A Luk Sõng 3 - WẼNNAAM SEBRE 2014

A Zãmbatiis koe-moonego

¹ Rĩm a Sezaar Tɩbɛɛr sẽn deeg naam tɩ yʋʋm piig la nuunẽ, t'a Pilat dag n yaa Zʋʋde soolem Gʋvɛrneere, t'a Erood yaa Galɩle rĩmã, t'a biig a Filip ya Yitʋʋre ne Tarkonit soolem dĩmã, t'a Lizanyaas yaa Abilɛn soolem dĩma,

² t'a Ãnd ne a Kayiif yaa maan-kʋʋdbã kãsem-dãmba, Wẽnnaam goma ne a Zakari biig a Zã weoogẽ wã.

³ La a Zã saaga tẽms nins fãa sẽn pẽ Zʋrdẽ wã, n moondẽ n yet nebã tɩ b tek yam n deeg lisgu, n paam b yel-wẽnã sugri.

⁴ Yɩɩ wa sẽn gʋls Wẽnnaam no-rɛɛs a Ezayi sebrã pʋgẽ wã: Yaa ned ning koɛɛg sẽn kelemd we-rasempʋɩɩgẽ wã, n yetẽ tɩ: «Maneg-y Zu-soabã sore! Rems-y bãmb so-bugsã tɩ yɩ tɩrse!

⁵ Londã fãa na n pidsame! Tãmsã ne kunkubã fãa na n sarmame! So-golemsã na n lebga tɩrse, la b na n kõo so-rʋdã!

⁶ La ninsaal buud fãa na n yãa fãagr ning Wẽnnaam sẽn kõtã.»

⁷ Dẽ, a Zã rag n yeta neb kʋʋngã sẽn wat yẽnda nengẽ t'a lis-bã yaa: Wag-toos buudu, ãndã n wilg yãmb tɩ y zoe sũ-puugr sẽn watã?

⁸ Woto yĩnga, bɩ y wom biis sẽn zemsd ne neb sẽn tek yam n kos sugri, la y da tags y sũyã pʋs t'a Abrahaam sẽn yaa yãmb yaabã sekame ye. Bala, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abrahaam yagense.

⁹ Larã zoe n bee tɩɩsã yẽgẽ moasã. Dẽ, b na n keega tɩɩg ning fãa sẽn ka womd bi-sõama, n lob bugmẽ.

¹⁰ Neb kʋʋngã soka a Zã yaa: Woto wã, bõe la tõnd tog n maane?

¹¹ A Zã leok-b lame n yeele: Bɩ ned ning sẽn tar fu-yerdɩ a yiib yãk a ye n kõ sẽn ka tar-a, la ned ning sẽn tar n dɩtẽ me maan a woto.

¹² Yaood dɛɛgdbã me waame n dat t'a lis-ba. B soka a Zã yaa: Karen-saamba, tõnd tog n maana bõe?

¹³ Yẽnda leok-b lame n yeele: Da reeg-y yaood n yɩɩd b sẽn kõ yãmb noor tɩ y reegã baa bilfu.

¹⁴ Sodaas me soka a Zã tɩ la bãmb yẽ tog n maana bõe? Yẽnda leoka bãmb n yeele: Da maan-y ned pãng ye, la y da rõd neb zaalem ye, la y maan sũ-noog ne y yaoodã.

¹⁵ Nebã da yas n gũudame, la b fãa da sokda b mens n dat n bãng sãnde ka a Zã la Kirisã.

¹⁶ A Zã leoka bãmb fãa n yeele: Mam lisda yãmb koomẽ. La ned a ye n wata, n tar pãng n yɩɩd maam. Mam pʋs n pa zems tɩ lood bãmb neooda sẽbds ye. Bãmb na n lisa yãmb ne Sɩɩg-sõngo, la ne bugum.

¹⁷ Bãmb zãada b kaorgo. Bãmb na n pɩɩsa b zɛɛga, n wʋk ki wã n sui b baoorẽ. La b na n yõoga wudgã ne bugum sẽn ka kiida.

¹⁸ A Zã sagla nebã ne sagls a taab wʋsgo, n moon bãmb koe-noogã.

¹⁹ La a Zã sẽn wilg Erood sẽn yaa Gʋvɛrneerã t'a sẽn maan ne a ba-biig a Filip pag a Eroodyaadã, ne tʋʋm wẽnsã fãa a sẽn maanã ka zemse,

²⁰ A Erood leb n maana tʋʋm wẽng a to n paase, n yõk a Zã n sui bi-bees roogo.

A Zeezi koom lisgu

²¹ Nebã fãa sẽn paam koom lisgu, a Zeezi me paama lisgu. La bãmb sẽn pʋʋsd wakate, yĩngr pakame,

²² la Sɩɩg-sõng rɩka manwall wẽneg n sig bãmb zugu. Koɛɛg zĩnda saasẽ n yeele: Fo yaa mam bi-ribl-nongr sẽn ta mam yam zãnga.

A Zeezi roogo

²³ A Zeezi sẽn wa n na n sɩng b tʋʋmdã, rẽ tɩ b rag n tara yʋʋm pis-tã sẽnẽ. Bãmb da yaa a Zozɛf biig wa nebã sẽn dag n tagsdã. A Zozɛf rag n yaa a Heli biiga,

²⁴ sẽn yaa a Matat biiga, sẽn yaa a Leevi biiga, sẽn yaa a Melki biiga, sẽn yaa a Yanayi biiga, sẽn yaa a Zozɛf biiga,

²⁵ sẽn yaa a Matatyaas biiga, sẽn yaa a Amoos biiga, sẽn yaa a Nahum biiga, sẽn yaa a Esli biiga, sẽn yaa a Nagayi biiga,

²⁶ sẽn yaa a Maat biiga, sẽn yaa a Matatyaas biiga, sẽn yaa a Semeyin biiga, sẽn yaa a Yosɛk biiga, sẽn yaa a Zoda biiga,

²⁷ sẽn yaa a Zoaana biiga, sẽn yaa a Reeza biiga, sẽn yaa a Zorobabɛll biiga, sẽn yaa a Salatiyɛll biiga, sẽn yaa a Neeri biiga,

²⁸ sẽn yaa a Melki biiga, sẽn yaa a Adi biiga, sẽn yaa a Kozam biiga, sẽn yaa a Elmadam biiga, sẽn yaa a Ɛɛr biiga,

²⁹ sẽn yaa a Zeezi biiga, sẽn yaa a Eliyezɛɛr biiga, sẽn yaa a Zorim biiga, sẽn yaa a Matat biiga, sẽn yaa a Leevi biiga,

³⁰ sẽn yaa a Sɩmyõ biiga, sẽn yaa a Zʋʋda biiga, sẽn yaa a Zozɛf biiga, sẽn yaa a Zonam biiga, sẽn yaa a Eliyakim biiga,

³¹ sẽn yaa a Meleya biiga, sẽn yaa a Mena biiga, sẽn yaa a Matata biiga, sẽn yaa a Natam biiga, sẽn yaa a Davɩɩd biiga,

³² sẽn yaa a Ezayi biiga, sẽn yaa a Zobɛɛd biiga, sẽn yaa a Booz biiga, sẽn yaa a Sala biiga, sẽn yaa a Nasõ biiga,

³³ sẽn yaa a Aminadaab biiga, sẽn yaa a Admin biiga, sẽn yaa a Arni biiga, sẽn yaa a Ɛsrom biiga, sẽn yaa a Farɛɛs biiga, sẽn yaa a Zʋʋda biiga,

³⁴ sẽn yaa a Zakoob biiga, sẽn yaa a Izak biiga, sẽn yaa a Abrahaam biiga, sẽn yaa a Taara biiga, sẽn yaa a Nakoor biiga,

³⁵ sẽn yaa a Seruk biiga, sẽn yaa a Reyu biiga, sẽn yaa a Falɛk biiga, sẽn yaa a Ebɛɛr biiga, sẽn yaa a Sala biiga,

³⁶ sẽn yaa a Kayinam biiga, sẽn yaa a Arfaksaad biiga, sẽn yaa a Sɛm biiga, sẽn yaa a Nowe biiga, sẽn yaa a Lemek biiga,

³⁷ sẽn yaa a Matusala biiga, sẽn yaa a Henok biiga, sẽn yaa a Zarɛɛd biiga, sẽn yaa a Maleleyɛll biiga, sẽn yaa a Kayinam biiga,

³⁸ sẽn yaa a Enoos biiga, sẽn yaa a Sɛt biiga, sẽn yaa a Ãdem biiga, sẽn yaa Wẽnnaam biigã.