la roay n na n yõk maam wa m yaa fãada!

⁴⁹ Mam dag n bee ne yãmb daar fãa n zãmsd nebã wẽnd doogẽ wã, la yãmb ka yõk maam ye. La yaa tɩ gʋls-sõamyã na paam pidsgu.»

⁵⁰ La bãmb karen-biisã fãa basa bãmb n zoe.

⁵¹ Bi-bɩɩg a yembr n dag n lob fu-goabg bal n tũ bãmba.

⁵² La b gãda yẽnda t'a bas a fu-goabgã n zoe beelle.

A Zeezi bee kaoreng yɛl bʋ-bʋʋdbã taoore

⁵³ Bãmb talla a Zeezi n kẽng maan-kʋʋdbã kãsem yiri, zĩig ning maan-kʋʋdbã kãsem-dãmbã fãa la kãsem-dãmbã ne tõog karen-saam-dãmbã sẽn tigmã.

⁵⁴ A Pɩyɛɛr pʋgla bãmb yɩɩg-yɩɩga, n ta maan-kʋʋdbã kãsem zakẽ n zĩnd ne tʋmtʋmdbã n woot bugum.

⁵⁵ Maan-kʋʋdbã kãsem-dãmbã ne kaoreng yɛl bʋ-bʋʋdbã fãa baoo kaset dãmb sẽn na n dõd a Zeezi n kɩt tɩ b kʋ-ba, la b ka yã ye.

⁵⁶ Bala, neb wʋsg yaga zĩrẽ n dõd bãmba la b kasetã ka zems taab ye.

⁵⁷ Neb kẽer yik n kɩsa kaset zĩrẽ ne bãmb yell n yeel tɩ bãmb wʋma a Zeezi sẽn yeele:

⁵⁸ «Mam na n sãama Wẽnd-do-kãngã ninsaalb nus sẽn me wã, n lebs n me a to ninsaalb nus sẽn ka me, dasem a tãab pʋgẽ.»

⁵⁹ La baa ne yel-kãnga, bãmb kasetã ka zems taab ye.

⁶⁰ Dẽ, maan-kʋʋdbã kãsem yika tigingã sʋk n sok a Zeezi yaa: «Yãmb ka leokd tɩ bũmb la? Yaa bõe rõadg la nebã rõt yãmbã?»

⁶¹ A Zeezi sĩndame n ka leok tɩ bũmb ye. Maan-kʋʋdbã kãsem leb n soka bãmb yɛsa: «Yaa yãmb la Kiris, Wẽnnaam sẽn yaa bark soabã Bi-riblã bɩ?»

⁶² A Zeezi leokame n yeele: «Mam sɩd yaa Kirisi. La yãmb na n yãnda Ninsaal Bi-riblã sẽn zao Sẽn-Tõe-yã-Fãa wã rɩtgo, la b sẽn wat ne sawato.»

⁶³ Dẽ, maan-kʋʋdbã kãsem pãrsa a fut n yeele: «Tõnd leb n rata kaset rãmb n maan bõe?

⁶⁴ Yãmb wʋma b sẽn gom n paoog Wẽnnaamã. Yãmb tagsda a wãna?» La nebã fãa kaoo bãmb bʋʋd n yeel tɩ b zemsa kũum.

⁶⁵ Neb kẽer sɩngame n tʋbs bãmb kolkoodo, n pil bãmb neng ne peend n pãb bãmb ne nug-gila, n yeel bãmb yaa: «Togs-y bãngr goamã.» La tʋmtʋmdbã deega a Zeezi n laal bãmb pegse.

A Pɩyɛɛr kɩɩsame t'a ka mi a Zeezi ye

⁶⁶ A Pɩyɛɛr sẽn zĩ zakã pʋgẽ wã, maan-kʋʋdbã kãsem tʋmtʋmd-poak n wa be.

⁶⁷ A sẽn yãnd a Pɩyɛɛr sẽn woot bugmã, a ges-a lame n yeel-a: «Yãmb me rag n bee ne Nazarɛt dao a Zeezi.»

⁶⁸ Yẽnda kɩɩsame n yeele: «Mam ka mi ye. Mam ka bãng fo sẽn dat n togs bũmb ningã ye.» La a yiime n kẽng zãongẽ wã. [La no-raoog kelmame].

⁶⁹ Tʋmtʋmd-poakã sẽn yã yẽnda, a leb n sɩngame n wilg neb nins sẽn be beenẽ wã t'a Pɩyɛɛr yaa a Zeezi neda.

⁷⁰ La a Pɩyɛɛr leb n kɩɩsame tɩ ka sɩd ye. Sẽn yɩ bilfu, neb nins sẽn be beenẽ wã yeela a Pɩyɛɛr yaa: «Fo sẽ yaa bãmb neda, bala, fo yaa Galɩle neda!»

⁷¹ La a sɩngame n kãab a meng n wẽen n yeele: «Mam ka mi rao ning yãmb sẽn gomd a yellã ye.»

⁷² Wakat-kãng bala, no-raoog kelma naoor a yiib soaba. La a Pɩyɛɛr tẽega gomd ning a Zeezi sẽn dag n yeel yẽnda wã: «Sẽn deng no-raoog sẽn na n kelem naoor a yiibu, fo na n kɩɩsa naoor a tãab tɩ f ka mi maam ye.» La a sẽn tagse, a yãbame.