A Luk Sõng 7 - WẼNNAAM SEBRE 2014

Sodaas koabg naab tʋmtʋmd yĩns maagre

¹ A Zeezi sẽn gom gom-kãense ne neb nins sẽn dag n kelgd bãmbã n sɛ, b kẽnga Kapɛrnaom.

² Sodaas koabg naab a ye n dag n tar a tʋmtʋmd‑nongr sẽn gãe ne bãag n kolg kũum.

³ Yẽnda sẽn wʋm tɩ b gomd a Zeezi yelle, a tʋma Zʋɩf-rãmbã kãsem-dãmb bãmb nengẽ tɩ b tɩ kos-b tɩ b wa n fãag a tʋmtʋmdã.

⁴ Bãmb sẽn ta a Zeezi nengẽ, b bõosa bãmb ne pẽdgr n yeele: «Rao-kãngã zemsame tɩ y maan a sẽn kotã n kõ-a.

⁵ Bala, yẽnda nonga tõnd buudã, la yaa yẽnda n me tõnd karen-doogã.»

⁶ Dẽ, a Zeezi dag n tũuda bãmb n dabda, la b sẽn kolg yirã, sodaas koabg naabã tʋma a zo-rãmb tɩ b tɩ yeel a Zeezi yaa: «Zu-soaba, da nams-y y meng a woto ye. Bala, mam ka zems tɩ yãmb kẽ mam zakẽ ye.

⁷ Yaa woto yĩng me n kɩt tɩ mam ka tags tɩ mam zemsame tɩ wa yãmb nengẽ m toorã. Yãmb ye n gom bala, la mam tʋmtʋmdã na n paama laafɩ.

⁸ Bala, neb sẽn yɩɩd maam n so maam, tɩ mam me so sodaase. Mam sã n yeel a yembr t'a kẽnge, a kẽngdame, la m sã n yeel a to t'a wa, a watame. Mam sã n yeel m tʋmtʋmd t'a maan woto, a maandame.»

⁹ Dẽ, a Zeezi sẽn wʋm gom-kãensã wã, a yɛɛsa bãmba. La b wẽnemdame n yeel neb kʋʋngã sẽn da pʋgd bãmbã yaa: «Mam yeta yãmb tɩ hal baa Israyɛll pʋgẽ, mam nan ka yã tẽ-kãseng a woto ye.»

¹⁰ La b sẽn tʋm-b rãmbã sẽn lebg n ta yiri, b mikame tɩ tʋmtʋmda paama laafɩ.

A Zeezi vʋʋga pʋg‑kõor biiga

¹¹ Dẽ poore, a Zeezi kẽnga tẽng a yembr sẽn boond tɩ Nayin. Bãmb karen-biisã ne neb wʋsg dag n tũuda bãmba.

¹² A Zeezi sẽn wa n kolg tẽngã noore, mikame tɩ neb n dag n tʋk kũum n dabd mumbu. Yẽnda dag n yaa pag a yembr sẽn yaa pʋg‑kõor bi-ribl yende. La tẽngã neb wʋsg rag n yãagda pagã.

¹³ Zu-soabã yãnda pagã, t'a nimbãaneg yõk-b tɩ b yeel-a yaa: «Ra yãb ye!»

¹⁴ A Zeezi kolgame n tik pãndarã, la neb nins sẽn dag n tʋk-a wã yalsame. A Zeezi yeelame yaa: «Bi-bɩɩga, mam yeta foom tɩ f yiki.»

¹⁵ La sẽn ki-a wã yikame n zĩnd n sɩng n gomda, t'a Zeezi lebs-a a ma.

¹⁶ Nebã fãa yɛɛsame n pẽgd Wẽnnaam n yetẽ: «Wẽnnaam no-rɛɛs kãseng puka tõnd sʋka, la Wẽnnaam waa n gesa b nebã.»

¹⁷ Nebã sẽn gom a Zeezi yell woto wã, saaga Zʋʋde soolmã fãa ne a tẽn-kɩremsã.

A Zãmbatiis tʋma neb a Zeezi nengẽ

¹⁸ A Zã karen-biisã togsa yẽnda bõn-kãens fãa.

¹⁹ A Zã boola a karen-biis a yiib n tʋm-b tɩ b tɩ sok Zu-soabã n gese, yaa bãmb la sẽn tog n wa-a wã bɩ, bɩ bãmb tog n gũu ned a to?

²⁰ Raopã sẽn ta a Zeezi nengẽ, b yeelame yaa: «A Zãmbatiis tʋma tõnd yãmb nengẽ tɩ d wa sok n gese, yaa yãmb la sẽn tog n wa-a wã bɩ, bɩ tõnd tog n gũu ned a to?»

²¹ Wakat-kãng bala, a Zeezi maaga bãad-dãmb wʋsgo, koms-rãmba, la sɩ-wẽns sẽn tar-b rãmba, la b pugs zoens wʋsg nini.

²² La a Zeezi leok-b lame n yeele: Kẽng-y n tɩ togs-y-yã a Zã bũmb nins yãmb sẽn yã la y wʋmã: «Zoens nin pugsdame, põe kẽndame, wãoob paamda maagre, wʋms wʋmdame, kũum vʋʋgdame, koe-noogã moonda naong rãmb sʋka.

²³ La bark bee ned ning mam sẽn kõn yɩ kug-lakdg a yĩngã zugu.»

²⁴ A Zã sẽn tʋm-b rãmbã sẽn looge, a Zeezi sɩngame n gom ne neb kʋʋngã a Zã yell n yeele: Yãmb kẽng n tɩ gesa bõe we-rasempʋɩɩgẽ wã? Tãnwĩig sobg sẽn miimda?

²⁵ La bõe la yãmb sẽn kẽng n tɩ gesã? Rao sẽn yer waoogr futu? Ad neb nins sẽn yer fu-bʋgsã, la b vɩ bõn neeb sʋkã bee rĩm-dãmb zagsẽ.

²⁶ La bõe la yãmb sẽn kẽng n tɩ gesã? Wẽnnaam no-rɛɛsa? Mam yeta yãmb tɩ n-yẽe, la a pʋs n yɩɩda Wẽnnaam no-rɛɛsa.

²⁷ Yaa yẽnda yell la b sẽn gʋls n yeel tɩ: «Gese, mam tʋmda m koe-toagsd t'a reng fo taoor n segl f waoongã.»

²⁸ Mam yeta yãmb tɩ pagb sẽn dog b rãmbã sʋka, baa a yembr ka be sẽn yaa-a kãseng n yɩɩd a Zã ye. La baoosgo, sẽn yaa-a yao-zʋʋg Wẽnnaam soolmẽ wã yaa kãseng n yɩɩd a Zã.

²⁹ Nebã fãa ne yaood dɛɛgdbã sẽn wʋm a Zã goamã, b reega a Zã lisgã, n wilg tɩ Wẽnnaam yaa tɩrga.

³⁰ La Fariizẽ-dãmbã ne tõog karen-saam-dãmbã sẽn zãgs t'a Zã kõn lis bãmbã, b tõdga bũmb ning Wẽnnaam sẽn dag n seglg bãmb yĩngã.

³¹ Dẽ, a Zeezi kẽnga taoor n yeele: «Mam na n mamsa zamaan‑kãngã neb ne bõe? La b wẽnda ãnda?

³² Bãmb wẽnda kamb sẽn zĩ raagẽ n boond taab n yetẽ yaa: ‹Tõnd peeba wɩɩg yãmb yĩnga, la yãmb ka sao ye. Tõnd yɩɩla kʋʋr yɩɩla, la yãmb ka yãb ye.›

³³ Bala, a Zãmbatiis waame n ka wãbd buri, la a ka yũud reezẽ rãam ye, tɩ yãmb yetẽ tɩ zĩn n tar-a.

³⁴ Ninsaal bi-riblã sẽn wa wã, b rɩtame la b yũuda, tɩ yãmb yetẽ tɩ rao-kãngã yaa yão-be-neda, la rã-yũuda, la yaood dɛɛgdbã ne yel-wẽn maandbã zoa.

³⁵ La Wẽnnaam kambã sẽn deegd Wẽnnaam yamã kɩta kaset t'a yaa yam.»

A Zeezi bee Fariizẽ a Sɩmo yiri

³⁶ Fariizẽ a yembr bõosa a Zeezi tɩ b wa n dɩ ne yẽnda. A Zeezi kẽe Fariizẽ wã yir n zĩnd n na dɩ.

³⁷ La gese, pag a ye n dag n be tẽngã pʋgẽ n yaa yel-wẽn maanda. Yẽnda bãngame t'a Zeezi zĩi Fariizẽ wã zakẽ n dɩtẽ. Yẽnda talla albatr tʋk sẽn pid ne tɩdare,

³⁸ n wa n yals a Zeezi poorẽ, b naoã sɛɛgẽ. A dag n yãbdame, n sɩng n madgd a Zeezi naoã ne a nintãmã, la a rag n yẽesd-b ne a zoobdã, n mogsd bãmb naoã la a zãgsd-b ne tɩdarã.

³⁹ Fariizẽ ning sẽn bool a Zeezi wã sẽn yã woto, a tagsa a sũurẽ n yeele: «Rao-kãngã sã n dag n yaẽ Wẽnnaam no-rɛɛsa, b rag n na bãngẽ pag ning sẽn sɩɩsd bãmbã sẽn yaa ned ninga, la a sẽn yaa bũmb ninga: yel-wẽn maand bala.»

⁴⁰ A Zeezi goma ne a Sɩmo n yeel-a yaa: «Sɩmo, mam dat n togsa foom bũmbu.» T'a leoke: «Karen-saamba, togs-y-yã.»

⁴¹ A Zeezi yeela yẽnda yaa: «Ned a ye n dag n be tɩ neb a yiib tar yẽnda samde. A yembrã rag n tara deniye kobs-nu samde, t'a to wã tar pis-nu.

⁴² La bãmb sẽn dag n ka tar n na yao wã yĩnga, yẽnda basa b yiibã fãa samã taale. Bãmb b yiibã sʋka, bʋg n na n nong yẽnda n yɩɩda?»

⁴³ A Sɩmo leokame: «Mam tagsdame tɩ yaa ned ning sẽn dag n tara sam-kẽeng tɩ b bas-a taalã.» A Zeezi yeela yẽnda: «Fo togsa sɩda.»

⁴⁴ Dẽ, a Zeezi wẽnemda paga sẽnẽ n yeel a Sɩmo yaa: «Fo nee pʋg-kãngã? Mam kẽe fo zakẽ, la fo ka kõ maam koom tɩ m waas m nao ye. La yẽnda, a madga mam nao ne a nintãm, n yẽes-b ne a zoobdo.

⁴⁵ Fo ka mok maam ye, la hal mam sẽn kẽ wã tɛka, yẽnda mogsda mam nao n ka basdẽ ye.

⁴⁶ Fo ka sõog mam zug kaam ye, la yẽnda, a waala mam nao ne tɩdare.

⁴⁷ Yaa woto yĩnga, mam yeta foom tɩ yẽnda paama a yel-wẽnã sẽn yaa wʋsgã sugri. Bala, yẽnda wilga a nonglem kãsenga. La ned ning b sẽn kõt sugr bũmb bilf yĩng nonglem yaa bilfu.»

⁴⁸ La a Zeezi yeela pagã yaa: «Fo paama f yel-wẽnã sugri.»

⁴⁹ Neb nins sẽn dag n zĩ ne bãmb n dɩtẽ wã sɩngame n tags b sũyẽ wã a woto: «Dao-kãngã yaa ãndã n kõt baa yel-wẽnã sugri?»

⁵⁰ La a Zeezi yeela pagã yaa: «Fo tẽeb n fãag foom. Kẽng ne bãane.