A Mark Sõng 13 - WẼNNAAM SEBRE 2014

Bãn sẽn wilgd wakat saabo

¹ A Zeezi sẽn yit wẽnd doogẽ wã, bãmb karen-biig a yembr yeela bãmb yaa: «Karen-saamba, ges-y roogã kugã neerlem la meebã!»

² A Zeezi leoka yẽnda: «Fo nee ro-kãsems kãensã? Kugr baa a yembr kõn pa a to zug b sẽn kõn leeb n lub ye.»

³ A Zeezi zĩnda oliiv tɩɩs tãngã zugu, tɩ b nengã tees wẽnd doogã. La neb sẽn ka be ne bãmbã, a Pɩyɛɛr ne a Zak la a Zã la Ãndere kosa a Zeezi yaa:

⁴ «Wilg-y tõnd bõn-kãng sẽn na n wa wakat ninga, la bãnd sẽn na n wilg bõn-kãens fãa saab wakate.»

⁵ La a Zeezi sɩngame n yeel bãmba: «Gũus-y y mens neer tɩ ned da tudg yãmb ye.

⁶ Bala, neb wʋsg na n dɩka mam yʋʋr n wa n yeel tɩ bãmb yaa maam, la b na n tudga neb wʋsgo.

⁷ Yãmb sã n wʋm zabr rãamde, la y wʋm zabr kibare, bɩ y ra yɛɛs ye, bala, yaa tɩlɛ tɩ bõn-kãens fãa zĩndi, la rẽ nan ka wakat saab nand ye.

⁸ Tẽng a ye rãmb na n yika zabr ne tẽng a to rãmba, tɩ soolem a ye rãmb yik ne soolem a to rãmba. La tẽn-digimdg na n zĩnda zĩig-zĩiga, la kom na n zĩndame. Bõn-kãens fãa na n yɩɩ wa rogem toog sɩngr bala.

⁹ Gũus-y y mense. Neb na n yõga yãmb n kẽng bʋʋd zĩisẽ, la b na n pãba yãmb karen-dot pʋse. Neb na n yõga yãmb n kẽng Gʋvɛrneer dãmb la rĩm-dãmb taoor mam yĩnga, tɩ bãmb paam n wʋm kasetã.

¹⁰ Yaa tɩlɛ tɩ koe-noogã reng n moon tẽmsã fãa pʋse.

¹¹ B sã n yõg yãmb n kẽnd bʋʋd zĩigẽ, bɩ y ra maan yɩɩr ne yãmb sẽn na n tɩ yeel tɩ bũmb ning ye. Togs-y bũmb ning Wẽnnaam sẽn na n wilg yãmb wakat-kãngã, bala, ka yãmb n na n gom ye, yaa Sɩɩg-sõngo.

¹² Ned na n yõka a ba-biig n kɩs tɩ b kʋ. Ba na n yõka a biig n kɩse, tɩ Kambã yik ne b ba-rãmb la b ma-rãmba, n kɩt tɩ b kʋ-ba.

¹³ Nebã fãa na n kisga yãmb mam yʋʋrã yĩnga, la ned ning fãa sẽn na yals kãenkãe hal tɩ wakat ta na paam fãagre.

¹⁴ Yãmb sã n wa n yãnd ‹sãoong bõn-wẽngã› t'a be zĩig ning sẽn ka zems t'a beẽ wã (bɩ sẽn karemd-a wã wʋm a võor sõama) woto, bɩ neb nins sẽn be Zʋʋde soolmẽ wã zoe n dʋ tãmsã,

¹⁵ tɩ ned ning sẽn be a roog zug ra sig n kẽ a roogẽ n na n dɩk bũmb ye.

¹⁶ La bɩ ned ning sẽn be a pʋʋgẽ ra lebg n tɩ rɩk a fuug ye.

¹⁷ Pagb nins sẽn tʋta la sẽn yẽsemd kamb na yã toog da-kãens daare.

¹⁸ Pʋʋs-y tɩ bõn-kãens ra yɩ waood wẽnd ye.

¹⁹ Bala, tood nins sẽn na n zĩnd da-kãens daarã, sẽn sɩng ne Wẽnnaam sẽn naan dũni hal tɩ ta moasã, a buud nan ka zĩnd ye, la tood a woto buud kõn leb n zĩnd ye, abada.

²⁰ Zu-soabã sã n dag n ka boogẽ da-kãens sõorã, ned baa a yembr dag n kõn põs ye. La nin-tũusdsã bãmb sẽn tũusã yĩnga, bãmb booga da-kãens sõore.

²¹ Dẽ, ned sã n yeel yãmb tɩ Kiris bee ka, wall b bee ka sẽnẽ, bɩ y ra tẽ-a ye.

²² Bala, neb sẽn yagd zĩrẽ tɩ b yaa Kirisi, la neb sẽn yagd zĩrẽ tɩ bãmb yaa Wẽnnaam no-rɛɛsdb na n yikame n maan bãn la bõn-yɛɛsdse, tɩ b sã n tõe, bɩ b tudg nin-tũusdsã.

²³ Gũus-y y mense. Mam pĩnd n togsa yãmb bũmba fãa.»

Ninsaal Bi-riblã waoongo

²⁴ Wakat-kãnga, to-kãng zugẽ, wĩntoogã na n sobgame la kiuugã kõn kõ a vẽenem yɛs ye.

²⁵ Ãdsã na n yii yĩngr n dʋʋge, la saasẽ pãens rãmbã na n digimdame.

²⁶ Dẽ poore, nebã na n yãnda «Ninsaal Bi-riblã sẽn wat ne sawato, ne pãn-kãsenga, la ne ziiri.

²⁷ La bãmb na n tʋma b malegsã, n tigs b nin-tũusdsã sẽn be dũni kɩrems a naasã, hal dũni tɛk tɩ ta yĩngr tɛka.

²⁸ Ges-y kankang n paam zãmsgo: a sã n tão wil-poal n tobdẽ, yãmb miime tɩ sig-noor kolgdame.

²⁹ Woto me, yãmb sã n yãnd tɩ bõn-kãens maandẽ, bɩ y bãng tɩ Ninsaal Bi-riblã waoong kolgame, la b waame n sa.

³⁰ Mam yeta yãmb sɩda, tɩ zamaan‑kãngã kõn looge, hal tɩ bõn-kãens fãa paam pidsgu.

³¹ Yĩngr la tẽng na looge, la mam goamã kõn tol n loog ye, abada.

³² Sã n yaa ne da-kãng daare la a wakatã, ned baa a yembr ka mi ye: Malegs sẽn be arzãn ka mi, bi-riblã me ka mi. Yaa m ba bal n mi.

³³ Gũus-y neere. Neend-y-yã, bala, yãmb ka mi ra-kãng sẽn na n wa wakat ning ye.

³⁴ A na n yɩɩ wa rao sẽn togd sore, n bas a yir ne a tʋmtʋmdba, n wilg ned kam fãa a tʋʋmde la a yeel zag-no-gũudã t'a gũ.

³⁵ Woto yĩnga, neend-yã, tɩ yãmb ka mi wakat ning yirã soab sẽn na n wa wã ye. Tõe n yɩɩ zĩ-sobdo, wall yʋn-sʋka, wall no-kɛleng wakate, wall yibeoogo.

³⁶ Maan-y rabeem tɩ b ra ling n wa n mik tɩ yãmb gõeeme ye.

³⁷ Bũmb ning mam sẽn yet yãmbã, mam yet-a-la nebã fãa: Neend-y-yã.»