A Ezayi 65 - WẼNNAAM SEBRE 2014

Sẽn-Ka-Saab na n kaoo bʋʋdo

¹ Mam basame tɩ sẽn dag n ka kot-b maam bũmbã bao maam, mam basame tɩ sẽn dag n ka baood-b maamã yãnd maam. Mam yeela buud ning sẽn dag n ka pʋʋsd ne mam yʋʋrã yaa: «Mam bee ka, mam bee kaanẽ!

² Mam tuda buud ning sẽn nak a kãarã m nus n ka bas ye, yaa buud sẽn tũud so-wẽng n maand wa a sẽn date.

³ Mam tuda buud ning sẽn yals mam taoor n kɩɩsd maamã wakat fãa wã m nusi. Bu-kãng maanda maand zẽed zĩisẽ, la a yõogd wisd n kõt wẽn-naandse.

⁴ Bãmb zĩis yaa yaadẽ, la yʋngo, b gõee tãms bogdẽ, b yaa neb sẽn wãbd kurkuy nemdo, la bãmb lagdã pʋse, bõn-dẽgd n be beenẽ.»

⁵ Bãmb yetame: «Zãag f menga, ra kolg maam ye. Bala, mam na n welga foom toore.» Bõn-kãens wẽnda bug-zõos sẽn yit mam yõ-rotẽ wã, wa bugum sẽn dɩt daar fãa n ka sɛtẽ ye.

⁶ Ade, bõn-kãng gʋlsa mam taoor n yeele: «Mam ka na n sĩnd ye, sɩd-sɩdã, mam na n yaoo bãmba, m na n yaoo bãmb tɩ seke.»

⁷ Sẽn-Ka-Saab yetame: «Mam na n lagma yãmb kongrã la ne y ba-rãmbã kongr n yao bãmba. B ba-rãmbã rag n yõoga wisd tãmsã zutu, la b paoog maam kunkubã zutu. Mam na n yaoo bãmb sẽn maan tɩ loogã, mam na n yaoo bãmb mens b tʋʋmã yĩnga.»

⁸ Sẽn-Ka-Saab yetame: «Reezẽ gĩnd sã n tar koom, b yetame tɩ b ra sãam-a tɩ bark n be a pʋgẽ! Mam na n maana a woto m tʋmtʋmdbã yĩnga, sẽn na yɩl n da sãam zãng ye.

⁹ Mam na n kɩtame tɩ yagens yi a Zakoob pʋgẽ, la m kɩt tɩ yagens yi a Zʋʋda sẽn yaa mam tãmsã soaalã pʋgẽ. Mam sẽn yãk neb ninsã na n deega rẽndã n sooge, la mam tʋmtʋmdbã na n zĩnda beenẽ.

¹⁰ Saaron tẽn-nabdrã na n lebga rũm-bãooneg wãbneg zĩiga, la Akoor longã na n lebga rũm-bɛd gãag zĩiga, yaa mam neb nins sẽn lebg n baood maamã yĩnga.»

¹¹ La yãmb dãmb sẽn basd Sẽn-Ka-Saabã, la y yĩmd mam tãn-sõngã yellã, n kõt Gaad nebã rɩɩbo, la y pidsd Meni-rãmbã wamd ne bõn-yũudlã,

¹² mam na n basa yãmb tɩ zabr sʋʋg sãam-yã, la yãmb fãa na n yĩgimda y rũmã zut tɩ b kood-yã. Bala, mam boolame tɩ yãmb ka sak ye. Mam gomame la yãmb ka kelg ye. La yãmb maana bũmb nins fãa sẽn ka noom maam, yãmb yãka bũmb nins sẽn ka tol n kõt maam sũ-noogã.»

¹³ Bõn-kãng yĩnga, Wẽnnaam Sẽn-Ka-Saab yetame: «Mam tʋmtʋmdbã na n dɩɩme, la kom na n yõka yãmba. Mam tʋmtʋmdbã na n yũume, la ko-yũud na n yõka yãmba. Mam tʋmtʋmdbã na n maana sũ-noogo, la yãmb na n paama yãnde.

¹⁴ Mam tʋmtʋmdbã na n kaasa ne sũ-noogo, tɩ b sũur yaa noogo, la yãmb na n wiisa sũ-toog pʋga, y na n kelma ne sũ-pa-noaanga.

¹⁵ Yãmb yʋʋrã na n yɩɩ kãab-wẽng bũmb tɩ neb nins mam sẽn yãkã tar n wẽend n yetẽ yaa: ‹Bɩ Wẽnnaam Sẽn-Ka-Saab kɩt tɩ f ki a woto!› La b na n pʋda b tʋmtʋmdbã yʋʋr a to.

¹⁶ Ned sã n dat n ning a meng bark tẽngã pʋga, a na n ninga a meng bark ne Wẽnnaam sẽn yaa ãminã yʋʋre. La ned sã n na n wẽen tẽngã pʋgẽ, a na n wẽena ne Wẽnnaam sẽn yaa ãminã yʋʋre. Bala, b na n yĩma yel-pakr nins sẽn dag n zĩnd pĩndã yelle, b na n solga bãmb mam nifẽ.»

Yĩngr-paalga la dũni-paalga

¹⁷ Sɩd me, mam na n maana yĩngr-paalga, la dũni-paalga. B kõn tol n leb n tẽeg sẽn zĩnd pĩndã yell ye, b kõn leb n tags a yell ye.

¹⁸ Bas-y rẽ, la y maan sũ-noogo, la y kɩdem daar fãa bũmb ning mam sẽn naanã yĩnga. Bala, mam naanda Zeruzalɛm kɩdeng yĩnga, la naan a nebã sũ-noog yĩnga.

¹⁹ Mam na n kɩtame tɩ Zeruzalɛm yɩ mam kɩdengo, la m na n kɩtame tɩ mam nebã yɩ mam sũ-noogo. B kõn tol n leb n wʋm yãbr wall kelems beenẽ ye.

²⁰ Beenẽ, bi-pɛɛlg kõn dog n wẽneg n ki rasem a wãn pʋgẽ ye, la nin-kẽem kõn ki t'a daar ka ta ye. Bala, ned sẽn ki a yʋʋm koabg yaa bi-bɩɩga, la yel-wẽn-maand sẽn ki a yʋʋm koabga, b geelgda yẽnda wa ned sẽn paam kãab-wẽnga.

²¹ Bãmb na n mee rot n zĩnd b pʋse. B na n sela tɩɩs n dɩ b biisi.

²² Bãmb kõn me b rot tɩ ned a to reeg n kẽ ye. B kõn sel tɩɩs tɩ ned a to reeg n soog n dɩ ye. Bala, mam nebã rasem na n kaoosa wa tɩɩse. La neb nins mam sẽn yãkã na n dɩɩ b nus tʋʋmã yõodo.

²³ Bãmb kõn tʋm n nams zaalem ye, b kõn dog kamb sẽn na n wẽneg n ki b nifẽ ye. Bala, bãmb na n yɩɩ Sẽn-Ka-Saab sẽn ning neb nins barkã yagense, la bãmb kambã na n paa ne bãmba.

²⁴ Mam na n leokame tɩ b nan ka bool maam ye. Bãmb sẽn wat n ket n gomdã tɩ mam wʋmame.

²⁵ Rigd-n-yĩidg ne pe-bil na n lagma taab n wãb yamdo, gɩgemd na n wãba yamd wa naafo, la tẽng tom na n yɩɩ waaf rɩɩbo. Mam tãn-sõngã fãa zugu, wẽng kõn leb n zĩnd beenẽ, la sãoong kõn leb n zĩnd beenẽ ye. Maam a Sẽn-Ka-Saab n yeele.