A Ezayi 62 - WẼNNAAM SEBRE 2014

Zeruzalɛm paama yʋ-paalga

¹ Sɩyõ yĩnga, mam ka na n sĩnd ye. Zeruzalɛm yĩnga, mam ka na n zĩnd sɩɩ ye. Hal tɩ yẽnda tɩrlmã yãmb zĩig fãa wa vẽenem, tɩ yẽnda fãagrã yãmb zĩig fãa wa b sẽn yõgen bug-vɩlenga.

² Dẽ, buud a taabã na n yãnda fo tɩrlmã, la rĩm-dãmbã fãa na n yãnda fo ziirã. Bãmb na n boola foom ne yʋ-paalg ning Sẽn-Ka-Saab meng noor sẽn na n pʋdã.

³ Fo na n yɩɩ ziir maanf Sẽn-Ka-Saab nugã pʋga, la wa naam peen-vindg fo Wẽnnaamã nugẽ.

⁴ B kõn leb n bool foom tɩ b sẽn bas a soabã ye. B kõn leb n bool fo tẽngã tɩ raboog ye. B na n boola foom tɩ ‹mam sũ-noog sẽn be ne a soaba›, la b bool f tẽngã tɩ ‹pag b sẽn peege.› Bala, Sẽn-Ka-Saab sũur nooma ne foom, la b na n leb n sak n deega f tẽngã tɩ yɩ a paga.

⁵ Wa bi-bɩɩg sẽn kẽed kãadem ne pʋg-sadã, woto me, fo kom-dibli wã na n leb n maana kãadem ne foom, la wa rao sũur sẽn noom ne a pʋg-paal to-to wã, woto me, fo Wẽnnaamã sũur na n yɩɩ noog ne foom.

⁶ Zeruzalɛm, mam ninga tẽn-gũudb fo lalsã zutu. La wĩndg ne yʋngo, bãmb ka na n sĩnd ye. Yãmb dãmb sẽn tẽegd Sẽn-Ka-Saab yellã, vʋʋsg ka be yãmb yĩng ye!

⁷ Da bas-y tɩ b vʋʋs ye, pẽdg-y-b hal tɩ b wa lebs n me Zeruzalɛm, n kɩt t'a paam waoogr dũniyã zugu.

⁸ Sẽn-Ka-Saab wẽena ne b meng nug-rɩtgo, la ne b kangã pãng n yeele: «Mam ka na n leb n dɩk fo koodã n kõ f bɛɛbã tɩ b rɩ ye, la bu-zẽms kõn leb n yũ fo reezẽ rãamã f sẽn nams n paamã ye.

⁹ La neb nins sẽn tigs b bɩle na n dɩ-a lame, b na n pẽga Sẽn-Ka-Saabo, la neb nins sẽn wob reezẽ na n yũu reezẽ rãam mam zĩ-sõngã samandẽ.

¹⁰ Zeruzalɛm nebã, yi-y-yã! Yi-y tao-tao la y bas tẽngã, Tuk-y sor nebã yĩnga, vigs-y-yã a kugã! La y rʋʋs tãb-kaoor bu-zẽmsã yĩnga!

¹¹ Sẽn-Ka-Saab na n kɩtame tɩ dũniyã kɩremsã fãa wʋm a rãamde.» Yeel-y Sɩyõ tẽn-neerã yaa: «Fo fãagdã watame, la a zãada a yaoodã n watẽ, yẽnda keoorã reng-a-la taoore.

¹² B na n boola bãmb tɩ ‹bu-sõngo›, la ‹Sẽn-Ka-Saab sẽn fãag-b rãmbã.› La foom a Zeruzalɛm, b na n boola foom tɩ ‹b sẽn bao a soaba, la tẽng ning b sẽn ka base.› »