A Luk Sõng 9 - WẼNNAAM SEBRE 2014

A Zeezi tʋma karen-biis piig la a yiibu

¹ A Zeezi boola karen-biis piig la a yiibã n kõ-b pãnga la noor tɩ b rig zĩn-dãmba, la b maag bãad-dãmba.

² A Zeezi tʋma bãmb tɩ b tɩ moon Wẽnnaam soolem koɛɛga, la b maag bãad-dãmba.

³ A Zeezi yeel-b lame yaa: «Da rɩk-y bũmb y kẽnda yĩng ye. Da zɩ-y dasaar bɩ korgo, buri wall ligd ye. La y ra zɩ fut a yiib‑yiib ye.

⁴ Yãmb sẽn sig zak ning pʋgẽ, bɩ y pa be n tãag y sẽn na n yi be n looge.

⁵ La zĩig ning fãa nebã sẽn ka reeg yãmba, y sã n wa n yit tẽn-kãngã, bɩ y pĩms y naoã tom tɩ yɩ kaset b yĩnga.»

⁶ A Zeezi karen-biisã loogame n kẽng tẽng‑tẽnga, n moond koe-noogã, la b maagd neb zĩiga fãa.

A Zãmbatiis kũum

⁷ AErood sẽn yaa Gʋvɛrneerã dag n wʋma bũmb nins fãa sẽn dag n maandã, la a rag n ka mi yẽnda sẽn na n tags tɩ bũmb ning ye. Bala, neb kẽer dag n yetame t'a Zã vʋʋgame n yi kũum sʋka,

⁸ tɩ kẽer yetẽ tɩ Wẽnnaam no-rɛɛsdbã sẽn zĩnd pĩndã ned a ye n vʋʋge.

⁹ La a Erood yeelame: «Mam kɩtame tɩ b fiuug a Zã zugu. Dẽ, ned ning mam sẽn wʋmd tɩ b gomd a yell woto wã yaa ãnda soaba?» La yẽnda rag n baoodame n dat n yãnd a Zeezi.

A Zeezi dɩlga neb tus a nu

¹⁰ Tẽn-tʋmdbã sẽn lebg n wa, b togsa a Zeezi bũmb nins fãa bãmb sẽn maanã. A Zeezi peega bãmb n yi kɛɛng n kẽng tẽng a yembr sẽn boond tɩ Betsayɩda sẽnẽ.

¹¹ La neb kʋʋngã bãngame n pʋg bãmba. A Zeezi reeg-b lame n gom ne-b Wẽnnaam soolem yelle, la b maag neb nins sẽn dag n dat maagrã me.

¹² Wĩndgã sẽn kɩlle, karen-biis piig la a yiibã kolgame n yeel a Zeezi yaa: Kɩt-y tɩ neb kʋʋngã loog n kẽng tẽn-bãoonegẽ wã ne pʋtã sẽn pẽ ka wã n tɩ paam gãag zĩisi, la b paam dɩɩbo. Bala, tõnd sẽn beẽ wã yaa we-rasempʋɩɩga.

¹³ A Zeezi yeela karen-biisã tɩ bãmb mensã kõ nebã rɩɩb tɩ b rɩ. La b leokame n yeele: Tõnd ka tar sẽn yɩɩd bur a nu ne zĩm a yiib ye. Sã n ka tɩ tõnd mens na n kẽngame n tɩ ra rɩɩb nin-kãensã fãa yĩnga.

¹⁴ La nebã sẽn dag n be be wã kolga raop tus a nu. A Zeezi yeela b karen-biisã tɩ b kɩt tɩ nebã zĩnd sull-sulli, neb pis-nunu.

¹⁵ Karen-biisã maana a woto n kɩt tɩ b fãa zĩndi.

¹⁶ A Zeezi reega bur a nu wã ne zĩm a yiibã n nak n ges yĩngr n ning-b barka, n yaool n kao burã ne zĩmã n kõ karen-biisã tɩ b pʋɩ neb kʋʋngã.

¹⁷ Bãmb fãa rɩɩme n tɩge, la b wʋka gɩrsã sẽn kellã n pid pet piig la a yiibu. Bur a nu ne zĩm a yiibu.

A Pɩyɛɛr kaseto

¹⁸ Daar a ye, a Zeezi rag n bee zĩig neb sẽn ka be, n pʋʋsdẽ, la karen-biisã rag n bee ne bãmba. A Zeezi soka b karen-biisã yaa: Neb kʋʋngã yetame tɩ mam yaa ãnda?

¹⁹ Bãmb leokame tɩ kẽer yetame t'a Zãmbatiisi, tɩ kẽer yetẽ t'a Eli, tɩ kẽer yetẽ tɩ Wẽnnaam no-rɛɛsdbã sẽn zĩnd pĩndã ned a ye sẽn vʋʋge.

²⁰ La a Zeezi soka bãmb yaa: La yãmba, yãmb yetame tɩ mam yaa ãnda? A Pɩyɛɛr leokame: «Yãmb yaa Kiris sẽn yi Wẽnnaam nengẽ.»

²¹ A Zeezi keooga bãmb neere, n yeel-b tɩ b ra saag n togs ned yõwã ye.

A Zeezi togsa bãmb kũum yelle

²² A Zeezi gomame n paas n yeel tɩ yaa tɩlɛ tɩ Ninsaal Bi-riblã nams wʋsgo, tɩ kãsem-dãmbã ne maan-kʋʋdbã kãsem-dãmbã la tõog karen-saam-dãmbã kɩɩs bãmba n kʋ-ba, la tɩ rasem a tãab daare bãmb na vʋʋge.

²³ Dẽ, a Zeezi yeela b fãa yaa: ned sã n dat n tũ maam, bɩ a kɩɩs a mengã ratem, n tʋk a da-pɩk daar fãa n pʋg maam.

²⁴ Sɩd me, ned ning fãa sẽn dat n kogl a vɩɩm, a vɩɩm na sãame. La ned ning sẽn na n bas a vɩɩm mam yĩnga, a na n leb n paam-a lame.

²⁵ Ned sã n paam dũni bũmb fãa, n yaool n menem wall a sãam a menga, a yõod bee yɛ ne-a?

²⁶ Sɩd me, ned sã n zoe mam yãnde, la mam goamã yãnde, Ninsaal Bi-riblã sã n wa n wa ne b ziirã, la b ba wã ziiri, ne malegs-sõamyã, b na n zoee yẽnda me yãnde.

²⁷ Mam yeta yãmb sɩd-sɩd tɩ neb nins sẽn be ka wã kẽer ka na n ki hal tɩ b yãnd Wẽnnaam soolmã.

A Zeezi neng tedgre

²⁸ Sẽn kolg rasem a nii, a Zeezi sẽn gom gom-kãensã zugẽ, bãmb peega a Pɩyɛɛr ne a Zã la a Zak n dʋ tãngã zug n na n pʋʋse.

²⁹ La bãmb sẽn pʋʋsd wakate, b nengã yalẽ tedgame, la bãmb futã lebga peels n pɩnda.

³⁰ La gese, raop a yiib n wa n gom ne a Zeezi. Dag n yaa a Moyiis ne a Eli,

³¹ n puk b meng ne ziiri, n gomd ne a Zeezi b kũumã b sẽn na n ki Zeruzalɛmã yelle.

³² Gõeem rag n namsda a Pɩyɛɛr ne a tũud-n-taasã, la bãmb neendame n yãnd a Zeezi ziirã ne raop a yiibã sẽn da be ne bãmbã.

³³ Wakat ning raopã sẽn bas a Zeezi n loogdẽ wã, a Pɩyɛɛr yeela a Zeezi yaa: «Karen-saamba, yaa sõama tɩ tõnd pa ka. D tilg fu-rot a tãabo: a yembr yãmb yĩnga, a yembr a Moyiis yĩnga, a yembr a Eli yĩnga.» Yẽnda rag n ka mi a sẽn gomd bũmb ningã ye.

³⁴ La yẽnda sẽn gomd a woto, sawadg waa n luda bãmba, la a Moyiis rãmb sẽn kẽed sawadgẽ wã, rabeem yõka bãmba.

³⁵ La koɛɛg yii sawadgẽ wã n yeele: Ada yaa mam Bi-ribl mam sẽn yãke, bɩ y kelg-a.

³⁶ La koɛɛgã sẽn gom a woto n sɛ, a Zeezi rag n yɛsa b yembre. Karen-biisã kell n sĩndame n ka togs ned bũmb ning bãmb sẽn yã wã da-kãens ye.

A Zeezi maaga biig zĩn sẽn tare

³⁷ Vẽkembeoogo, bãmb sẽn yi tãngã zug n sigi, neb kʋʋng wʋsg waa n sega a Zeezi.

³⁸ La gese, neb kʋʋngã sʋka, dao a ye n zĩnd be n zẽk a koɛɛg n yeele: Karen-saamba, m kot-y lame tɩ y ges m bi-riblã. Bala, yaa m bi-yende.

³⁹ Zĩn n kẽed-a, la a sã n kẽ-a bala, a kelemdame, la zĩnã kɩtdame t'a sobg n gʋɩgsdẽ, tɩ tãntãn-puudã yita. A sã n na n wa n yi n bas biigã, rẽ t'a nams-a-la wʋsgo, n pogl-a.

⁴⁰ Mam bõosa yãmb karen-biisã tɩ b rig-a, la b ka tõog ye.

⁴¹ A Zeezi yeelame yaa: Neb sẽn ka tẽebo, la sẽn yaa nin-wẽnse, mam na n paa ne yãmb la m maan sũ-mar ne yãmb tɩ ta wakat bʋgo? Tall f biigã n wa ne ka.

⁴² La biigã sẽn kolgdã, zĩnã lub-a-la tẽnga, n nams-a wʋsgo. La a Zeezi lenga zĩn-dẽgdã, n maag biigã n kɩs-a a ba.

⁴³ La nebã fãa yɛɛsame, b sẽn yã Wẽnnaam pãn-kãsengã yĩngã. Nebã sẽn ket n tagsd bũmb nins fãa a Zeezi sẽn maanã yell ne yɛɛsgo, a Zeezi yeela b karen-biisã yaa:

A Zeezi leb n goma b kũumã yelle

⁴⁴ Yãmba, yok-y y tʋb n kelg gom-kãensã sõama: b na n yõka Ninsaal Bi-riblã n kõ nebã.

⁴⁵ La karen-biisã rag n ka wʋmd gom-kãng võor ye. A rag n solga ne bãmba, sẽn na n yɩlg tɩ b ra bãng a võorã ye. La b rag n yɛɛsdame n ka rat n sok a Zeezi bõn-kãng wɛɛngẽ ye.

Ãnda n yaa kãseng n yɩɩda?

⁴⁶ Nokoeemd yika bãmb sʋka, tɩ b rat n bãng sẽn yaa-a kãseng n yɩɩd bãmb sʋkã.

⁴⁷ A Zeezi sẽn mi bãmb sũyã tagsgã, b peega bi-bilf n zĩnig-a b sɛɛgẽ

⁴⁸ n yeel karen-biisã yaa: «Ned ning fãa sẽn na n deeg bi-bilf‑kãngã mam yʋʋrã yĩnga, yaa mam mengã la a reeg yã. La ned ning fãa sẽn deeg maam, a reegda sẽn tʋmã maamã. Bala, ned ning sẽn yaa-a yao-zʋʋg yãmb sʋkã, yaa yẽnda soab n yaa kãsenga.»

Ned ning sẽn ka kis yãmb yaa yãmb dẽnda

⁴⁹ A Zã gomame n yeele: «Karen-saamba, tõnd yãnda rao sẽn digd zĩn-dãmb ne yãmb yʋʋre, la tõnd gɩdg-a lame, a sẽn ka naag tõnd n tũud yãmbã yĩnga.»

⁵⁰ A Zeezi leok-a lame n yeele: «Ra gɩdg-y-yã-a ye. Bala, ned sã n ka kis yãmba, a bee ne yãmba.»

A Zeezi lenga a Zak ne a Zã

⁵¹ Wakat ning b sẽn tog n zẽk a Zeezi tɩ b kẽng arzãnã sẽn kolge, bãmb tolg n yãka yam n na n kẽng Zeruzalɛm.

⁵² B tʋma neb tɩ b reng bãmb taoore. La b kẽngame n tɩ kẽ Samaari n na n segl bũmb fãa a Zeezi yĩnga.

⁵³ La nebã ka reeg a Zeezi ye, bãmb sẽn dag n dabd Zeruzalɛmã yĩnga.

⁵⁴ Bãmb karen-biis a Zak ne a Zã sẽn yã woto, b yeelame yaa: «Zu-soaba, yãmb datame tɩ d kɩt tɩ bugum yi yĩngr n sig n dɩ-b bɩ?»

⁵⁵ La a Zeezi wẽnemdame n leng bãmb [n yeele: «Yãmb ka mi sɩɩg ning sẽn tar yãmbã ye.

⁵⁶ Bala, Ninsaal Bi-riblã ka wa tɩ sãam ninsaalbã vɩɩm ye, la yaa tɩ fãag-ba.»] La bãmb kẽnga tẽng a to.

Ned sã n dat n yɩ a Zeezi karen-biiga

⁵⁷ Bãmb sẽn be sorẽ n dabda, ned n yeel a Zeezi yaa: «Mam na n tũu yãmb n kẽng zĩig ning fãa yãmb sẽn na n kẽngẽ».

⁵⁸ A Zeezi leok-a lame: «Waas tara bogdo, la liuuli sẽn yɩgdã tara tʋgdo, la Ninsaal Bi-riblã ka tar zĩig sẽn na n gãneg a zug ye.»

⁵⁹ A Zeezi yeela ned a to: «Tũ maam.» La yẽnda leoka a Zeezi yaa: «bas-y-m nand tɩ m tɩ mum m ba la m wa.»

⁶⁰ La a Zeezi leok-a lame n yeele: «Bas kũumã tɩ b mum b kũum, la foom, kẽng n moon Wẽnnaam soolem koɛɛgã.»

⁶¹ Ned a to leb n yeelame: «Zu-soaba mam na n tũu yãmba, la, sak-y tɩ m deng n tɩ pʋʋs m zakã rãmb wẽnd-na-taas la m wa.»

⁶² A Zeezi leoka yẽnda yaa: «Ned sã n gãd wãk rũng sẽn tata, la a rat n wẽnemd n ges a poorẽ, yẽnda ka zems ne Wẽnnaam soolmã ye.»