A Luk Sõng 21 - WẼNNAAM SEBRE 2014

Pʋg‑kõor kõo kũuni

¹ A Zeezi zẽka b neng n ges arzegsã rãmb sẽn da ningd b kũunã ligdã ningr zĩigẽ.

² Bãmb yãnda pʋg‑kõor a yembr me sẽn yaa naong soab t'a ningd tãma a yiib beenẽ.

³ La a Zeezi yeelame yaa: Mam yeta yãmb sɩd-sɩd tɩ pʋg‑kõ-kãngã sẽn yaa naong soabã ningame n yɩɩd neb a taabã fãa.

⁴ Bala, nin-kãensã ned kam fãa tʋm n yãka a paoong a sẽn tar tɩ loogã pʋgẽ n ning ligdã ningr zĩigẽ, la pʋg‑kõorã ninga a sẽn tarã fãa, hal baa a rɩɩbã ligd zãnga.

Wẽnnaam doog sãoongo

⁵ La neb kẽer sẽn dag n gomd wẽnd doogã yell n wilgd tɩ b nags-a-la ne kug-neebã, la teedã neb sẽn tall n wa n kõ Wẽnnaamã, a Zeezi yeelame yaa:

⁶ Day n wate, tɩ bũmb ningã yãmb sẽn ne wã, kugr baa a yembr kõn pa a to zug b sẽn kõn leeb n lub ye.

Bãn sẽn wilgd dũni saabo

⁷ Bãmb soka a Zeezi yaa: Karen-saamba, dẽ, bõn-kãens na n waa dabʋre, la bõe bãnd n na n wilg bõn-kãens waoongo?

⁸ A Zeezi leokame yaa: Gũus-y tɩ ned ra belg yãmb n tõog ye. Bala, neb wʋsg n na n dɩk mam yʋʋr n wa n yeel tɩ bãmb la Kirisi, la tɩ wakat kolgame. Da tũ-y-b ye.

⁹ La yãmb sã n wa wʋm tɩ b gomd zabre, la tẽn-dãmbg yelle, bɩ y ra zoe rabeem ye. Bala, bõn-kãens tog n deng n waame, la ka dũniyã saab nand ye.

¹⁰ Dẽ, a Zeezi yeel-b lame: Tẽng a yembr na n yika zabr ne tẽng a to, la rĩung a yembr na n yika ne rĩung a to.

¹¹ Tẽn-digimdg kãsems na n zĩndame, la bã-longds ne kom na n zĩnda zĩig-zĩiga, la yel-kãsems sẽn kẽesd rabeem ne bõn-bãn sẽn yit yĩngr na n zĩndame.

¹² La sẽn deng bõn-kãens fãa, b na n yõga yãmba, n nams-yã. B na n yõga yãmb n tall n kẽng karen-dotẽ, b na n kẽesa yãmb bi-bees roto, b na n tall-y lame n kẽng rĩm-dãmb ne Gʋvɛrneer dãmb taoor mam yʋʋrã yĩnga.

¹³ Na n tũu ne rẽnda tɩ yãmb kɩs bãmb mam kaseto.

¹⁴ Dẽ wã, ning-y y yamẽ, n da reng n tags y sẽn na n tɩ gom bũmb ning n fãag y meng ye.

¹⁵ Bala, mam na n ninga goam y noorẽ, la m kõ-y yam, la yãmb bɛɛbã fãa baa a yembr kõn tõog n kɩɩs wall b wẽ nokoeemd ye.

¹⁶ Baa yãmb ba-rãmba, la y ba-biisi, la y roagdba, la y zo-rãmb mens na n yõga yãmb n kɩse, la b na n kʋʋ yãmb neb kẽere.

¹⁷ Nebã fãa na n kisga yãmb mam yʋʋrã yĩnga.

¹⁸ La yãmb zug zoobg baa a yembr kõn menem ye.

¹⁹ Yãmb sã n yals kãenkãe, y na n fãaga y mense.

²⁰ Dẽ, yãmb sã n wa n yãnd sodaas sẽn gũbg Zeruzalɛm, bɩ y bãng t'a sãoongã kolgame.

²¹ Dẽ, bɩ neb nins sẽn na n be Zʋʋde wã zoe n dʋ tãmse, tɩ neb nins sẽn be Zeruzalɛm tẽngã pʋgẽ wã zoe n yi, la tɩ neb nins sẽn na n be-b wetẽ da kẽ tẽngã pʋgẽ ye.

²² Bala, ra-kãens na n yɩɩ sũ-dokr rayã, tɩ bũmb nins fãa b sẽn gʋlsã na paam pidsgu.

²³ Pagb nins sẽn tʋtã, la sẽn yẽsemd kamb ra-kãens daarã na n paama toogo. Bala, to-kãseng n na n zĩnd soolmã pʋgẽ, la Wẽnnaam sũ-puugr na n lʋɩɩ nin-kãens zutu.

²⁴ Zabr sʋʋg n na n kʋ bãmba, la b na n yõga bãmb n maan yembse, n tall n kẽng buudã fãa sʋka. La bu-zẽms na n sooga Zeruzalɛm ne pãng hal tɩ b wakatã pidi.

Ninsaal Bi-riblã waoongo

²⁵ Bãn na n zĩnda wĩndgẽ, la kiuugẽ, la ãdsẽ, la tẽngã zugu, ko-kãsengã bʋrgã, la a ko-pɛmã na n yɛɛsa buud toay-toayã tɩ b ka mi b sẽn na n maan bũmb ning ye.

²⁶ Rabeem na n kʋʋ ninsaalba, bãmb sẽn gũud bũmb ning sẽn na n wa dũni zugã yĩngã. Bala, yĩngr pãens na n digimdame.

²⁷ Dẽ, b na n yãnda Ninsaal Bi-riblã sẽn zao sawadg n wat ne pãnga, la ne ziiri.

²⁸ La bõn-kãens sã n sɩng n watẽ, bɩ y roog la y nak n gese, bala, yãmb fãagrã kolgame.

²⁹ La a Zeezi wẽe bãmb yel-bũnd n yeele: «Ges-y kankanga, la tɩɩsã fãa.

³⁰ Yãmb sã n yãnd b sẽn tobdã, yãmb mens miime tɩ sigr zoe n kolgame.

³¹ Woto me, yãmb me sã n wa n yãnd tɩ bõn‑kãensã maandame, bɩ y bãng tɩ Wẽnnaam soolmã kolgame.

³² Sɩd-sɩdã, mam yeta yãmb tɩ neb nins sẽn vɩ moasã wã fãa kõn ki tɩ bõn-kãensã ka pids ye.

³³ Yĩngr la tẽng na looge, la mam goamã kõn tol n loog ye.

³⁴ Gũus-y y mens tɩ rɩ-n-tɩk wall rã-tɩgre, la vɩɩmã yɛl yɩɩr da wa n zɩsg yãmb sũyã ye, la tɩ ra-kãng ra wa n ling yãmb

³⁵ wa zĩm-gãmbre, bala, ra-kãng na n waa n linga neb nins fãa sẽn be tẽn-gãongã fãa zugã.

³⁶ Dẽ yĩnga, bɩ y neend la y pʋʋs wakat fãa, tɩ yãmb tõe n paam pãng n põs bũmb nins fãa sẽn tog n wa wã, la y tõog n yals Ninsaal Bi-riblã taoore.»

³⁷ A Zeezi rag n zãmsda nebã wẽnd doogẽ wã wĩndga, la yʋngo, bãmb kẽnd n gãee tãng ning b sẽn boond tɩ oliiv tɩɩs tãngã zugu.

³⁸ La nebã fãa kẽngda bãmb nengẽ wẽnd doogẽ wã, sẽn sɩng ne yibeoogo, n na n tɩ kelg bãmba.