A Ezayi 7 - WẼNNAAM SEBRE 2014

Koɛɛg rĩm a Akaaz yĩnga

¹ Zʋʋda rĩm a Akaaz sẽn yaa a Zotam biiga, n yaa a Oozɩyaas yagengã wakatẽ, Siiri rĩm a Retsin ne Israyɛll dĩm a Peka sẽn yaa a Remaliya biigã kẽng n na n tɩ zaba ne Zeruzalɛm, la b ka tõog n zab ne-a ye.

² B togsa a Davɩɩd doogã neb n yeel yaa: «Siiri tãb-biisã kẽng n tɩ yãmba Efrayiim tẽngã.» Dẽ, a Akaaz ne a nebã sũy sɩnga rigb wa sobg sẽn miimd tʋgr tɩɩse.

³ Sẽn-Ka-Saab yeela a Ezayi yaa: «Mam kot-f lame tɩ foom ne f biig a Seyaar-Yasuub yi n seg a Akaaz ko-bao-kãsengã ko-sor noore, ga-loasdã pʋʋgã sor zugu.

⁴ Yeel-a yaa: ‹Gãneg f yam, da zoe rabeem ye. Ra bas tɩ f sũur kiuus nin-bãmbã b yiibã sẽn yaa ra-giis sẽn nukd bug-zõosã yĩng ye. Ra bas tɩ f sũur kiuus Siiri rĩm a Retsin ne a Remaliya biigã sũ-puugrã yĩng ye!

⁵ Bala, Siiri ne Efrayiim la a Remaliya biigã saagd n dat n maana foom wẽnga.› » Bãmb yetame:

⁶ «Wa-y tɩ d kẽng n tɩ zab ne Zʋʋda nebã, d na n kẽesa tẽngã rabeem, tõnd na n pãb-a lame n wã, n modg-a t'a sak-do, la d yãk a Tabeyɛll biigã n kɩt t'a yɩ rĩm n soog Zʋʋda.»

⁷ Ade, Zu-soab a Sẽn-Ka-Saab yetame: «Bõn-kãng kõn tõog ye, rẽndã ka tõe n yɩ ye.

⁸ Bala, Siiri na-tẽng yaa Damaase, la a Retsin yaa Damaas tẽngã zug-soaba. A keta yʋʋm pis-yoob la a nu, tɩ Efrayiim sẽn sãamã ka leb n yɩ soolem ye.

⁹ Efrayiim na-tẽng yaa Samaari, la a Remaliya biigã n yaa Samaari tẽngã zug-soaba. Yãmb sã n ka tall tẽebo, yãmb ka na n tõog n yals ye!»

Emanuwɛlle, Wẽnd-be-ne-dã waoongo

¹⁰ Sẽn-Ka-Saab leb n yeel a Akaaz yaa:

¹¹ «Kos Sẽn-Ka-Saab sẽn yaa fo Wẽnnaamã bãnde. Ba a sã n yaa kɩɩm-kulg zĩ-zulumsẽ wã, wall a sã n yaa hal yĩngr zĩ-zãrsẽ.»

¹² A Akaaz leokame: «Mam ka na n kos bũmb ye, mam ka na n mak Sẽn-Ka-Saab n ges ye.»

¹³ Dẽ, a Ezayi yeelame: «Dĩm a Davɩɩd yagense, m kotame tɩ y kelge! Yãmb sẽn maan tɩ ninsaalbã yam yi yãmbã ka sek-y tɩ y rat n maan tɩ mam Wẽnnaamã me yam yi-yã?

¹⁴ Rẽ kɩtame tɩ Zu-soabã meng na n kõ yãmb bãnde. Ade, pa-kuil na n dɩka pʋga, n dog bi-ribla, n pʋd a yʋʋr t'a Emanuwɛlle, sẽn dat n togs tɩ ‹Wẽnd-be-ne-do.›

¹⁵ Yẽnda na n yũuda bĩis-gõeem la a rɩt sɩɩd hal n wa n bãng tɩ zãgs wẽng n maan neere.

¹⁶ La sẽn deng biigã sẽn na n bãng tɩ zãgs wẽng n maan neere, nebã na n zoe n basa rĩm-dãmb a yiib nins sẽn kẽesd yãmb dabeem-kãsengã tẽng t'a lebg vɩʋʋgo.

¹⁷ Sẽn-Ka-Saab na n kɩtame tɩ foom ne f nebã, la f ba wã roog neb yãnd ray buud sẽn nan zɩ n zĩndi, hal sẽn sɩng daar ning Efrayiim sẽn welg ne Zʋʋda wã. Yaa Asiiri rĩmã n na n wa ne yel-kãnga.

¹⁸ Badaare, Sẽn-Ka-Saab na n fɩɩl n boola zõos nins sẽn be Ezɩpt tẽngã Nill kʋɩlgã ko-soayã sẽn be kɩremsã, la sĩ wã sẽn be Asiiri soolmẽ wã.

¹⁹ Bãmb fãa na n wa siga tãn-londã sẽn be tãn-lug-lugã sʋkã, la pĩisã sẽgsẽ, la tuudã ne yam-maasã fãa zutu.

²⁰ Badaare, Zu-soabã na n talla barg b sẽn tɩ peng Efrat kʋɩlgã rʋʋnde, yaa Asiiri rĩmã yell la b sẽn gomdã, n kõog yãmb zugã, ne y kar-kõbdã la b kõog y toɛɛngã.

²¹ Badaare, ned kam fãa na n gʋʋla nag-sãdg a yembr ne rũm-bãooneg a yiibu.

²² La bĩisim sẽn na n yɩ wʋsgã yĩnga, b na n dɩɩ bĩis-gõeem. Neb nins fãa sẽn na n pa tẽngẽ wã na n dɩɩ bĩis-gõeem ne sɩɩdo.

²³ Badaare, zĩis nins fãa sẽn dag n tar reezẽ tɩɩs tusr sẽn zem wanzuri ligd tusrã na n lebga gõos la gõpayãndse.

²⁴ Nebã na n kẽnga beenẽ ne tãp la pɛɛm n tɩ tãoose, bala, tẽngã na n lebga gõos la gõpayãndse.

²⁵ La b sẽn dag n kood kunkub nins fãa sigdsẽ ne wãgsã, fo ka na n leb n saag n kẽng beenẽ, fo sẽn zoet gõosã ne gõpayãndsã yĩnga. B na n basda niig tɩ b kẽnd n wãbd beenẽ, beenẽ lebga piis ne bʋʋs gõob zĩiga.»