A Luk Sõng 8 - WẼNNAAM SEBRE 2014

Pagb kẽer sõnga a Zeezi

¹ Dẽ poore, a Zeezi rag n kẽnda tẽn-bɛd la tẽn-bãooneg pʋse, n moondẽ la b togsd Wẽnnaam soolem koe-noogã. Karen-biis piig la a yiibã rag n bee ne bãmba,

² n paas pagb kẽere, a Zeezi sẽn dig sɩ-wẽns sẽn dag n be ne-bã, la b maag-b n yiis b bãasã: Yaa a Maari sẽn yit Magdala, soab ning a Zeezi sẽn dig zĩn-dãmb a yopoe tɩ b yi n bas-a wã,

³ a Erood ligd gɛt a Suuza pag a Zan n paas a Suzan, la pagb a taab wʋsg sẽn dag n yãkd b paoong n sõngd a Zeezi ne b karen-biisã.

Bõn-bu-fẽrgd yel-bũndi

⁴ Neb kʋʋng wʋsg tigma taaba, la neb yii tẽms toay-toay n wa bãmb nengẽ. A Zeezi tãoo yel‑bũn-kãngã:

⁵ Bʋt a yembr n yi n na n tɩ bʋd a bõn-buudu, la yẽnda sẽn fẽrgd bõn-buudã, kẽer lʋɩɩ sor kɩrenga. Neb n taba bãmba, la liuuli rɩ-b lame.

⁶ Kẽer lʋɩɩ kugr zugu. La b sẽn yi, b kʋɩɩme, maasr sẽn ka be wã yĩnga.

⁷ Kẽer me lʋɩɩ gõos sʋka. La gõosã naaga bãmb n yi n dɩ-ba.

⁸ La kẽer lʋɩɩ zĩ-sõngẽ, n yi n wom biis tɩ ta koabg-koabga.» A Zeezi sẽn gom a woto, b zẽka b koɛɛg n yeele: «Ned ning sẽn tar-a tʋb n tõe n wʋm bɩ a wʋme.»

⁹ A Zeezi karen-biisã soka bãmb yel-bũndã võore.

¹⁰ A Zeezi leoka bãmb n yeel yaa: «B kõo yãmb tɩ y bãng Wẽnnaam soolem yel-soalmã. La ne neb a taabã, b togsda bãmb bõn-kãens ne yel‑bũnã, sẽn na n yɩl tɩ bãmb sẽn getã, bɩ b ra yã ye, la tɩ b sẽn wʋmdã, b kõn wʋm a võor ye.»

¹¹ «Yel-bũndã võor la a woto: bõn-buudã yaa Wẽnnaam goamã.

¹² Sẽn be-b sor kɩrengã yaa neb nins sẽn wʋm koɛɛgã, tɩ Sʋtãanã wat n yiisd koɛɛgã sẽn dag n be b sũyẽ wã, sẽn na n yɩl tɩ b ra tẽ n paam fãagrã.

¹³ Sẽn be-b kugrã zugã yaa neb nins sẽn wʋmd koɛɛgã n deegd-a ne sũ-noogã. La b ka tar yẽgen ye. Bãmb tẽeda wakat bilf bala, la makr wakate, bãmb basda tẽebã.

¹⁴ Bõn-buudã sẽn lʋɩ gõosã sʋkã, yaa neb nins sẽn wʋmd koɛɛgã n sɛ n looge, tɩ yɩɩre, la arzegse, la dũniyã sũ-noogã rɩ koɛɛgã t'a ka womd biis tɩ bɩ ye.

¹⁵ Zĩ-sõngã, yaa neb nins sẽn wʋmd koɛɛgã ne sũur sẽn yaa sõama la tɩrga, n talld-a, n yalsd kãenkãe, n womd biisã.»

Ned kõn yõgen fɩtl n fõgen ne peoog ye

¹⁶ Ned ka yõgend fɩtl n fõgn-a ne peoogo, wall a ning-a gãag tẽngr ye. B rogend-a-la fɩtl doagendgã zug tɩ neb nins sẽn kẽedã tõe n yãnd vẽenemã.

¹⁷ Bala, bũmb ka be sẽn lud sẽn kõn puk ye, la bũmb ka be sẽn solg sẽn kõn vẽneg ye.

¹⁸ Dẽ, bɩ y gũus ne yãmb sẽn kelgd to-to wã. Bala, b na n kõo ned ning sẽn tar‑a, la ned ning sẽn ka tar‑a, b na n deega baa bũmb ning yẽnda sẽn tagsd t'a tarame wã n bas-a.

A Zeezi ma ne b ma-biisi

¹⁹ A Zeezi ma ne b ma-bi-raop waa bãmb nengẽ, la neb kʋʋngã yĩnga, b ka tõog n ta a Zeezi ye.

²⁰ Nebã yeela a Zeezi yaa: «Yãmb ma wã bee yɩng ne b ma-bi-raopã n dat n yãnd-yã.»

²¹ La a Zeezi leoka bãmb n yeele: «Mam ma ne m ma-bi-raop yaa neb nins sẽn kelgd Wẽnnaam goamã n sakdẽ wã.»

A Zeezi kɩtame tɩ sobg yõk koom zugu

²² Daar a ye, a Zeezi kẽe koom-koglg ne b karen-biisã, n yeel-b tɩ b wa tɩ b kẽng ko-kãsengã rʋʋnde. La b loogame.

²³ La bãmb sẽn dugsd koglgã wakate, a Zeezi gũsame. La sob-kãseng yika koomã zugu, tɩ koom-koglgã rag n pid ne koom, tɩ lebg yel-pakr ne-ba.

²⁴ Karen-biisã kolgame n nek a Zeezi n yeel‑a yaa: «Karen-saamba! Karen-saamba! Tõnd na n kiime!» A Zeezi nekame, n tãs sobgã ne ko-pɛmã, la b yõkame, la zĩigã lebga sɩddd...

²⁵ Dẽ, bãmb soka b karen-biisã yaa: «Yãmb tẽebã bee yɛ?» La rabeem yõka bãmb tɩ b yɛɛs n sok taab tɩ nin-kãngã yaa yɛ neda? Bala, baa sobgã ne ko-pɛma sakda bãmb noore.

A Zeezi maaga ned zĩn sẽn dag tara

²⁶ Bãmb taa Geraaza rãmbã tẽnga, tẽng sẽn teesd Galɩle.

²⁷ La a Zeezi sẽn sig tẽnga, tẽngã rao a ye zĩn-dãmb wʋsg sẽn tar waa n sega bãmba. Hal daar zãra, a ka leb n yeelgd fut ye, la a rag n ka gãe yir ye, yaa yaadẽ.

²⁸ A sẽn yãnda a Zeezi, a kelmame n wõgemd bãmb taoor n zẽk a koɛɛg n yeele: «Wẽnnaam sẽn be saasẽ-saasẽ bi-ribl a Zeezi, yãmb data maam ne bõe? Mam bõosd-y lame tɩ y ra nams maam ye.»

²⁹ Bala, a Zeezi rag n yeta zĩn-dẽgdã sẽn dag n kẽ yẽnda hal daar zãrã t'a yi n bas raoã. B rag n sẽbda yẽnda ne bãense, n balg a naoã ne kutu, la a rag n kaooda a sẽbdsã. La zĩnã rag n talld-a lame n kẽngd we-rasempʋɩɩsẽ.

³⁰ A Zeezi soka yẽnda t'a yʋʋr la a bõe. T'a leok t'a tusa. Bala, zĩn-dãmb wʋsg n dag n kẽ yẽnda.

³¹ La zĩn-dãmbã bõosa a Zeezi tɩ b ra rig-b tɩ b kẽng zĩ-zulungẽ wã ye.

³² Kurkuy wʋsg n dag n be tãngã zug n wãbdẽ, la zĩn-dãmbã bõosa a Zeezi tɩ b kõ bãmb noor tɩ b tɩ kẽ kurkuyã. La a Zeezi kõ-b lame.

³³ Zĩn-dãmbã yii n basa raoã n tɩ kẽ kurkuyã, la kurkuyã wudga tãngã sigdgẽ, n bilim n lʋɩ koomẽ wã, la koomã rɩ-b lame.

³⁴ Neb nins sẽn dag n gũud kurkuyã sẽn yã bũmb ning sẽn maanã, b zoee n tɩ togsa koɛɛgã tẽnga pʋgẽ la pʋtẽ wã me.

³⁵ Nebã kẽngame n na n tɩ ges bũmb ning sẽn maanã. Bãmb waa a Zeezi nengẽ, la b yãnda rao ning zĩn-dãmbã sẽn yi n basã t'a zĩ a Zeezi sɛɛgẽ, n yer futu, n mi a nenga. La rabeem yõka bãmba.

³⁶ Neb nins sẽn yã bũmb ning sẽn maanã togsa bãmb rao ning zĩnã sẽn dag n tarã sẽn paam yolsg to-to.

³⁷ Geraaza soolmã nebã fãa kosa a Zeezi tɩ b zãag n bas bãmba. Bala, rabeem kãseng n dag n yõk bãmba. A Zeezi kẽe koom-koglgã n na n lebg n lebe.

³⁸ Rao ning zĩn-dãmbã sẽn yi n basã bõosa a Zeezi ne pẽdgr n dat n pa ne bãmba. La a Zeezi kuils-a lame n yeele:

³⁹ «Lebg n kuil f yir n tɩ wilg bũmb nins fãa Wẽnnaam sẽn maan n kõ foomã.» Raoã loogame n tɩ moon bũmb nins fãa a Zeezi sẽn maan n kõ yẽnda wã tẽngã fãa pʋgẽ.

Pag sẽn sɩɩs a Zeezi fuugu

⁴⁰ A Zeezi sẽn leb rʋʋndã, neb kʋʋng reega bãmba, bala, b fãa rag n gũuda bãmba.

⁴¹ La gese, dao a yembr yʋʋr sẽn boond t'a Zayiruusi, n yaa karen-doog naab waame n wõgemd a Zeezi taoor n bõos bãmb tɩ b wa yẽnda yirã.

⁴² Bala, yẽnda rag n tara a bi-pugl yende, a yʋʋm sẽn kolg piig la yiibu, n gãe n dat n ki. A Zeezi sẽn dabd be wakate, neb kʋʋngã dag n dɩdga bãmb hal wʋsgo.

⁴³ La pag a ye n dag n be be tɩ bãag tar-a, t'a zɩɩm yit hal yʋʋm piig la a yiibu. Yẽnda rɩka a sẽn dag n tarã fãa n kõ tɩpdba, la b baa a yembr ka tõog t'a paam laafɩ ye.

⁴⁴ Yẽnda kolga a Zeezi poorẽ, n sɩɩs bãmb fuugã noore. La wakat-kãng bala, zɩɩmã sẽn dag n yitã yõkame.

⁴⁵ La a Zeezi sokame: «Yaa ãndã n sɩɩs maamã?» Ned fãa sẽn kɩɩsd tɩ ka yẽnda wã, a Pɩyɛɛr yeelame: «Karen-saamba, neb kʋʋngã gũbga yãmb n dɩdgd yãmba. »

⁴⁶ La a Zeezi leokame n yeele: «Ned n sɩɩs maam. Bala, mam bãngame tɩ pãng n yi mam nengẽ.»

⁴⁷ Pagã sẽn yã t'a yellã pukame, a waa n yĩgimda a Zeezi taoor ne rigbu, nebã fãa nifẽ, n togs bũmb ning yĩng sẽn kɩt tɩ yẽnda sɩɩs a Zeezi wã, la yẽnda sẽn paam laafɩ zĩig pʋgẽ to-to.

⁴⁸ A Zeezi yeel-a lame: «M bi-pugla, fo tẽeb n fãag foom, kẽng ne bãane.»

A Zayiruus bi-pugl vʋʋgre

⁴⁹ A Zeezi sẽn ket n gomdã, ned n yi karen-doog naabã yir n wa n yeel-a: «Da leb n nams-y karen-saamb ye: Yãmb bi-puglã kiime.»

⁵⁰ La a Zeezi sẽn wʋme, b yeela karen-doog naabã yaa: «Da maan dabeem ye. Tẽ bala, la biigã na n põsame.»

⁵¹ La a Zeezi sẽn ta yirã, bãmb ka sak tɩ ned tũ bãmb n kẽ, sã n ka a Pɩyɛɛr ne a Zã, la a Zak ne biigã ba la a ma bala.

⁵² Nebã fãa rag n yãbdame n wiisd biigã yĩnga. Dẽ, a Zeezi yeel-b lame «Ra yãb‑y tɩ biigã ka ki ye, a gõeeme.»

⁵³ Nebã sẽn dag n mi tɩ biigã kiime wã, b yaala a Zeezi.

⁵⁴ La a Zeezi gãda biigã nugu, n zẽk b koɛɛg n yeele: «M biiga, yiki.»

⁵⁵ La a sɩɩgã lebg n waame, la wakat-kãng bala, a yikame. La a Zeezi yeelame tɩ b kõ biiga rɩɩb t'a rɩ.

⁵⁶ Bi-puglã ba-rãmb yɛɛsame, la a Zeezi keooga bãmb tɩ b ra togs ned bũmb ning sẽn maanã ye.