A Mark Sõng 10 - WẼNNAAM SEBRE 2014

Pag yiisgu, la sɩd basbo

¹ A Zeezi yii be n kẽng Zʋʋde soolem pʋgẽ tẽmsẽ, la Zʋrdẽ kʋɩlgã rʋʋnde. La neb kʋʋng leb n tigma bãmb nengẽ, la bãmb leb n zãms-b lame wa b sẽn mi n maandẽ wã.

² Fariizẽ-dãmbã kolga a Zeezi n dat n bẽd bãmba. B sokame: «Dẽ yĩnga, noor beeme tɩ rao dig a paga?»

³ A Zeezi leoka bãmba yaa: «A Moyiis tõogã yeela yãmb tɩ bõe?»

⁴ Bãmb yeelame: «A sakame tɩ b gʋls baosg sebr n kɩs-a la b rig-a.»

⁵ A Zeezi yeela bãmba: «Yaa yãmb sũyã sẽn diglmã yĩng la a Moyiis kõ yãmb tõ-kãngã.

⁶ La hal dũni sɩngrẽ, Wẽnnaam naana rao la paga.

⁷ Yaa woto yĩng tɩ rao na n yii n bas a ba la a ma, n zĩnd ne a paga.

⁸ La bãmb b yiibã fãa na n lebga yĩng a yembre. Woto, bãmb ka leb n yaa a yiib yɛs ye, bãmb yaa yĩng a yembre.

⁹ Dẽ, bɩ ninsaal da welg bũmb nins Wẽnnaam sẽn lagem ne taab ye.»

¹⁰ Bãmb sẽn kẽ roogẽ, b karen-biisã leb n soka bãmb koe-kãng yelle.

Kom‑bõoneg bark ningri

¹¹ A Zeezi yeela bãmb yaa: «Ned sã n dig a pag n dɩk pag a to, a yaa yoaad a pipi pagã nifẽ.

¹² La pag sã n bas a sɩd n dɩk a to, a maanda yoobo.»

Kom-bãooneg ne a Zeezi

¹³ Neb talla kom-bãooneg n wa a Zeezi nengẽ tɩ b sɩɩs-ba, la b karen-biisã lenga neb nins sẽn wa-b ne-bã.

¹⁴ A Zeezi sẽn yã bõn-kãnga, a ka yɩ b sũurã noog baa bilf ye. La bãmb yeela b karen-biisã yaa: «Bas-y kom-bãoonegã tɩ b wa mam nengẽ la y ra gɩdg-b ye, tɩ Wẽnnaam soolmã yaa neb nins sẽn wẽnd-b bãmbã yĩnga.

¹⁵ Mam yeta yãmb sɩda tɩ ned ning fãa sẽn kõn deeg Wẽnnaam soolmã koɛɛg wa bi-bilfu, a kõn kẽ be ye.»

¹⁶ Dẽ, bãmb deega kambã n tik-b ne b nusi, n ning-b barka.

Arzɛk soaba

¹⁷ A Zeezi sẽn yik n dɩk sore, dao a yembr n zoe n wa n yĩgimd bãmb taoor n sok bãmb yaa: «Karen-saamb sõngo, bõe la mam na n maan n paam vɩɩm sẽn kõn sa?»

¹⁸ A Zeezi yeela yẽnda: «Bõe tɩ fo boond maam tɩ sõngo? Nin-sõng ka be tɩ sã n ka Wẽnnaam b yembr bal ye.

¹⁹ Fo mii tõodã: Da kʋ ye. Da yo ye. Da zu ye. Da kɩs kaset-zĩrẽ ye. Da zãmb ned ye. Waoog f ba la f ma.»

²⁰ Yẽnda leoka bãmb yaa: «Karen-saamba, mam saka rẽnda fãa hal m yãadem wakat tɩ ta moasã.»

²¹ A Zeezi ges-a lame n noang-a. La bãmb yeela yẽnda: «Bũmb a yembr n paoog foom. Kẽng n koos bũmb nins fãa fo sẽn tarã n kõ naong rãmba, la fo na paam paoong arzãna, la wa n tũ maam.»

²² La koe-kãng kɩtame tɩ raoã neng gãnem t'a loog ne sũ-sãanga, bala, a rag n tara paoong wʋsgo.

²³ A Zeezi wẽnegame n ges n yeel b karen-biisã yaa: «A na n yɩɩ toog ne neb nins sẽn tar-b arzegsã tɩ kẽ Wẽnnaam soolmẽ.»

²⁴ A Zeezi gom-kãng yɛɛsa b karen-biisã, la a Zeezi kẽnga taoor n yeel-ba: «M kamba, ad na n yɩɩ toog ne [neb nins sẽn teegd arzegsã] tɩ b kẽ Wẽnnaam soolmẽ.

²⁵ A yaa naana tɩ yʋgemd tũ fu-pĩim yõorẽ n looge, n yɩɩd arzɛk soab sẽn na n kẽ Wẽnnaam soolmẽ.»

²⁶ Bãmb karen-biisã yɛɛs n paasame n sok taab yaa: «Dẽ, ãndã n tõe n paam fãagre?»

²⁷ A Zeezi gesa bãmb n yeele: «Ninsaal ka tõe bõn-kãng ye, la ka a woto ne Wẽnnaam ye. Bala, Wẽnnaam tõee bũmb fãa.»

²⁸ A Pɩyɛɛr sɩngame n yeel bãmba: «Gese, tõnd basa bũmba fãa n tũud yãmba.»

²⁹ A Zeezi leokame: «Mam yeta yãmb sɩda, tɩ ned ka be sẽn na n bas a yiri, bɩ a ba-bi-raopa, bɩ a ba-bi-pogse, bɩ a ma, bɩ a ba, bɩ a kamba, bɩ a pʋt mam yĩng la koe-noogã yĩnga,

³⁰ n ka paam yiyã, la ba-bi-raopa la ba-bi-pogse, la ma-rãmba, la kamba, la pʋt naoor koabga, la namsg ye. La wakat sẽn watã, a na paam vɩɩm sẽn kõn sa.

³¹ Taoor rãmb wʋsg na n lebga poorẽ dãmba, tɩ poorẽ dãmb wʋsg lebg taoor dãmba.»

A Zeezi leb n togsa b kũumã ne b vʋʋgrã yelle

³² Bãmb dɩka sor n dabd Zeruzalɛm, la a Zeezi lʋɩɩ bãmb taoore. Bãmb karen-biisã dag n bee yɛɛsg pʋgẽ, la neb nins sẽn dag n pʋgd bãmbã dag n zoeta rabeem. A Zeezi leb n peega b karen-biis piig la a yiibã n sɩng n togs-b bũmb nins sẽn na n paam bãmbã.

³³ Gese, tõnd dabda Zeruzalɛm, la b na n yõka Ninsaal Bi-riblã n kõ maan-kʋʋdbã kãsem-dãmbã ne tõog karen-saam-dãmbã. La b na n kaoo bãmb bʋʋd n yeel tɩ b kʋ-ba. B na n ninga bãmb bu-zẽms nusẽ,

³⁴ b na n yaala bãmba, n tʋbs bãmb kolkoodo, n pãb bãmb ne kalwaase, n kʋ bãmba. La b ki tɩ rasem a tãabo, b na vʋʋge.

A Zak ne a Zã kosgo

³⁵ A Zebde kom-dibli a Zak ne a Zã kolga a Zeezi n yeel bãmb yaa: «Karen-saamba, tõnd datame tɩ yãmb maan bũmb ning tõnd sẽn na n kos yãmbã n kõ-do.»

³⁶ A Zeezi soka bãmba: «Bõe la yãmb dat tɩ mam maan n kõ yãmba?»

³⁷ Bãmb yeelame: «Yãmb sã n wa n be y naamã sẽn tar ziirã pʋgẽ, sak-y tɩ tõnd ned a yembr zĩnd yãmb dɩtgo, t'a to wã zĩnd yãmb goabga.»

³⁸ A Zeezi yeel‑b lame: «Yãmb pa mi y sẽn kot bũmb ning ye. Yãmb tõe n yũu wamd ning b sẽn na n tugl‑ma la y so koom ning b sẽn na n so‑ma?» A Zeezi leoka bãmb yaa: «Yãmb ka mi bũmb ning yãmb sẽn kotã ye. Dẽ yĩnga, yãmb tõe n yũu bõn-yũudl ning mam sẽn na n yũ wã, la y reeg toog ning mam sẽn na n deegã?»

³⁹ Bãmb yeelame tɩ b tõeeme! La a Zeezi leoka bãmba: «Yaa sɩda, yãmb na n yũu bõn-yũudl ning mam sẽn na n yũ wã, la y reeg toog ning mam sẽn na n deegã.

⁴⁰ La a ka be ne maam tɩ sak tɩ yãmb zĩnd mam dɩtgo wall mam goabg ye. Zĩ-kãng segla Wẽnnaam sẽn yãk neb nins tɩ tog n zĩnd be wã yĩnga.»

⁴¹ Karen-biis piigã sẽn wʋm gom-kãngã, b sũur sãama ne a Zak la a Zã.

⁴² A Zeezi boola bãmb n yeel-b yaa: «Yãmb miime tɩ neb nins nebã sẽn get wa soolem nanambsã maanda b nebã pãnga, la tɩ nin-kãsemsã soo bãmb ne pãnga.

⁴³ La a kõn yɩ a woto yãmb sʋk ye. Ned sã n dat n yɩ kãseng yãmb sʋka, bɩ a yɩ yãmb tʋmtʋmda.

⁴⁴ La ned sã n dat n yɩ taoor soab yãmb sʋka, bɩ a yɩ yãmb fãa yamba.

⁴⁵ Bala, Ninsaal Bi-riblã sẽn wa wã, ka tɩ nebã na tʋm bãmb yĩng ye, la yaa tɩ tʋm nebã yĩnga, la tɩ kõ b vɩɩm tɩ yɩ yaoodo, tɩ neb wʋsg tõe n paam fãagre.»

Zoang a Bartime nin pukri

⁴⁶ Bãmb taa Zeriko. La bãmb sẽn yit Zeriko ne b karen-biisã la ne neb kʋʋng wʋsgã, a Time biig a Bartime rag n zĩi sorã kɩreng n bõosdẽ.

⁴⁷ Yẽnda sẽn wʋm tɩ yaa Nazarɛt Zeezi n watã, a sɩngame n kelem n yeele: «Zeezi! A Davɩɩd Bi-ribla! Zoe-y mam nimbãanega.»

⁴⁸ Neb wʋsg lenga yẽnda n yeel-a t'a sĩndi, la a zẽka a koɛɛg n yɩɩd pĩnd n yeele: «A Davɩɩd Bi-ribla, zoe-y mam nimbãanega!»

⁴⁹ A Zeezi yalsame n yeel tɩ b bool-a. La b boola zoangã n yeel-a: «Keng f sũuri. Yik tɩ b boonda foom.»

⁵⁰ Zoangã loba a fuug tẽng n yik tao‑tao, n wa a Zeezi nengẽ.

⁵¹ A Zeezi sok-a lame yaa: «Bõe la fo rat tɩ mam maan n kõ foom?» Zoangã leoka bãmb n yeele: «M karen-saamba, m data m ninã pukri.»

⁵² La a Zeezi yeel-a lame: «Kẽnge! Fo tẽeb n maag foom.» Tao-tao bala, a paama a nini, la a sɩngame n tũ a Zeezi sorã zugu.