A Ezayi 60 - WẼNNAAM SEBRE 2014

Sẽn-Ka-Saab vẽenem buii Zeruzalɛm

¹ Yik n yãge, fo vẽenemã watame, Sẽn-Ka-Saab ziirã yãgda fo zugu.

² Ade, lik bida luda dũniyã gilli, tɩ buud toay-toayã be lik pʋgẽ. La Sẽn-Ka-Saab yika fo zugu, bãmb ziirã puka fo zugu.

³ Bu-zẽms na n kẽna fo vẽenemẽ wã, la rĩm-dãmb na n kẽna fo vẽenemã sẽn tãoosda pʋga.

⁴ Zẽk f neng n ges sẽn gilg foomã fãa. Bãmb fãa tigimda taab n wat fo nengẽ. Fo kom-dibli wã yita zĩ-zãrgẽ n watẽ, neb bugda fo kom-pugli wã b nusẽ.

⁵ Fo sã n yãnd bãmba, fo nengã na n pɩlame, fo sũurã na n yɩɩ noog wʋsgo, la yaa ko-kãsengã arzegsã sẽn wat fo nengẽ wã, ne bu-zẽmsã laogã sẽn wat fo nengẽ wã yĩnga.

⁶ Fo tẽngã na n pida ne yʋgma wʋsgo. Yaa Madiyã ne Efa tẽng yʋgma, la b fãa yita Seba tẽnga. Bãmb zɩta sãnem ne wisd n watẽ, n moond Sẽn-Ka-Saab pẽgrã.

⁷ Kedaar tẽng rũm-kʋʋngã na n tigma fo nengẽ. La Nebayot tẽng pe-raadã na n yɩɩ fo tʋʋmdã yĩnga. B na n dɩka bãmb n maan maoong sẽn yõogd bugum mam tẽn-kugrã zugu, la m na n deega b maoongã. Mam na n kɩtame tɩ mam doogã sẽn tar ziirã yãge.

⁸ Yaa ãnda rãmb la sẽn yɩgd wa sawatã, la b yɩgd wa manwal sẽn dabd b roogẽ?

⁹ Bala, tẽms nins koom sẽn gũbgã maanda tẽeb ne maam. La yaa Tarsɩɩs tẽng koom kogendã n be taoor n dabd n na n tɩ tall fo kambã sẽn be zĩ-zãrgẽ wã n wa, ne b wanzuri wã la b sãnemã, la yaa Sẽn-Ka-Saab sẽn yaa fo Wẽnnaam, n yaa Israyɛll Pʋ-Peelem-Soabã sẽn kɩt tɩ fo tar ziirã yʋʋr yĩnga.

¹⁰ Sãamb n na n lebs n me fo tẽngã lalse, la b rĩm-dãmb na n tʋma yãmb yĩnga. Bala, mam sũ-puugrã wakate, mam sɩbga foom, la mam sõmblmã pʋga, mam zoee fo nimbãanega.

¹¹ Fo kʋɩlemsã na n pagsa wakat fãa, wĩndg ne yʋngo, b kõn tol n leb n pag ye. La yaa sẽn na n yɩl n bas tɩ bu-zẽmsã laogã ne b rĩm-dãmbã la b poorẽ dãmbã tõog n kẽ fo pʋgẽ.

¹² Bala, buud ning ne soolem ning sẽn ka na n sak foomã na n sãamame. B na n sãama bu-zẽm-kãense.

¹³ Libã tẽng ziirã na n waa fo nengẽ, yaa sɩprɛs raad ne orme la buyiis raado. Bãmb fãa na n wa paasa mam sɛk roogã zĩig neerlem. Mam na n kɩtame tɩ zĩig ning mam sẽn dogend m naoã paam ziiri.

¹⁴ Sẽn dag n paoogd-b foomã kamb na n sulga b mens n wa fo nengẽ, bãmb na n wa wõgemda fo naoã tẽngre. Yaa sẽn dag n yaand-b foomã fãa. Bãmb na n boola foom tɩ ‹Sẽn-Ka-Saab tẽnga›, la ‹Israyɛll Pʋ-Peelem-Soabã Sɩyõ.›

¹⁵ B rag n bas-f lame la b kisg-fu, tɩ ned rag n ka pɩʋʋgd fo sẽnẽ ye. Mam na n kɩtame tɩ fo paam waoogr wakat fãa, la m kɩt tɩ f paam sũ-noog zamaan woo zamaane.

¹⁶ Fo na n yẽsma buud a taab bĩisim, fo na n yẽsma rĩm-dãmb bĩisa. Woto, fo na n bãngame tɩ mam yaa Sẽn-Ka-Saab sẽn yaa fo fãagda, n yaa a Zakoob yagensã pãng soaba.

¹⁷ Mam na n waa ne sãnem t'a reeg zũud zĩiga, la m wa ne wanzuri t'a reeg kut zĩiga. La m wa ne zũud t'a reeg raad zĩiga. La m wa ne kut t'a reeg kug zĩiga. Mam na n kɩtame tɩ vɩ-bãan gũ foom, la m kɩt tɩ tɩrlem soog foom.

¹⁸ B kõn leb n wʋm tɩ b gomd nen-kegl-tʋʋm yell fo tẽngã pʋga, wall zɛɛbo, wall sãoong fo soolmẽ wã ye. Fo na n pʋda f lalsã yʋʋr tɩ ‹fãagre›, la f pʋd f tẽngã noy kʋɩlems yʋʋr tɩ ‹pẽgre.›

¹⁹ Wĩndga, wĩntoogã kõn leb n yɩ fo vẽenem ye, la yʋngo kiuugã kõn leb n kõ foom a vẽenem ye. Sẽn-Ka-Saab n na n yɩ fo vẽenem wakat fãa, yaa fo Wẽnnaamã n na n yɩ fo ziiri.

²⁰ Fo wĩntoogã kõn leb n kẽ ye, la fo kiuugã kõn leb n paam ki-lik ye. Bala, yaa Sẽn-Ka-Saab n na n yɩ fo vẽenem wakat fãa. Fo sũ-sãangã rayã na n sɛɛme.

²¹ Fo nebã zãng na n yɩɩ nin-tɩrse, bãmb na n sooga tẽngã wakat fãa. Yaa tɩ-tobeng ning mam sẽn selã, yaa mam mengã n tʋm woto, n na n wilg mam ziirã.

²² Ned ning sẽn yaa-a bilfã na n lebga neb tusri, la sẽn paood-a n yɩɩdã na n lebga buud sẽn tar pãnga. Maam a Sẽn-Ka-Saab na n kɩtame t'a wakatã sã n ta bɩ yɩ tao-tao.